Jope 35 - Ai Vola Tabu (Vakadewa Makawa Vakavoutaki 2021)（FRV21）

Sa Vosataka ko Ilaiu na Bula ni Vakadonui Koya Vakataki Koya

1Sa ia tiko na vosa ko Ilaiu, ka kaya:

2“Ko sa nanuma beka ni sa ka dodonu oqo?

Ko sa kaya, ‘Au sa yalododonu ga e na mata ni Kalou’,

3ni ko sa taroga, ‘A cava na kena yaga vei au?

A cava na betena vei au ke sa sega vei au nai valavala ca?’

4Au na sauma vei iko

kei iratou talega na nomu i tokani ka tiko vata kei iko.

5Mo ta cake mada ki na lomalagi, ka raica;

ka vakaraica na o sa cecere cake vei iko.

6 Jope 22.2,3 Kevaka ko sai valavala ca, a cava ko sa cakava vua?

Ia kevaka sa vakalevutaki na nomu talaidredre, a cava ko sa kitaka vua?

7Kevaka ko sa caka dodonu, a cava ko sa solia vua;

se cava sa rawata mai vei iko ko koya?

8Na nomu i valavala ca ena vakamawe ki na mataqali tamata me vakataki iko,

kei na nomu caka dodonu, kivei ira na tamata tale eso.

9“Ni sa levu na veivakasaurarataki, era sa tagi kina ko ira era sa vakasaurarataki;

era sa qoqolou e na vuku ni ligadra na kaukauwa.

10Ia sa sega e dua sa kaya, ‘Sa evei na Kalou na noqu Dauveibuli,

ko koya sa solia na kaukauwa e na bogi,

11ko koya sa vakavulici keda vakalevu, ka vakavulici ira vakalailai na manumanu ni vanua,

ka sa vakayacori keda me da vuku cake vei ira na manumanu vuka?’

12Era sa tagi mai kea, ka sa sega ni sauma ko koya,

e na vuku ni nodra viavialevu na tamata ca.

13E dina sara ni sa sega ni vakarogoca na tagi wale na Kalou,

ka sa sega talega ni goleva ko Koya sa Kaukauwa.

14Ka vakaevei ni ko sa kaya ni ko sa sega ni kunei koya rawa,

ka ni sa tiko ga vua na lewa dodonu, ka ko sa waraki koya tiko!

15Ia oqo, ni sa sega ni dauveitotogitaki na nona cudru,

ka sa sega ni dau via kila nai valavala ca,

16sa dalaga kina ko Jope e na vosa wale,

ka sa vakalevutaka na vosa sa sega ni vuku.”