1 Veigauna 21 - Ai Vola Tabu (Vakadewa Makawa Vakavoutaki 2021)（FRV21）

Na Wili Lewenivanua kei na Cudru ni Kalou(2 Samuela 24.1-25)

1Sa qai ia ko Setani me nodra meca na Isireli, ka sa vakauqeti Tevita me wiliki ira na Isireli.

2A sa kaya ko Tevita kivei Joape, kei ira na turaga-ni-valu, “Mo lako, ka wiliki ira na Isireli, mai Peri-sepa ka yaco ki Tani, ka kauta mai vei au na kedrai wiliwili me'u kila.”

3A sa kaya ko Joape, “Me vakalewevuqataki ira na nona tamata ko Jiova vakadrau. Ia kemuni na noqu turaga na tui, era sa sega li ni nomuni tamata na noqu turaga ko ira kece? A cava mada sa nanuma kina na noqu turaga na ka oqo? Ena cava mo ni vu ni cudru kina vei ira na Isireli?”

4Ia sa gumatua ga vei Joape na nona vosa na tui. A sa lako yani kina ko Joape, ka lako voli vei ira kece na Isireli, ka lako mai ki Jerusalemi.

5A sa tukuna ko Joape na kedrai wiliwili na tamata kivei Tevita. Ia na kedrai wiliwili kecega na Isireli sa le udolu vakaudolu ka drau tale na udolu na tamata, sa vakaiyaragi e nai seleiwau; ia ko ira na Juta, era sa le va na drau ka vitusagavulu tale na udolu na tamata, sa nodra i yaragi nai seleiwau.

6Ia ka sega ni wili vata kei ira ko ira na Livai, kei ira na Penijamini, ni sa ka ca sara kivei Joape na nona vosa na tui.

7A sa rarawa na Kalou e na vuku ni ka oqo; ka sa cudruvi ira kina na Isireli ko koya.

8A sa kaya vua na Kalou ko Tevita, “Au sai valavala ca vakalevu, ni'u sa cakava na ka oqo; ia mo ni qai kauta tani mada na noqu ca na nomuni tamata, ni ka'u sai valavala vakalialia sara.”

9A sa vosa ko Jiova kivei Kata, na daurai i Tevita, ka sa kaya,

10“La'ki tukuna kivei Tevita, ka kaya, ‘Sa vosa vakaoqo ko Jiova, Au sa cavuta vei iko e tolu na ka; ia mo digitaka e dua me'u vakayacora vei iko.’ ”

11A sa lako mai kivei Tevita ko Kata, ka kaya vua, “Sa vosa vakaoqo ko Jiova, ‘Mo digitaka mada:

12me dausiga na vanua ka yabaki tolu; se me rawai iko ko ira na nomu meca ka vula tolu, ni ra yaviti iko e na nodra i seleiwau; se me kani iko na nona i seleiwau ko Jiova ka siga tolu, ko ya na mate ca e nomu vanua, ni sa vakacaca voli e na veiyasana i Isireli na agilosi i Jiova.’ Mo lewa mada, se cava na vosa me'u kauta vua sa talai au mai.”

13A sa kaya vei Kata ko Tevita, “Au sa qai taqaya vakalevu; me'u lutu mada ki na liga i Jiova; ni sa levu sara na nona yalololoma; ia me'u kakua ni lutu ki na liga ni tamata.”

14A sa vakayacora na mate ca ko Jiova kivei ira na Isireli, ka sa mate vei ira na Isireli e lewe vitusagavulu na udolu na tamata.

15A sa tala na Kalou e dua na agilosi ki Jerusalemi me vakarusa, ia ni sa vakarau me ia tiko na veivakarusai, sa raica ko Jiova, ka sa veivutuni e na vuku ni rarawa, ka sa kaya vua na agilosi sa ia na veivakarusai, “Sa rauta! Tarova na ligamu.” Ia na agilosi i Jiova sa tu voleka ki na rara ni samu sila nei Orinani na Jepusaiti.

16A sa ta cake ko Tevita, ka sa kunea na agilosi i Jiova ni sa tu e na maliwa kei vuravura kei lomalagi, ka sa ucu tu e ligana na nona i seleiwau, ka sa dodoka me donui Jerusalemi. Sa qai bale vakatoboicu ko Tevita, kei ira na qase, era sa vakaisulu e nai sulu taga.

17A sa kaya vua na Kalou ko Tevita, “Sai au li se segai ka vakarota me ra wili ko ira na tamata? Ni sai au ga sa cala ka i valavala ca vakaidina. Ia ko ira na sipi oqo, a cava beka era sa cakava? Kemuni Jiova na noqu Kalou, me cudruvi au mada kei na vale i tamaqu na ligamuni; ia me kakua ga vei ira na nomuni tamata, me ra vakamatei ko ira.”

Na Vakacaboisoro i Tevita

18A sa vakarota na agilosi i Jiova vei Kata, me kaya kivei Tevita, me lako cake ko Tevita, ka cakava e dua nai cabocabo-ni-soro kivei Jiova, e na rara ni samu sila nei Orinani na Jepusaiti.

19A sa lako cake ko Tevita e na vosa i Kata, ka vosataka e na yaca i Jiova.

20A sa vuki ki muri ko Orinani, ka raica na agilosi; a ratou sa vunitaki iratou, ko koya kei iratou vata kaya na luvena tagane vava. A sa buturaka tiko na witi ko Orinani.

21Ia ni sa lako tiko mai ko Tevita kivei Orinani, sa rai yani ko Orinani, ka kunei Tevita, ka lako yani mai na rara ni samu sila, a sa cuva vakatoboicu kivei Tevita.

22Sa qai kaya ko Tevita kivei Orinani, “Mo solia mai vei au na tikina sa samu kina na sila, me'u cakava kina e dua nai cabocabo-ni-soro kivei Jiova—ka mo solia mai vei au ka me saumi e na kenai voli dodonu—me mudu kina na mate ca vei ira na tamata.”

23A sa kaya vei Tevita ko Orinani, “Mo ni taura me nomuni, ka mo ni kitaka na noqu turaga na tui na ka sa dodonu vei kemuni; ka raica, au sa solia na bulumakau mei soro kama, kei nai yaya ni buturaki sila me kena buka, kei na witi mei madrali laukana. Au sa solia kece.”

24Ia sa kaya vei Orinani ko Tevita na tui, “E segai; ka'u na volia dina e na kenai voli dodonu. Ni ka'u na sega ni kauta na ka sa nomu me nona ko Jiova, se vakacabora nai soro kama sa sega ni vakaivoli.”

25A sa solia kina kivei Orinani ko Tevita e ono na drau na sikeli koula, sa vakarautaki na kena bibi, mei voli ni tikina ko ya.

26A sa tara mai kea ko Tevita e dua nai cabocabo-ni-soro kivei Jiova, ka vakacabora nai soro kama eso, ka so nai soro ni veivinakati, ka masuta na yaca i Jiova. A sa vosa vua ko koya e na bukawaqa mai lomalagi e na dela ni cabocabo-ni-soro kama.

27A sa vakarota na agilosi ko Jiova, ka sa daramaka tale ko koya na nona i seleiwau ki na kena taga.

Na Vanua Digitaki me Tara kina na Valenisoro

28E na gauna ko ya, ni sa raica ko Tevita ni sa vosa vei koya ko Jiova e na rara ni samu sila nei Orinani na Jepusaiti, sa qai vakacaboisoro mai kea ko koya.

29Ia na vale i Jiova, oqori ka cakava ko Mosese e na vanua lala, kei nai cabocabo-ni-soro kama, sa tu e na gauna ko ya mai na tikina cecere mai Kipioni.

30Ia sa dredre vei Tevita me lako kina me taroga na Kalou; ni sa rere tiko e na vuku ni nona i seleiwau na agilosi i Jiova.