Sere i Solomoni 2 - Ai Vola Tabu (Vakadewa Makawa Vakavoutaki 2021)（FRV21）

1Koi au na rosi ni Saroni,

kei na viavia ni buca.

Tagane

2Me vaka na viavia e na maliwa ni soni,

sa vakakina na wekaqu e na kedra maliwa na goneyalewa.

Yalewa

3Me vaka na moli e na loma ni dua na kau ni veikau,

sa vakakina ko koya ka'u sa lomana e na kedra maliwa na gonetagane.

Au a marau ni'u a tiko sobu e na yaloyalona,

ka sa kamikamica na vuana ki na gusuqu.

4Sa kauti au ko koya ki na nona vale ni waini,

ia na nona kuila sa vakarurugi au na loloma.

5Dou vakaukauwataki au e na keke vua-ni-vaini,

vakacegui au e na moli;

ni'u sa mateca na loloma.

6A ligana i mawi sa no e ruku ni uluqu,

ka sa mokoti au na ligana i matau.

7Au sa vakaroti kemudou, na goneyalewa ni Jerusalemi,

e na vuku ni me kila, kei na dia yalewa ni veico;

mo dou kakua ni yavalata, se vakayadrati koya ka'u sa lomana,

me yacova ni sa vakarau!

Yalewa

8A domo i koya ka'u sa lomana!

Raica, sa lako mai,

sa rika mai ko koya mai na tokaitua,

ka ladelade mai e dela ni koro.

9O koya ka'u sa lomana sa vaka na kaseli,

se na dia tagane sa gone.

Raica, sa tu mai na daku ni nodatou bai,

sa vakararai mai ki na katuba,

sa vakaraitaki koya mai e nai sogo cicila.

10Sa vosa mai ko koya ka'u sa lomana, ka kaya vei au.

Tagane

“Mo cavu tu, na wekaqu, na noqu ka matavinaka,

ka lako mai.

11Raica, sa oti yani na vula i liliwa,

sa mudu na uca ka sa lako tani.

12Sa qai rairai mai na senikau e na vanua;

sa qai yaco na kena vula sa tagi kina na manumanu vuka,

ia na domo ni ruve

sa qai rogo tu e na noda vanua.

13Na vuni lolo sa vuataka mai na vuana vou,

kei na vaini kei na vuana vou;

sa boi vinaka mai.

Mo cavu tu, na wekaqu, na noqu ka matavinaka,

ka lako mai.

14O iko noqu ruve, ka sa tiko e na qara ni uluvatu,

e na yasana vuni ni cabecabe,

me'u raica mada na matamu,

me'u rogoca mada na domomu;

ni ko sa domo vinaka,

ka vatukai vinaka na matamu.

15Dou toboka mai na fokisi,

na fokisi lalai,

sa vakacacana na veivaini—

ni sa lavouvou tu na noda veivaini.”

Yalewa

16Sa noqu ko koya ka'u sa lomana, koi au talega au sa nona ga;

sa vakania na nona qele ni sipi e loma ni viavia.

17Me yacova na kida ni mataka

ka seavu yani na malamalawa,

mo ni lesu mai, koi kemuni ka'u sa lomana, io mo ni vaka na me kila

se na luve ni dia e na Ulunivanua ko Peceri.