Isikeli 34 - Ai Vola Tabu (Vakadewa Makawa Vakavoutaki 2021)（FRV21）

Ko Ira nai Vakatawa Ca ni Isireli

1Sa yaco vei au na vosa i Jiova, ka vaka:

2“Ko iko na luve ni tamata, mo parofisaitaka na ca vei ira—na nodra i vakatawa na Isireli: Sa kaya vakaoqo na Turaga ko Jiova vei ira nai vakatawa: Ena ca ko ira na nodra i vakatawa na Isireli era sa vakani ira ga vakataki ira! Sa sega li ni dodonu me ra vakania na qele ni sipi ko ira nai vakatawa?

3Dou sa kania na uro, kei na vutika ni sipi dou sa vakasulumi kemudou kina, dou sa vakamatea na sipi sa vakani; ia dou sa sega ni vakania na qele ni sipi.

4Dou sa sega ni vakaukauwataka na sipi sa malumalumu, ka dou sa sega ni vakabula na ka sa tauvi mate, ka dou sa sega ni vauca na ka sa ramusu, ka dou sa sega ni vakauta tale mai na ka sa vakasevi, ka dou sa sega ni vakasaqara na ka sa yali; ia dou sa lewai ira ga e na yalokaukauwa kei na lomaqa.

5Tiko 27.17; 1Tui 22.17; Maciu 9.36; Mari 6.34A ra sa dui vakasevi tani, e na vuku ni sa sega nai vakatawa; ka sa kani ira na manumanu kecega ni vanua, ni ra vakasevi tani.

6Era sa lako sese voli na noqu sipi ki na veiulunivanua kecega, kei na dela-ni-koro kecega. Io, era sa dui veiseyaki na noqu qele ni sipi, e dela i vuravura taucoko, ka sa sega e dua sa taroga se vakasaqarai ira.

7“O koya oqo, koi kemudou nai vakatawa, dou rogoca kina na vosa i Jiova:

8Me vaka na dina ni noqu bula, sa kaya na Turaga ko Jiova, ni sa tokitaki na noqu qele ni sipi, ka sa yaco me kedra kakana na manumanu kecega ni vanua, ni sa sega e dua nai vakatawa, ni ra sa sega ni vakasaqara na noqu sipi ko ira na noqu i vakatawa, ka ra sa vakani ira vakataki ira ga nai vakatawa, ia era sa sega ni vakania na noqu sipi;

9o koya oqo, koi kemudou nai vakatawa, dou rogoca kina na vosa i Jiova;

10sa kaya vakaoqo na Turaga ko Jiova, Raica, koi au sa qai veimecaki kei ira nai vakatawa, ia ka'u na taroga na noqu sipi vei ira, ka muduki ira me ra kakua ni vakania tiko na sipi; me ra kakua talega ni vakani ira tiko vakataki ira nai vakatawa; ni'u na kaliraka na noqu qele ni sipi mai na gusudra, me kakua ni kedra kakana.

Na Kalou, nai Vakatawa Dina ka Dodonu

11Ni sa kaya vakaoqo na Turaga ko Jiova: Raica, koi au, io koi au, ka'u na taroga na noqu sipi, ka vakasaqarai ira.

12Me vaka sa vakasaqara na nona qele ni sipi nai vakatawa e na siga sa tiko kina e na kedra maliwa na nona sipi sa veiseyaki, au na vakasaqara vakakina na noqu qele ni sipi. Au na kaliraki ira mai na veiyasana kecega era sa dui veiseyaki kina e na siga loaloa ka butobuto.

13Ia ka'u na kauti ira tani mai vei ira na veimataqali, ka vakasoqoni ira mai na veivanua, ka kauti ira ki na nodra vanua, ka vakani ira e na veiulunivanua i Isireli e na bati ni uciwai, kei nai tikotiko kece ni vanua.

14Ka'u na vakani ira e na vanua veico vinaka, e na veiulunivanua cecere talega i Isireli ena tu kina na kedra bai. Era na davo no mai kea e na lomanibai vinaka, ia era na kana voli e na vanua veico bulabula e na dela ni veiulunivanua ni Isireli.

15Oi au, ka'u na vakania na noqu qele ni sipi, io koi au, ka'u na vakadavori ira tiko, sa kaya na Turaga ko Jiova.

16Ka'u na vakasaqara oqori sa yali, ka vakauta tale mai oqori sa vakasevi, ka'u na vauca oqori sa ramusu, ka'u na vakaukauwataka oqori sa malumalumu, ia ka'u na vakarusa oqori sa dro ka kaukauwa. Ka'u na vakani ira e na cudru.

17“Ia koi kemudou, na noqu qele ni sipi, sa kaya na Turaga ko Jiova; Raica, au na vakataulewataka na sipi eso kei na sipi eso, kei na sipi tagane kei na me tagane.

18E ka lailai beka vei kemudou ni dou sa kania oti na veico vinaka, ia na vo ni nomudou vanua veico dou sa buturaka li e na yavamudou? Ka gunuva talega na kena wai makare, ia mo dou sa vakavuvuya li na kena vo e na yavamudou?

19Ka dodonu li vei ira na noqu qele ni sipi me ra kania na ka dou sa butuka e na yavamudou, ka gunuva na ka dou sa vakavuvuya e na yavamudou?

20“O koya oqo sa kaya kina na Turaga ko Jiova vei ira: Raica, koi au, io koi au, ka'u na vakataulewataka na sipi uro kei na sipi suivotu.

21Ka ni dou sa ia na veibiliyaki e na sarisarimudou, kei na tabamudou, ka culai ira kece era tauvi mate e na nomudou i leu, ka dou sa dui vakasevi ira mada kina;

22o koya oqo ka'u na vakabulai ira kina na noqu qele ni sipi, ka ra na sega ni tokitaki tale; ia ka'u na vakataulewataka na sipi eso kei na sipi eso.

23Vtaki 7.17Ia ka'u na lesia e dua me nodra i vakatawa, ia ena vakani ira ko koya, io, na noqu tamata ko Tevita; ena vakani ira ko koya, ena lesi talega ko koya me nodra i vakatawa.

24Isi 37.24Ia koi au ko Jiova ka'u na yaco me'u nodra Kalou, ka sa na nodra Turaga na noqu tamata ko Tevita; koi au ko Jiova ka'u sa cavuta.

Na Veiyalayalati ni Veivinakati i Jiova

25“Ia ka'u na ia vata kei ira e dua na veiyalayalati ni veivinakati, ka vakaotia tani na manumanu ca e na vanua, ka ra na tiko vinaka kina mai na vanua lala, ka moce e na veikau.

26Ia ka'u na vakayacori ira kei na veiyasana sa tiko volita na noqu ulu-ni-koro me ka ni veivakalougatataki; au na vakatauca talega na uca e na kena gauna; ena tau mai na uca ni veivakalougatataki.

27Na kau talega ni vanua ena vuataka na vuana, ia ko vuravura ena vuataka na kena vuata, ka ra na tiko vinaka e na nodra vanua, ka ra na kila ni sai au ko Jiova, ni'u sa cavuka nai vau ni kedrai vua, ka kaliraki ira mai na ligadra era a vakabobulataki ira.

28Ka ra na sega ni yaco tale me nodra i toki-ni-valu na veimatanitu, a manumanu talega ni vanua ena sega ni kani ira; era na tiko vinaka ga, ka na sega e dua me vakarerei ira.

29Ia ka'u na vakatubura e dua na nodra coke sa na rogo, ka ra na sega ni takali tani tale e na vuku ni sa dausiga na vanua, se vakamaduataki tale vei ira na veimatanitu.

30Ka ra na kila kina ni sai au ko Jiova na nodra Kalou ka'u sa tiko vata kei ira, ka ni ra sa noqu talega, ko ira na vale i Isireli, sa kaya na Turaga ko Jiova.

31Ia koi kemudou na noqu qele ni sipi, na sipi ni noqu vanua veico, dou sa tamata ga, ia koi au, au sa nomudou Kalou, sa kaya na Turaga ko Jiova.”