Same 77 - Ai Vola Tabu (Vakadewa Makawa Vakavoutaki 2021)（FRV21）

Na Vakananumi ni Cakacaka Loloma ni Kalou Vua nai liuliu ni sere: me baleti Jitucuni. A nei Esava. A Same.

1Au a tagi vua na Kalou e na domoqu,

io, vua na Kalou e na domoqu; ka sa vaqara daligana vei au.

2E na siga ka'u a rarawa kina ka'u a qarai Jiova;

sa dodo tu na ligaqu e na bogi, ka sega ni cegu;

sa bese ni vakacegui na yaloqu.

3Au a nanuma na Kalou, ka'u sa mani rarawa;

au a vakanananu, ka sa luvu na lomaqu. Sela

4Ko ni sa bureitaka vei au na moce;

sa rarawa na yaloqu ka'u sa sega kina ni vosa rawa.

5Au sa vakanananu ki na gauna makawa,

kei na veiyabaki makawa sara.

6Au a nanuma na noqu sere e na bogi;

au sa vakanananu e lomaqu ka sa vakatarotaroga na yaloqu:

7“Ena biuti au laivi beka na Turaga ka sega ni mudu,

ena sega beka ni yalololoma tale?

8Sa takali laivi beka na nona loloma ka sega ni mudu?

Sa na sega beka ni yaco tale na nona vosa ni yalayala?

9Sa guilecava beka nai valavala loloma na Kalou?

Sa vakadaroya beka na nona yalololoma levu ni sa cudru?” Sela

10Au a qai kaya, “Oqo na noqu rarawa

ni sa veisau na liga i matau i Koya sa Cecere Sara.”

11Au na nanuma na cakacaka i Jiova;

io, au na nanuma na nomuni cakacaka mana mai liu.

12Au na veinanuyaka talega na nomuni cakacaka kecega,

ka veivosakitaka na nomuni valavala.

13A nomuni valavala, na Kalou, na ka savasava.

O cei na Kalou levu me vakataki koya na noda Kalou?

14Sai kemuni na Kalou sa caka mana tiko;

o ni sa vakatakila oti na nomuni kaukauwa e na kedra maliwa na tamata.

15O ni sa vakabulai ira na nomuni tamata e na ligamuni,

ia ko ira na luve i Jekope kei Josefa. Sela

16Sa kunei kemuni na Kalou, na wai,

sa kunei kemuni na wai, ka sa rere;

io, sa kidroa talega na wai titobu.

17Sa livia yani na wai na o;

sa rorogo ko lomalagi;

io, sa lako voli yani na nomuni gasau.

18A domo ni nomuni kurukuru sa rogo e na covulaca;

sa vakararamataki vuravura na livaliva;

sa sautaninini ka tavuki ko vuravura.

19A nomuni sala sa koto e na wasawasa,

kei na nomuni salatu e na wai levu;

ka sa sega ni kilai na we ni yavamuni.

20O ni a tuberi ira na nomuni tamata me vaka na qele ni sipi

e na liga i Mosese kei Eroni.