Josua 11 - Ai Vola Tabu (Vakadewa Makawa Vakavoutaki 2021)（FRV21）

Vakadruka ko Josua na Matanitu Cokovata ni Vualiku kei Kenani

1Ia ni sa rogoca ko Japini na tui Asori, sa talaki ko koya vei Jopapa na tui Matoni, kei na tui Simironi, kei na tui Ekisafi,

2kei ira na tui sa tiko vaka ki na vualiku ni vanua veiulunivanua, vei ira talega e na vanua veibuca vaka ki na ceva kei Kineroci, vei ira talega e na buca, kei na yasana nei Toa vaka ki na ra,

3kivei ira talega na kai Kenani sa tiko mai na tokalau, mai na ra talega, kei ira na Amoraiti, kei ira na Itaiti, kei ira na Perisaiti, kei na Jepusaiti era sa tiko mai na vanua veiulunivanua, kei ira na Aivaiti sa tiko e ruku i Erimoni, e na tiki ni vanua ko Misipa.

4A ra lako yani, ko ira vata kei na nodra i valu kecega, era sa lewe vuqa, me vaka na nuku mai matasawa, kei na ose kei na qiqi-ni-valu na ka levu sara.

5Ia ni ra sa bose na tui kecega oqori, era sa lako ka tiko vata ki na wai ko Meromi, me ra veivala kei ira na Isireli.

6Sa qai kaya vei Josua ko Jiova, “Mo kakua ni rere e na vukudra, ni ka'u na soli ira kece me vakamatei e na matadra na Isireli, e na mataka, ni sa vakaoqo na mata-ni-siga; ko na tava na tularua ni nodra ose, ka vakama e na bukawaqa na nodra qiqi-ni-valu.”

7A sa lako vakidacala mai vei ira ko Josua, kei ira vata kaya na tamata i valu kecega, mai na wai ko Meromi, ka sikiti ira.

8A sa soli ira ko Jiova ki na ligadra na Isireli, a ra sa mokuti ira, ka vakasavi ira ka yaco ki Saitoni levu, kei Misirifoci-meimi, kei na buca kei Misipe vaka ki na tokalau, a ra mokuti ira, ka sega ni laiva e dua vei ira me vo tu.

9A sa kitaka vei ira ko Josua me vaka ka kaya vua ko Jiova; sa tava na tularua ni nodra ose, ka vakama e na bukawaqa na nodra qiqi-ni-valu.

10A sa lesu ko Josua e na gauna ko ya, ka kabai Asori, ka yavita na kena tui e nai seleiwau; ni sa ulu ni veimatanitu kecega ko ya eliu ko Asori.

11A ra sa yavita mate sara na tamata kecega sa tiko mai kina e nai seleiwau. Sa sega ni vo bula e dua, ka sa vakamai Asori ko koya e na bukawaqa.

12Ia na nodra veikoro kecega na tui ko ya, kei na kedra tui kecega, sa rawa ko Josua, ka yavita e nai seleiwau, ka vakarusai ira sara, me vaka ka vakarota ko Mosese na tamata ni Kalou ko Jiova.

13Ia na veikoro sa tu e na nodra vanua cecere, sa sega ni vakama e dua ko ira na Isireli, ko Asori duaduaga, sa vakama ko Josua.

14Ia nai toki-ni-valu kecega mai na veikoro oqo, kei na manumanu e yavai va, era sa taura na Isireli me nodra; ia na tamata kecega era sa yavita e nai seleiwau, ka vakarusai ira kina; era sa sega ni laiva e dua me bula.

15Me vaka ka vakarota vei Mosese na nona tamata ko Jiova, ka vakaroti Josua vakakina ko Mosese; ia sa kitaka vakakina ko Josua; sa sega ni biuta e dua na ka e na ka kecega ka vakarota vei Mosese ko Jiova.

Tukutuku ni Veivanua sa Vakadruka ko Josua

16A sa rawa na vanua taucoko ko ya ko Josua: na vanua veiulunivanua, kei na vanua kecega sa no mai na mata ni Ceva, kei na vanua taucoko ko Koseni, kei na buca, kei na vanua veibuca, kei na vanua veiulunivanua nei Isireli, kei na kena vanua buca;

17io mai na Ulunivanua ko Alaki, sa lako cake ki Sia, ka yaco ki Peali-kata ena buca kei Lepanoni e ruku ni Ulunivanua ko Erimoni. A sa rawa na kedra tui kecega ko koya, ka mokuti ira, ka vakamatei ira.

18Sa vala vakadede kei ira na tui kecega oqori ko Josua.

19Sa sega e dua na koro tani sa veisaututaki kei ira na Isireli, o ira ga na Aivaiti na kai Kipioni; era sa rawa kece e nai valu.

20Vrua 7.16Ni sa vu vei Jiova na kena vakaukauwataki ni yalodra, me ra la'ki veivaluti kei ira na Isireli, me vakamatei ira sara ko koya, ka me ra kakua ni lomani, ia me vakarusai ira ga ko koya, me vaka ka vakarota vei Mosese ko Jiova.

21A sa lako mai e na gauna ko ya ko Josua, ka vakamatei ira na luve i Anaki mai na vanua veiulunivanua, mai Epironi, mai Tipiri, mai Anapi, mai na vanua veiulunivanua kece talega nei Juta, kei na vanua veiulunivanua kecega nei Isireli; sa vakarusai ira sara ko Josua kei na nodra veikoro.

22Sa sega ni vo e le dua na luve i Anaki e na nodra vanua na Isireli; mai Qasa ga, kei Kaca, kei Asitoti, sa ra mani vo ga kina.

23A sa rawa na vanua taucoko ko Josua, me vaka na ka kece ka kaya vei Mosese ko Jiova; a sa solia ko Josua vei ira na Isireli me ra taukena, me vaka na kena wase ni nodra veimataqali. A sa mudu nai valu e na vanua.