Osea 1 - Ai Vola Tabu (Vakadewa Makawa Vakavoutaki 2021)（FRV21）

1 2Tui 14.23—15.7; 15.32—16.20; 18.1—20.21; 2Vei 26.1—27.8; 28.1—32.33 A vosa i Jiova sa yaco vei Osea na luve i Pieri, e na gauna i Usaia, kei Jocame, kei Easi, kei Esekaia, ko iratou na tui Juta, kei na gauna i Jeropoama na luve i Joasa, na tui Isireli.

Na Vuvale i Osea

2Oqo nai vakatekivu ni vosa i Jiova vei Osea. Sa kaya ko Jiova vei Osea, “Mo la'ki kauta e dua na yalewa dautagane me watimu, kei iratou na luve ni butako me luvemu: ni sa dautagane vakalevu na lewe-ni-vanua, ka ni ra sa vuki tani vei Jiova.”

3A sa lako ko koya ka kauti Komera na luve i Tipileimi; a sa kunekune ko koya, ka vakasucuma e dua na luvena tagane.

42Tui 10.11A sa kaya vua ko Jiova, “Mo vakayacani koya ko Jesireli; ni sa vo vakalailai, ka'u na qai cudruvaka na dra i Jesireli ki na vale i Jeu, ka vakaotia na matanitu ni vale i Isireli.

5Ia ena yaco e na siga ko ya, ka'u na musuka na dakai i Isireli e na buca ko Jesireli.”

6A sa kunekune tale ko koya, ka vakasucuma e dua na luvena yalewa. A sa kaya vua ko Koya, “Mo vakayacani koya ko Lo-ruama, ni'u na sega ni lomani ira tale na vale i Isireli se vosoti ira.

7Ia ka'u na lomani ira na vale i Juta, ka vakabulai ira e na liga i Jiova na nodra Kalou, ia ka'u na sega ni vakabulai ira e na dakai, se nai seleiwau, se nai valu, se na ose, se vei ira era dauvodo ose.”

8Ia ni sa kali Lo-ruama ko koya, sa qai kunekune tale, ka sa vakasucuma e dua na luvena tagane.

9A sa kaya ko Jiova, “Mo vakayacani koya ko Lo-ami, ni dou sa sega ni noqu tamata, ia koi au ka'u sa sega talega ni nomudou Kalou.”

Sa Vakalesui ka Vakacokotaki Tale ko Isireli

10 Roma 9.26 Ia na kedrai wiliwili na Isireli ena vaka na mata ni nuku ni waitui, sa sega ni vakarautaki se wili rawa; ia ena yaco, e na yasana ka kainaki kina vei ira, “Dou sa sega ni noqu tamata,” ena kainaki kina vei ira, “Dou sa luve ni Kalou bula.”

11Era na qai soqoni vata na Juta kei na Isireli, ka ra na lesia e dua me liutaki ira, ka ra na lako cake mai na vanua, ni na levu na siga i Jesireli.