Jope 8 - Ai Vola Tabu (Vakadewa Makawa Vakavoutaki 2021)（FRV21）

Sa Kaya ko Vilitati: E Dodonu me Veivutuni ko Jope

1Sa qai vosa ko Vilitati na luve i Sua, ka kaya,

2“E na bogi vica li ko na cavuta tiko kina na veika vakaoqo,

ka me sa vaka na cagi kaukauwa na vosa ni gusumu?

3Sa ia beka na Kalou na lewa sa sega ni dodonu?

Se vakacala beka na ka dodonu ko Koya sa Kaukauwa?

4Kevaka era sai valavala ca vua ko iratou na luvemu,

sa vakatalai ira tani ko koya e na vuku ni nodra talaidredre.

5Kevaka ko sa vakasaqara taudonu na Kalou

ka ia na nomu vakamamasu vei Koya sa Kaukauwa,

6kevaka ko sa savasava ka dodonu,

e sa na qai yadra dina sara mai e na vukumu ko koya,

ka vakasaututaka tale na nomu i tikotiko dodonu.

7E dina ga ni sa ka lailai na nomu i tekitekivu,

ena qai ka levu sara na nomu i cavacava.

8“Ia mo taroga mada nai tabatamata makawa,

ka vakananuma na veika era kila tu na nodra qase;

9ni da sa tubu wale e na noa koi keda, ka sega ni kila e dua na ka,

ni sa vaka wale nai yaloyalo na noda siga e vuravura.

10Era na sega beka ni vakavulici iko, ka tukuna vei iko,

ka cavuta na vosa mai na lomadra?

11“Ena tubu li na taria e na vanua e sega kina na lolobo?

Ena tubu li na kuta e na vanua e sega kina na wai?

12Ni sa drokadroka tu ka sega ni tamusuki,

sa malai rawarawa ga e na kedra maliwa na kau tale eso.

13Sa vakakina na nodra sala kecega era sa guilecava na Kalou;

ia ena sega ni yaco na ka e nuitaka na dauveivakaisini.

14Ena muduki laivi na ka sa nuitaka ko koya,

ka vaka na nona vale na viritalawalawa na ka e vakararavi kina.

15Ena ravita na nona vale, ia ena sega ni duri tu;

ena taura matua, ia ena sega ni dei.

16Sa drokadroka tu ko koya e na ruku ni mata-ni-siga,

a sa tubu na tabana e nona were.

17Sa vereverea tu na wakana e nai binibini vatu;

ka sa vakararai nona tikina e na vanua vatuvatu.

18Kevaka ena cavu laivi ga ko koya mai na nona yasana,

ena qai cakitaki koya, ka vaka, ‘Au se sega ni bau raici iko.’

19Raica, sa vaka ga oqo na nona reki,

ia ena tubu eso tani tale mai na qele ko ya.

20“Raica, ena sega ni biuta tani na tamata yalododonu na Kalou,

ena sega talega ni vukei ira nai valavala ca.

21Ena vakasinaita mada na gusumu e na dredre,

kei na tebenigusumu e na reki.

22Ko ira era cati iko era na vakaisulutaki e na madua,

ena yali sara talega na nona i tikotiko nai valavala ca.”