Roma 11 - Ai Vola Tabu (Vakadewa Makawa Vakavoutaki 2021)（FRV21）

1 Fpai 3.5 Au sa qai taroga, Sa biuta tani na nona tamata na Kalou, se segai? E segai sara. Oi au na luve i Isireli, a kawa i Eparaama, mai na yavusa i Penijamini.

2Sa sega ni biuta na nona tamata na Kalou, o ira sa kila eliu ko koya. Dou sa sega li ni kila na ka sa kaya nai Vola Tabu ni sa tukuni Ilaijia? Ni sa beitaki ira na Isireli ko koya vua na Kalou, a sa kaya,

31Tui 19.10,14“I Jiova, era sa vakamatei ira na nomuni parofita, a ra sa kelirukuta sobu na nomuni veicabocabo-ni-soro; ia koi au duaduaga, au sa bula, ka ra sa qarai au me'u mate?”

41Tui 19.18Ia ka cava sa kaya vua na vosa ni Kalou? “Au sa maroroya me noqu e le vitu na udolu na tamata, era sa sega ni tekiduru vei Peali.”

5Sa vaka talega kina e na gauna oqo, sa tu ga na kena vo era sa digitaki e na loloma.

6Ia kevaka sa ka-ni-loloma, sa qai sega ni ka-ni-cakacaka; ke sa sega ni vakaoqo, sa sega ni loloma na loloma.

7Sa qai vakaevei? Sa sega ni rawata na ka era sa vakasaqara ko ira na Isireli. Ko ira na digitaki era sa rawata, ia sa vakadomoqataki na kena vo,

8Vrua 29.4; Aisea 29.10me vaka na ka sa volai,

“Sa solia vei ira na Kalou na yalo sa daumoce,

na mata sa sega ni rai rawa,

kei na daliga sa sega ni rogo rawa,

ka yacova na siga oqo.”

9 Same 69.22,23 Sa kaya talega ko Tevita,

“Me yaco na nodra tepeli me kedrai cori kei na tudai,

kei na ka me ra tarabe kina, me kedrai sau talega ni ca;

10me vakabutobutotaki na matadra me ra kakua kina ni rai rawa,

ka mo vakalairorotaka tikoga na dakudra.”

Na Vakabulai ni Kai Matanitu Tani

11Au sa qai taroga, Era sa tarabe me ra bale sara, se segai? E segai sara! Ia e na nodra bale, sa rawa na bula vei ira na veimatanitu tani, me vakavuvutaki ira.

12Ia kevaka sa vutuniyau mai ko vuravura e na vuku ni nodra bale, ka sa vutuniyau mai na veimatanitu tani ni sa vakalailaitaki ko ira oqori; ena qai vakaevei ni ra sa vakalevui mai?

13Au sa qai vosa oqo vei kemudou na kai matanitu tani. Me vaka ni'u sa nodra i apositolo na veimatanitu tani, au sa doka na cakacaka ka'u sa lesi kina,

14de ka'u vakavuvutaki ira na wekaqu vakayago, ka me'u vakabulai ira kina eso.

15Ia kevaka sa vakaduavatataki mai ko vuravura ni sa biu tani ko ira oqori, ena sega li ni vaka na bula mai na mate na nodra lomani tale?

16Ia kevaka sa savasava nai sevu, ena vaka talega kina na kena taucoko; ia kevaka sa savasava na vuna, ena vaka talega kina na veitabana.

17Ia kevaka sa musuki laivi eso na tabana ia ko iko, na taba ni olive ni veikau, sa mai sema vata kei ira, mo bula vata kei ira e na vu ni olive sa uro;

18mo kakua ni vakalevulevui iko cake vei ira na tabana dina. Ia kevaka ko sa vakalevulevui iko, sa sega ni bula na vuna e na vukumu, o iko ga sa bula e na vuku ni vuna.

19O na qai kaya, “Sa musuki laivi na veitabana dina, me'u sema kina.”

20E dina; sa musuki laivi ko ira ni ra sa sega ni vakabuta, ia ko iko ko sa tudei ga ni ko sa vakabauta. Kakua ni yalolevu, mo rere ga.

21Kevaka sa sega ni vosota na veitabana dina na Kalou, de qai sega talega ni vosoti iko.

22O koya mo qai raica ruarua, na loloma kei na cudru ni Kalou: a cudru vei ira sa bale, ia na yalovinaka ni Kalou vei iko, kevaka ko sa tudei e na nona yalovinaka; ia kevaka e segai ko na musuki laivi talega ko iko.

23O ira talega na Isireli, kevaka era sa sega ni tawa vakabauta tiko, era na semati lesu, ni sa rawa vua na Kalou me semati ira tale.

24Ia kevaka ko sa musuki mai na olive sa ka ga ni veikau, ia ko sa sema vata kei na olive vinaka drau sa sega ni tovo vata kaya, ena qai rawarawa cake, me sema vata kei na nodra vu ni olive dina ko ira sai tovo vata kaya.

Ko Ira Kece na Isireli e na Vakabulai

25Ni'u sa sega ni vinakata, na veiwekani, mo dou lecava na ka vuni oqo, de dou vakasami kemudou ni dou sa vuku: ni ra sa yaco na Isireli eso me ra domoqa, ka malua me curu mada na lewe vuqa mai vei ira na veimatanitu tani.

26Aisea 59.20,21Ia sa vakaoqo, era na vakabulai ko ira kecega na Isireli; me vaka na ka sa volai,

“Ena lako mai Saioni ko koya nai Vakabula;

ka na kauta tani nai valavala ca mai vei ira na Jekope.”

27 Aisea 27.9 “Ia sa noqu veiyalayalati oqo vei ira,

ni'u sa kauta tani na nodra i valavala ca.”

28E nai tukutuku-vinaka, era sa veimecaki ko ira e na vukumudou. Ia e nai lesilesi ga, era sa vinakati e na vukudra na qase.

29Ni sa sega ni veivutuni tale na Kalou e na vuku ni nona i solisoli se nona kacivi ira.

30Me vaka ni dou a sega ni vakabauta na Kalou eliu, a sa qai yaco vei kemudou na loloma e na vuku ni nodra vakatitiqa,

31sa na vaka talega kina ko ira era sa sega ni vakabauta e na vuku ni sa yaco vei kemudou na loloma me yaco kina vei ira talega na loloma.

32Ni sa sogolati ira vata na Kalou e na vakatitiqa, me yalololoma kina ko koya vei ira kecega.

33 Aisea 55.8 A ka vakaidina na kena titobu ni nona vutu ni vuku kei na nona yalomatua na Kalou! Sa sega ni kilai rawa na nona lewa ka sa sega ni kune na nona i valavala!

34 Aisea 40.13 “O cei sa kila na loma ni Turaga?”

Se ko cei sa nona i vakavuvuli?

35 Jope 41.11 “Se ko cei sa solia mada vua,

me na qai saumi tale vua?”

36 1Kori 8.6 Ni sa vu mai vua na ka kecega, e na vukuna talega, ka me nona talega. Me vakarokorokotaki ko koya ka sega ni mudu. Emeni.