Dauveilewai 4 - Ai Vola Tabu (Vakadewa Makawa Vakavoutaki 2021)（FRV21）

Ko Tepora kei Baraki

1Ia ni sa mate ko Eute, era sa kitaka tale na ka ca e na mata i Jiova ko ira na Isireli.

2A sa soli ira ko Jiova ki na liga i Japini na tui Kenani, o koya sa lewa mai Asori; ia na kavetani ni nona mataivalu ko Sisera, o koya sa dautiko mai Eroseci mai na veimatanitu tani.

3A ra sa tagi vei Jiova ko ira na Isireli; ni sa tu vua e ciwa na drau na qiqi-ni-valu kaukamea, a sa vakasaurarataki ira vakaukauwa na Isireli ka yabaki ruasagavulu.

4A sa lewai ira na Isireli e na gauna ko ya ko Tepora, e dua na parofita yalewa, na wati Lapitoci.

5A sa tiko ko koya e ruku ni vuni niu-sawa i Tepora, e na maliwa i Rama kei Peceli, mai na vanua veiulunivanua ko Ifereimi; ka sa daulako cake vei koya ko ira na Isireli me lewa na nodra ka ni veileti.

6A sa talaki ko koya, ka kacivi Baraki na luve i Epinoami mai Ketesa nei Navitalai, ka kaya vua, “Sa sega li ni vakarota oqo vei iko ko Jiova na Kalou ni Isireli, ‘Mo la'ki vakarautaka na mataivalu vaka ki na Ulunivanua ko Tepori, ka kauta vata kei iko e lewe tini na udolu na tamata mai na yavusa i Navitalai kei na yavusa i Sevuloni?

7Ia ka'u na vakayarayarataki Sisera kivei iko ki na uciwai ko Kisoni, o koya na kavetani ni mataivalu nei Japini, kei na nona qiqi-ni-valu, kei ira na nona tamata era lewe vuqa, ia ka'u na soli koya ki na ligamu.’ ”

8A sa kaya vua ko Baraki, “Kevaka ko na lako vata kei au, au na lako; ia kevaka ko na sega ni lako vata kei au, ka'u na sega ni lako.”

9A sa kaya ko koya, “Au na lako vakaidina kei iko. Ia ko na sega ni dokai e na vuku ni sala ko sa lako kina, ni na soli Sisera ko Jiova ki na ligana e dua na yalewa.” A sa cavu tu ko Tepora ka lako vata kei Baraki ki Ketesa.

10A sa kacivi ira na Sevuloni kei ira na Navitalai ko Baraki me ra lako ki Ketesa. A ra sa lako muri koya e lewe tini na udolu na tamata, ka sa lako vata kaya ko Tepora.

11Ia ko Eperi na Kenaiti sa tawasei koya eliu mai vei ira na kai Kenai era luve i Opapi na vugoi Mosese, ka birika na nona valelaca vaka ki Eloni-pisanenimi, oqori sa voleka ki Ketesa.

12E na gauna sa tukuni kina vei Sisera ni sa lako cake ki na Ulunivanua ko Tepori ko Baraki na luve i Epinoami,

13a sa vakasoqona vata ko Sisera na nona qiqi-ni-valu kecega, e ciwa na drau na qiqi-ni-valu kaukamea, kei na tamata kecega era tiko vata kaya, mai Eroseci-aqoimi ki na uciwai ko Kisoni.

14A sa qai kaya vei Baraki ko Tepora, “Mo ia! Ni sai koya oqo na siga ena soli Sisera kina ki na ligamu ko Jiova. Sa sega li ni liutaki iko ko Jiova?” A sa siro sobu ko Baraki mai na Ulunivanua ko Tepori, ka sa muri koya e lewe tini na udolu na tamata.

15Ia ko Jiova sa valuti Sisera kei na nona qiqi-ni-valu kecega, kei ira na nona mataivalu kecega, e nai seleiwau, e na mata i Baraki. A sa sobu yani ko Sisera mai na nona qiqi-ni-valu, ka dro e na yavana.

16A sa cicimuria na qiqi-ni-valu kei ira nai valu ko Baraki, ka yaco ki Eroseci mai na veimatanitu tani. A sa bale kecega na mataivalu i Sisera e nai seleiwau; sa sega ni vo bula e dua na tamata.

17Ia sa dro ko Sisera e na yavana, ka yaco ki na valelaca nei Jaeli, na wati Eperi na Kenaiti; ni ra sa tiko veisaututaki ko Japini na tui Asori kei na mataqali i Eperi na Kenaiti.

18A sa curu ki tuba ko Jaeli me tavaki Sisera, ka sa kaya vua, “Ni curu mai, noqu turaga, curu mai eke kivei au; kakua ni rere.” A sa curu vua ko koya ki loma ni valelaca, a sa tutuvitaki koya ko koya e nai tutuvi.

19A sa kaya vua na yalewa ko koya, “Mo vagunuvi au mada e na dua na wai lailai, ni'u sa viagunu.” A sa dolava ko koya e dua na tavaya sucu, ka vagunuvi koya kina, ka tutuvitaki koya.

20A sa kaya vua ko Sisera, “Mo tucake tu mai na katuba ni valelaca, ka kevaka sa na lako mai e dua na tamata ka tarogi iko, ‘Sa tiko li eke e dua na tamata?’ mo qai kaya, ‘E segai.’ ”

21Ia sa taura ga ko Jaeli na wati Eperi e dua na peki ni valelaca, ka sa taura e ligana e dua nai tukituki, ka lako lo vua, ka tukia na peki ki na nona kanavalavala, ka cokavaka ki na qele—ni sa moce lutu bibi ko koya mai na levu ni oca—ka sa mate sara kina.

22Ka raica, ni sa cicimuri Sisera tiko mai ko Baraki, a sa curu ki tuba ko Jaeli me tavaki koya, ka sa kaya vua, “Mo lako mai, ka'u na vakatakila vei iko na tamata ko sa vakasaqara.” Ia ni sa curu ki loma, raica, sa davo no ka sa mate ko Sisera, ka sa coba no e na nona kanavalavala na peki ni valelaca.

23A sa vakamalumalumutaki Japini na tui Kenani na Kalou e na siga ko ya, e matadra na Isireli.

24A sa kaukauwa cake tikoga na ligadra na Isireli ni ra vala kei Japini na tui Kenani, ka yacova na gauna era sa qai vakarusai Japini kina na tui Kenani.