Tiko mai na Lekutu 8 - Ai Vola Tabu (Vakadewa Makawa Vakavoutaki 2021)（FRV21）

Nai Valavala ni Tutuvaki ni Cina

1 Lako 25.31-40; 37.17-24 A sa kaya vei Mosese ko Jiova,

2“Mo kaya vei Eroni, ka vaka: Ni ko sa tutuvaka na veicina, ena cinava na yasana sa qarava nai tutu-ni-cina na cina e vitu.”

3A sa kitaka vakakina ko Eroni; sa tutuvaka na veicina ki na yasana sa qarava nai tutu-ni-cina, me vaka ka vakarota vei Mosese ko Jiova.

4Ia nai tutu-ni-cina sa caka e na koula sa lautuki; na tolona, kei na sena, sa tukilaki. Me vaka nai vakatakarakara sa vakatakila vei Mosese ko Jiova, sa cakava oti vakakina nai tutu-ni-cina ko koya.

Nodra Vakasavasavataki kei na Cabori na Livai

5A sa kaya vei Mosese Ko Jiova,

6“Mo kauti ira na Livai mai vei ira na Isireli, ka vakasavasavataki ira.

7Ia mo cakava vakaoqo mo vakasavasavataki ira kina. Mo kureitaka vei ira na wai ni veivakasavasavataki, ia me ra tasia na yagodra taucoko, ka savata na nodra i sulu, ka vakasavasavataki ira kina.

8Me ra qai kauta e dua na bulumakau sa gone, kei na kenai madrali laukana, io na madrai droka vinaka sa veiwaki vata kei na waiwai, ia mo kauta e dua tale na bulumakau sa gone mei soro ni valavala ca.

9Mo qai kauti ira na Livai ki na mata ni vale ni veitavaki, ka vakasoqoni ira vata nai soqosoqo taucoko ni Isireli.

10Ia mo qai kauti ira na Livai ki na mata i Jiova, ia me ra tabaki ira na Livai e na ligadra ko ira na Isireli,

11me qai soli ira na Livai ko Eroni me vaka nai soro sa yalovaki e na mata i Jiova, mai vei ira na Isireli, me ra qarava na cakacaka i Jiova.

12Me ra qai tabaka na uludrau na bulumakau e na ligadra ko ira na Livai, mo qai cabora e dua mei soro ni valavala ca, kei na kenai karua mei soro kama, vei Jiova, me sorovaki ira kina na Livai.

13“Mo qai vakaturi ira na Livai e na mata i Eroni, kei na matadrau na luvena, ka soli ira me vaka nai soro sa yalovaki vei Jiova.

14Ia mo tawasei ira na Livai mai vei ira na Isireli, era na noqu kina na Livai.

15Ka oti, me ra qai curu na Livai me ra kitaka na cakacaka ni vale ni veitavaki, ia mo vakasavasavataki ira, ka soli ira me vaka nai soro sa yalovaki.

16Ni ra sa soli sara vei au mai vei ira na Isireli; me kedrai sosomi na ulumatua kecega, io na ulumatua kecega ni Isireli, ka'u sa kauti ira me noqu.

17Lako 13.2Ni sa noqu na ulumatua kecega ni Isireli, na tamata kei na manumanu e yavai va. Au a vakatabui ira me noqu, e na siga ka'u a yaviti ira kecega kina na ulumatua ni vanua ko Ijipita,

18ia ka'u sa kauti ira na Livai me kedrai sosomi na ulumatua kecega ni Isireli.

19Ia ka'u sa soli ira na Livai mai vei ira na Isireli, mei solisoli vei Eroni kei ira na luvena, me ra kitaka na nodra cakacaka na Isireli e na vale ni veitavaki, ka me ra sorovaki ira na Isireli, me kakua kina ni cudruvi ko ira na Isireli, ni ra sa torova na tikina tabu.”

20Ia ko Mosese kei Eroni kei nai soqosoqo taucoko ni Isireli, era a kitaka vei ira na Livai me vaka na ka kecega sa vakarota ko Jiova vei Mosese e na vukudra na Livai; era sa cakacaka vakakina vei ira ko ira na Isireli.

21A ra sa vakasavasavataki ira na Livai, a ra sa savata na nodra i sulu; a sa soli ira ko Eroni me vaka nai soro sa yalovaki e na mata i Jiova; a sa sorovaki ira ko Eroni me vakasavasavataki ira.

22Ka oti, era sa qai curu na Livai me ra kitaka na nodra cakacaka e na vale ni veitavaki e matai Eroni, e matadrau talega na luvena. Me vaka ka vakarota ko Jiova vei Mosese e na vukudra na Livai, era sa kitaka vakakina vei ira.

23A sa kaya vei Mosese ko Jiova,

24“Oqo sa lesi e na vukudra na Livai: ni sa ruasagavulu ka lima na nodra yabaki ka levu cake, ena qai vakatekivu na nodra cakacaka e na vale ni veitavaki.

25Ia ni sa limasagavulu na nodra yabaki, era na cegu mai na cakacaka oqo, ka sega ni cakacaka tale.

26Ia era na veivuke vata kei ira na wekadra me ra vakatawa e na vale ni veitavaki, ia me ra kakua ni cakacaka. Mo lewa vakaoqo vei ira na Livai e na vuku ni nodra i tavi.”