Jemesa 4 - Ai Vola Tabu (Vakadewa Makawa Vakavoutaki 2021)（FRV21）

Na Veiwekani kei Vuravura

1Sa vu mai vei na veiba kei na veivala vei kemudou? Sa sega li ni vuna na nomudou gagadre ca sa veivala e na veitiki ni yagomudou?

2Dou sa kocokoco ka sega ni rawata, ka dou sa veivakamatei kina. Ka dou sa daugagadre ka sega ni taura rawa me nomudou, ka dou sa veivala ka veiba kina. Dou sa sega ni rawata, ni dou sa sega ni kerekere.

3Dou sa kerekere ga ka sega ni rawata, ni dou sa kerekere e nai naki cala, mo dou vakayalia e na nomudou gagadre ca.

4Oi kemudou na dauyalewa kei na dautagane, dou sa sega beka ni kila ni sa veicati kei na Kalou na veivinakati kei vuravura? Ia sa veimecaki kei na Kalou ko koya sa via veitokani kei vuravura.

5Dou sa vakasama beka ni sa kaya walega nai Vola Tabu, “Sa gadreva vakavuvu na Yalo sa tiko e na lomada”?

6 Vbale 3.34 Ia sa solia vakalevu na loloma ko koya. O koya sa kaya kina ko koya,

“O ira sa viavialevu sa vorati ira na Kalou,

ia sa solia nai solisoli loloma vei ira era sa yalomalumalumu.”

7O koya mo dou qai vakamalumalumutaki kemudou vua na Kalou. Vorata na tevoro, ena dro tani kina vei kemudou ko koya.

8Toro voleka yani vua na Kalou, ka na toro voleka mai vei kemudou ko koya. Vakasavasavataka na ligamudou, oi kemudou na lomalomarua.

9Dou mai rarawa, ka qoqolou, ka tagi. Me vuki na nomudou dredre me qoqolou, kei na nomudou marau me mataveveku.

10Dou vakayalomalumalumutaki kemudou e na mata ni Turaga, ka na laveti kemudou cake ko koya.

Me Kakua na Vakalelewa

11Kakua ni dou veikaseti, na veiwekani. O koya sa kaseta na wekana ka vakalewai koya na wekana, sa kaseta na vunau ka sa vakalewa talega na vunau. Ia kevaka ko sa vakalewa na vunau, ko sa qai sega ni muria na vunau, ia ko sa turaga-ni-lewa ga.

12Sa dua bauga sa vakatura na vunau ka turaga-ni-lewa, ko koya ga sa rawa ni ia na veivakabulai kei na veivakarusai. O cei ko iko mo vakalewa na tani?

Vakasala me Baleta na Dokadoka

13 Vbale 27.1 Dou lako mai, oi kemudou sa dau kaya, “Edaidai se na mataka eda na lako ki na koro ko ya, ka tiko kina ka yabaki dua, ka veivoli kina, ka rawata nai yau,”

14ia dou sa sega ni kila na ka sa na yaco e na mataka. A cava na nomudou bula? Na kabukabu walega koi kemudou, sa rairai ka sa vakadede vakalailai ga, a sa qai seavu yani.

15Ia oqo mo dou kaya, “Kevaka sa vinaka vua na Turaga, eda na bula, ka kitaka na ka oqo, se na ka ko ya.”

16Ia dou sa qai marau ka dokadokai kemudou. E ca na marau kecega sa vaka ko ya.

17O koya oqo sa valavala ca kina ko koya sa kila me caka vinaka, ka sa sega ni kitaka.