Aisea 21 - Ai Vola Tabu (Vakadewa Makawa Vakavoutaki 2021)（FRV21）

Na Raivotu me Baleta na Bale Sobu nei Papiloni

1Na vosa ni parofisai bibi me baleta na lala ni waitui.

Me vaka sa lako sara mai na covulaca mai na ceva,

sa lako vakakina na ca mai na vanua dravuisiga,

mai na vanua rerevaki.

2A raivotu rarawa sa vakavotui mai vei au;

sa butako na daubutako,

ka sa vakacaca na dauvakacaca.

Ko iko Ilama, mo lako cake,

ko iko Mitia, mo la'ki kaba;

a nona dauveivakararawataki kecega

ka'u sa muduka.

3O koya sa yaluma kina na toloqu;

sa tauvi au na rarawa,

me vaka na yaluma vua na yalewa sa taratara;

ni'u sa rogoca, ka'u sa sautaribariba kina;

ni'u sa raica, ka'u sa taqaya.

4Sa sese na yaloqu, sa kidaci au na rere;

a bogi ni noqu marau sa vukica ko koya

me'u rise kete kina.

5Era sa vakarautaka na tepeli,

era lesia nai vakatawa,

era sa kana, era sa gunu.

Dou tucake, na turaga-ni-valu,

dou lumuta nai sasabai!

6Ni sa kaya vei au ko Jiova,

“Mo la'ki lesia e dua nai vakatawa;

me tukuna mai ko koya na ka sa raica;

7Ni sa kunea ko koya e dua na mataivalu sa vodo tu e na ose,

kei na asa, kei na kameli, ka ra yayarua lako;

me qai vakarorogo sara ko koya.”

8A sa kaci mai ko koya nai vakatawa:

“Noqu turaga, ka'u sa tu ga e na noqu i tutu e na siga ka bogi,

ka'u sa vakatawa tu ga e na bogi ka siga.

9 Vtaki 14.8; 18.2 Ka raica, sa lako mai oqo e dua na mataivalu

sa vodo tu, ka yayarua lako.”

A sa vosa mai ko koya, ka kaya,

“Sa bale, sa bale, ko Papiloni;

ia na matakau ceuceu kece ni nona kalou

sa basuraka sobu ki na qele ko koya.”

10Ulei na noqu tamata ka dausamuti,

kei na sila ni noqu rara ni samu sila,

na ka ka'u sa rogoca mai vei Jiova-ni-lewevuqa, na Kalou ni Isireli,

ka'u sa tukuna yani vei kemudou.

Ai Tukutuku me Baleti Tuma

11Na vosa ni parofisai bibi kei Tuma.

Sa kaci mai vei au e dua mai Sia,

ka kaya, “Nai vakatawa, sa vakaevei na bogi?

Nai vakatawa sa vakaevei na bogi?”

12Sa kaya mai nai vakatawa,

“Sa kida mai na mataka, sa toro talega mai na bogi.

Kevaka dou sa via taroga, dou taroga ga;

dou lesu tale mai.”

Ai Tukutuku me Baleti Arapea

13Na vosa ni parofisai bibi kei Arapea.

Dou na vakaicili ga mai na veikau ni Arapea,

koi kemudou nai vavakoso ni Tetanimi sa lako tu.

14Ko ira na lewe-ni-vanua ko Tima

era sa kauta na wai ki vei koya sa viagunu,

Era sa tavaki ira era sa dro

ka solia vei ira na kedra madrai.

15Ni ra sa dro mai nai seleiwau,

mai nai seleiwau sa ucuni tu,

kei na dakai sa loka tu,

kei na kena rarawa ni valu kaukauwa.

16Ni sa vosa vakaoqo vei au na Turaga, “Me dua tale na yabaki, me vaka na yabaki ni tamata voli, ena qai oti sara na nodra lagilagi kecega ko Kitari;

17ia na kena vo ni tamata dauvanavana, na qaqa ni Kitari, ena lewe lailai mai, ni sa kaya vakakina ko Jiova na Kalou ni Isireli.”