1A lago mate sa vakaboicataka na waiwai e vakaisaluakitaki vakamatai;
sa vakakina na nona lialia lailai na tamata sa rogo ni sa vuku ka dokai.
2A lomana na vuku sa tiko ki ligana i matau,
ia na lomana na lialia ki ligana i mawi.
3Io, ni sa lako talega e na gaunisala na lialia, sa yali ga vua na vuku,
ka sa tukuna vei ira na tamata kecega ni sa lialia ko koya.
4Kevaka sa duatani vei iko na lomana na turaga, kakua ni ko biuta na nomu yasana,
ni na vosoti nai valavala ca levu e na nomu vakamalumalumu.
5Sa dua na ka ca ka'u sa raica e ruku ni mata-ni-siga, na caka cala sa taka mai vua na turaga:
6sa lesi na lialia me tiko vakaturaga, ia ko ira na vutuniyau era sa tiko e ra.
7Au a raici ira na tamata wale ni ra sa vodo ose, kei ira na turaga ni ra taubale e dela i vuravura me vaka na tamata wale.
8 Same 7.15; Vbale 26.27 O koya sa kelia nai keli ena lutu tale kina;
kei koya sa basuka na bai ena kati koya na gata.
9O koya sa tala vatu ena mavoa kina;
o koya sa ta kau ena ca beka kina.
10Ke sa mucu na matau, ka sa sega ni solota na batina ko koya,
ke sa qai tavaka vakaukauwa;
ia sa yaga na vuku e na lewa.
11E dina ena daukata na gata kevaka sa sega e vakadula,
ka sa sega ni vinaka cake ko koya sa dauvosa.
12Sa dauvosa vakayalololoma na tamata vuku,
ia na tebenigusu ni lialia ena tilomi koya vakai koya.
13Ai vakatekivu ni vosa ni gusuna sa ka lialia,
ia nai tinitini ni nona vosa sa lialia ca sara;
14ia na tamata lialia sa dauvosa tiko.
Sa sega ni kila rawa na tamata na ka ena yaco,
ia ko cei me tukuna rawa na ka ena muri mai?
15A nodra cakacaka na lialia sa vakaocataki ira yadua,
ni sa sega ni kila ko koya na sala ki na koro.
16Ena ca vei iko, na vanua, ni sa nomu tui na gone,
ka ra sa kana tiko e na mataka ko ira na nomu turaga!
17O sa kalougata, na vanua, ni sa nomu tui na gone vakaturaga,
ka ra sa kana e na gauna sa dodonu kina ko ira na nomu turaga—
me ra kaukauwa, ka segai me ra mateni!
18E na vuku ni vucesa sa dau rusa na vale,
e na vuku talega ni vakasavu liga sa dauturu kina na vale.
19Sa caka na magiti me ia kina na dredre;
a sa ka ni marau na waini,
ia nai lavo ga sa rawa kina na ka kecega.
20Mo kakua ni vosavakacacataki koya na tui, io kakua ga e lomamu;
mo kakua talega ni vosavakacacataki koya sa vutuniyau e nomu vale ni moce;
ni sa dua na manumanu vuka ena kauta na nomu vosa,
ia na ka sa vakatabana ena tukuna na ka oqo.
Who We AreWhat We EelieveWhat We Do
2025 by iamachristian.org,Inc All rights reserved.
