Dauveilewai 14 - Ai Vola Tabu (Vakadewa Makawa Vakavoutaki 2021)（FRV21）

Na Vakawati nei Samisoni

1A sa lako sobu ko Samisoni ki Timinaca, a sa kunea e dua na yalewa mai Timinaca, a luve ni kai Filisitia.

2A sa lako cake ka tukuna vei tamana kei tinana, ka kaya, “Au sa kunea e dua na yalewa mai Timinaca, a luve ni kai Filisitia; ia mo drau la'ki kauta mai me watiqu.”

3Ia sa kaya vua ko tamana kei tinana, “Sa sega beka e dua na yalewa vei ira na nodra goneyalewa na wekamu, se vei ira kecega na kai noqu, ko sa lako kina mo vakawati kei na dua na yalewa mai vei ira na kai Filisitia sa sega ni cili?” A sa kaya ko Samisoni vei tamana, “Mo kauti koya mai me noqu, ni'u sa vinakati koya sara.”

4A sa sega ni kila ko tamana kei tinana ni sa vakavuna oqo ko Jiova, ni sa vakaraica voli ko koya e dua na sala me ra cudruvi kina ko ira na kai Filisitia. Era sa lewai ira tiko na Isireli ko ira na kai Filisitia e na gauna ko ya.

5A ratou sa lako sobu vata ko Samisoni kei na tamana kei tinana ki Timinaca. Ni ratou sa yaco ki na veiloga-ni-vaini kei Timinaca, ka raica, sa dua na luve ni laione sa tagi ni sa tavaki koya.

6A sa curumi koya vakaukauwa na Yalo i Jiova, ka sa basuraka na laione ko koya me vaka sa basuraka e dua na luve ni me, ka sa sega ni dua na ka e tu e ligana. Ia sa sega ni tukuna vei tamana se tinana na ka sa cakava.

7A sa qai lako sobu, ka rau sa veivosaki kaya na yalewa, ka sa vinakati koya sara ko Samisoni.

8E muri, a sa lako tale ko koya me vakamautaki koya. Ni sa lako voli, a vuki lesu me raica na yago-mate ni laione ka vakamatea, ka raica, sa dua na qele ni oni sa tiko e na yago-mate ni laione, kei na de-ni-oni.

9A sa takiva ki ligana, ka kana lako. Ni sa lako mai vei tamana kei tinana, sa solia vei rau eso, ka rau sa kania. Ia sa sega ga ni tukuna vei rau ko koya ni sa kauta mai na yago-mate ni laione na oni ko ya.

10A sa lako sobu na tamana vei koya na yalewa, ka sa cakava mai kea e dua na solevu ko Samisoni, ni sa dau kenai valavala oqo vei ira na cauravou.

11Ia ni ra sa raici koya, era sa kauta mai e tolusagavulu nai tokani me ra tiko vata kei koya.

12A sa kaya vei ira ko Samisoni, “Me'u cavuta mada vei kemudou e dua na vatavatairalago. Kevaka dou na vakamacalataka vakadodonu vei au e na loma ni bogi vitu, ni sa ia tiko kina na solevu, ka kila rawa, au na qai solia vei kemudou e tolusagavulu nai sulu lineni kei na tolusagavulu nai sulu ni veisau.

13Ia kevaka dou sa sega ni vakamacalataka rawa vei au, dou na qai solia mai vei au e tolusagavulu nai sulu lineni, kei na tolusagavulu nai sulu ni veisau.” A ra sa kaya vua, “Cavuta mai na nomu vatavatairalago, me keitou rogoca.”

14A sa kaya vei ira ko koya,

“Sa basika na kakana mai vua ka dauviakana.

Sa basika na ka kamikamica mai vua sa kaukauwa.”

Ia sa oti e tolu na bogi, ka ra sa sega ni vakamacalataka rawa na vatavatairalago.

15Ia e na kenai kavitu ni siga, era sa kaya vua na wati Samisoni, “Mo temaka na watimu me vakamacalataka vei keitou na vatavatairalago, de keitou vakamai iko kei na vale i tamamu e na bukawaqa. Dou sa sureti keitou beka mai eke mo dou vakadravudravuataki keitou?”

16A sa tagi vei Samisoni na watina, ka kaya, “Ko sa cati au ga; ka sega ni lomani au. Ko sa cavuta na vatavatairalago vei ira na kai noqu, ka se sega ni ko vakamacalataka vei au.” A sa kaya ko Samisoni, “Raica, au se sega mada ni vakamacalataka vei tamaqu se tinaqu. A cava me'u qai vakamacalataka kina vei iko?”

17A sa tagi vua na watina ka bogi vitu ni sa ia tiko na nodra solevu; ka sa yaco e na kenai kavitu ni siga, sa vakamacalataka vua ko Samisoni, e na vuku ni nona vakasosataki koya. A sa qai vakamacalataka ko wati Samisoni na vatavatairalago vei ira na kai nona.

18A ra sa kaya vei Samisoni na lewe ni koro ko ya e na kenai kavitu ni siga, ni se bera ni dromu na mata-ni-siga,

“A cava sa uasivia na kena kamikamica na oni?

Ka cava sa uasivia na kena kaukauwa na laione?”

A sa kaya vei ira ko koya,

“Kevaka dou a sega ni siviyara kei na noqu bulumakau yalewa,

ke dou a sega ni kila rawa na noqu vatavatairalago.”

19A sa curumi koya vakaukauwa na Yalo i Jiova, ka sa lako sobu ko koya ki Asikiloni, ka mokuta e le tolusagavulu na tamata vei ira, ka kauta mai na nodra i sulu, ka solia me rauti ira era a vakamacalataka na vatavatairalago. A sa tubu na nona cudru ni sa lesu tale ki na vale i tamana.

20A sa soli na wati Samisoni vua na nona i tokani, o koya ka a nonai tau.