Jope 21 - Ai Vola Tabu (Vakadewa Makawa Vakavoutaki 2021)（FRV21）

Vosa ko Jope: Era Daurawa-ka Vinaka Talega na Tamata Ca

1A sa vosa ko Jope, ka kaya:

2“Dou vakarorogo vakavinaka ki na noqu vosa,

ka me na veivakacegui vei kemudou oqo.

3Dou vosoti au mada me'u vosa;

ka dou qai ia tiko na veivakalialiai ni'u sa vosa oti.

4Me baleti au, sa vagolei beka na noqu tagi vua na tamata?

Ka cava na vuna me'u kakua kina ni vosota vakarawarawa?

5Dou raici au mada, ka mo dou kurabui,

ka tabonaka na gusumudou.

6Ni'u sa vakananuma tiko ka'u sa kidroa,

ka sa sautaninini na lewequ.

7A cava era sa bula tikoga kina nai valavala ca,

ka yaco me ra qase, io, ka ra tubu cake e na kaukauwa?

8Era sa vakataudeitaki vata kei na nodra kawa e matadra,

kei na luvedra talega e matadra.

9Sa sega na rere mai na nodra veivale,

ka sa sega ni tau vei ira na kuita ni Kalou.

10Sa susugi vinaka na nodra bulumakau tagane ka sega ni leqa;

sa vakasucu na nodra bulumakau yalewa ka sa sega ni lutudole na luvena.

11Era sa vakatubura na nodra lalai me vaka na qele ni sipi,

ka ra meke voli na luvedra.

12Era sa taura na tibereli kei na api,

ka rekitaka na domo ni kove.

13Era vakayagataka na nodra siga e na bula marau,

ka ra lako sobu e na yalo vakacegu ki nai bulubulu.

14Era sa kaya vua na Kalou, ‘Lako tani vei keitou!

Keitou sa sega ni via kila na nomu sala.

15Ko cei ko Koya sa Kaukauwa, me keitou qaravi koya?

Ka cava talega na betena vei keitou kevaka keitou masu vua?’

16Raica, sa sega li ni tiko ga e ligadra na nodra tiko marau?

Sa yawa vei au na nodra lewa nai valavala ca.

17“Sa daubokoci vakavica li na nodra cina nai valavala ca?

Ka sa yacovi ira vakavica li na veivakarusai?

Sa vota vakavica li na rarawa vei ira na Kalou e nona cudru?

18Sa vakavica me ra vaka na vu-ni-sila e na mata ni cagi,

ka vaka na qa-ni-sila sa kauta tani na cava?

19Ko sa kaya, ‘Sa maroroya na Kalou na nodra i valavala ca me kedra na luvena.’

Laiva me qai sauma vua ko koya, ka me rawa ni ra kila kina.

20Laiva me ra kunea e matadra na nodra rusa,

ka laiva me ra gunuva na cudru i Koya sa Kaukauwa.

21Ni na vinakata vakaevei ko koya na nona vuvale sa taravi koya,

ni sa muduki koso na nona bula?

22Sa dua beka me vakavulici koya na Kalou me vuku,

ni sa raici rawa ni sa daulewai ira era sa cecere?

23Sa mate e dua ni sa yago kaukauwa sara,

ni sa vakataucokotaki sara ka taqomaki vinaka.

24A sucuna sa to sara e na wai-ni-sucu,

ka sa suasua na uto-ni-suina.

25A sa mate e dua tale ni sa rarawa na yalona,

ka sa sega ni kana e na vakacegu.

26Era na koto vata e na kuvu-ni-soso,

ka ubi ira na baca ni qele.

27“Raica, ka'u sa kila na ka dou sa nanuma,

kei na nomudou vakalewai au vakaca.

28Ni dou sa kaya, ‘Sa evei na nona vale na turaga?

Sa evei na nodra i tikotiko nai valavala ca?’

29Dou sa sega beka ni tarogi ira era sa lako tu e na sala,

ka sega beka ni ciqoma na nodra i tukutuku,

30ni ra sa daumaroroi e na siga ni rusa na tamata ca,

ka ra sa dauvuetaki e na siga ni cudru?

31Ko cei sa tukuna votu vua na nona i valavala,

ka ko cei me sauma vua na ka sa cakava ko koya?

32Ni sa colati yani ki nai bulubulu ko koya,

era na yadrava na nona i bulubulu.

33Na qele e na buca ena kamikamica vua;

ena muri koya na tamata kecega,

kei ira sa liu vua era sa sega ni wiliki rawa.

34E na sala cava dou na qai vakacegui au kina mai na veika e lala wale ga?

Sa sega tale ni vo e dua na nomudou i sau ni taro, ia na lasu ga.”