Lele i Jeremaia 1 - Ai Vola Tabu (Vakadewa Makawa Vakavoutaki 2021)（FRV21）

Na Tagi ni Vutugu i Jerusalemi

1Isa na kena tiko duadua na koro,

ka oso e na tamata!

Na kena yaco me tautauvata kei na yada,

ko koya ka levu cake vei ira na veimatanitu!

O koya ka marama e na veivanua

sa qai yaco me koro qali!

2Sa tagi vakalevu ko koya e na bogi,

sa tiko ga e baluna na wai ni matana;

sa sega e dua vei ira kecega na wekana

me vakacegui koya;

ko ira kece na nona i tokani era sa lawakitaki koya,

era sa vuki tale me nona meca.

3Sa kau tani vakabobula ko Juta e na vuku ni valavala kaukauwa,

ka ni sa levu na veivakasaurarataki;

sa tiko ga ko koya e na veimatanitu,

sa sega ni kunea na vakacegu;

ko ira kece era vakasavi koya

era sa vauci koya e na yasana qiqo.

4Sa tagi na sala ki Saioni,

ni sa sega e dua sa lako mai ki na nona solevu tabu;

a nona matamata-ni-koro kecega sa lala,

ko ira na nona bete era sa vutugu;

ko ira na nona goneyalewa era sa lolosi,

io sa rarawa vakalevu sara ko koya.

5Ko ira sa vakacacani koya era sa liu,

ko ira na nona meca era sa tiko vinaka;

ni sa vakararawataki koya ko Jiova

e na vuku ni nona cala sa vuqa;

ko ira na nona gone lalai,

era sa kauta tani vakabobula ko ira na meca.

6A sa takali vua na goneyalewa ni Saioni

na nona totoka kecega.

Ko ira na nona turaga era sa vaka na dia

sa sega ni kunea rawa na vanua veico;

a ra sa lako tu ga ka sega na nodra kaukauwa

e na mata i koya sa vakasava.

7Sa nanuma ko Jerusalemi,

e na gauna ni nona rarawa kei na nona tiko sese,

na nona ka domoni kecega

ka tu vua eliu.

Ni ra sa tauri na nona tamata e ligana na dauvakacaca,

ka sa sega e totaki koya,

ni ra raici koya ko ira na meca,

era sa dredrevaka na nona Siga ni Vakacecegu.

8Sai valavala ca vakalevu ko Jerusalemi,

o koya oqo sa vakasesei kina;

ko ira kece ka dokai koya eliu era sa qai beci koya,

ni ra sa raica na nona luvawale;

io, sa vutugu ko koya,

a sa vuki vakanadaku.

9A nona dukadukali sa tauva na bele ni nona i sulu;

sa sega ni nanuma ko koya na nona i cavacava;

o koya oqo sa ka ni veivakidacalataki na nona lako sobu,

ka sa sega e dua me vakacegui koya.

“Mo ni raica, Jiova, na noqu rarawa,

ni sa vakalevulevui koya na meca!”

10Sa dodoka na ligana na meca,

me taura na nona ka domoni kecega;

ni sa raici ira na veimatanitu ko koya

ni ra sa curu ki na nona vale tabu,

io ko ira ko a vakatabuya

me ra kakua ni curu ki na nomuni soqosoqo.

11Ko ira kece na nona tamata era sa vutugu,

era sa qara na kedra;

era sa solia na nodra ka domoni mei voli ni kakana

me vakabulabulataka mai na yalodra.

“Mo ni raica, Jiova, ka vakananuma;

ni'u sa velavela mai.”

12“Sa ka wale beka vei kemudou,

koi kemudou kece sa lako voli yani?

Dou mai raica, ka kila se dua na rarawa,

sa vaka na noqu rarawa sa caka vei au,

ni sa qai vakararawataki au ko Jiova

e na siga ni nona cudru katakata.

13“Sa tala mai cake ko koya na bukawaqa ki na suiqu,

a sa gumatua kina;

sa tevuka na lawa me rawa na yavaqu;

sa vakalesui au ki muri;

sa lewa vei au me'u tiko taudua,

me sa bibi na lomaqu e na veisiga.

14“Sa vauca na noqu talaidredre me dua nai vua me colati;

e na ligana ka sa tobea vata kina;

sa viribale ki domoqu,

sa domica na noqu kaukauwa;

sa soli au ko Jiova ki na ligadra

ko ira au sa sega ni vorata rawa.

15“Sa vakawaletaka ko koya na Turaga

na noqu tamata qaqa kecega era tiko vei au;

sa kaciva nai vavakoso vei au ko koya,

me mai voroki ira na noqu cauravou;

sa butuqaqia na Turaga na goneyalewa ni Juta

me vaka nai keli-waini.

16“E na vuku ni ka oqo ka'u sa tagi kina;

mai na mataqu, io mai na mataqu sa dave sobu na wai;

ni sa yawa vei au ko koya na dauveivakacegui,

me na vakabulabulataka na yaloqu;

era sa luveniyali ko ira na luvequ,

ni sa gumatua na meca.”

17Sa dodoka yani na ligana ko Saioni,

ia sa sega e dua me vakaceguya;

sa vakarota ko Jiova e na vuku i Jekope

me ra vakavolivoliti koya ko ira na nona meca;

sa tautauvata ko Jerusalemi

kei na dua na ka velavela e na kedra maliwa.

18“Sa yalododonu ko Jiova,

ni ka'u sa talaidredre ki na nona i vakaro;

ia dou rogoca mada, koi kemudou na tamata kecega,

ka mai raica na noqu rarawa;

ko ira na noqu goneyalewa kei na noqu cauravou

era sa kau tani vakabobula.

19“Au a kacivi ira mai na wekaqu,

ia era sa lawakicataki au;

ko ira na noqu bete kei na noqu qase

era sa ciba e loma ni koro,

ni ra qara voli na kedra kakana

me vakabulabulataka kina na yalodra.

20“Mo ni rai mai, Jiova, ni'u sa vuturi;

sa rise na bati ni ketequ;

sa saumaki na yaloqu e lomaqu,

ni'u sa talaidredre vakaca sara.

E tautuba, sa vakayali ira na tamata nai seleiwau;

e vale, sa vaka sa tiko kina ko mate.

21“Era sa rogoca ni'u sa vutugu,

ia sa sega e vakacegui au.

Ko ira kece na noqu meca era sa rogoca ni ka'u sa rarawa;

ka ra sa marau ni kemuni sa cakava.

Ko ni na vakayacora na siga ko ni sa kacivaka,

era na qai vakataki au.

22“Me rairai e matamuni na nodra ca kece;

ka mo ni vakayaco-ka vei ira

me vaka ko ni sa cakava vei au

e na vuku ni noqu dautalaidredre;

ni sa ka levu na noqu vutugu

ka sa bibi na lomaqu.”