Aisea 49 - Ai Vola Tabu (Vakadewa Makawa Vakavoutaki 2021)（FRV21）

Nai Tukutuku ni Veiqaravi nei Talatala ni Kalou

1 Jere 1.5 Dou rogoci au, na veiyanuyanu,

dou vakadirorogo mai na vanua vakayawa, na veimataqali!

Sa kacivi au ni'u se bera ni sucu ko Jiova;

mai na kete i tinaqu sa cavuta na yacaqu.

2 Ipe 4.12; Vtaki 1.16 Ka sa cakava na gusuqu me tautauvata kei nai seleiwau gata;

sa tabonaki au e na yaloyalo ni ligana;

ka sa vakayacori au me'u gasau makamakalivata;

sa vunitaki au e na nona taga ni gasau;

3ka sa kaya vei au, “Ko iko na noqu tamata,

ko iko, Isireli, ka'u na vakacaucautaki kina.”

4Ia koi au ka'u a kaya, “Sa sega ni yaga na noqu oca,

ka'u sa vakaotia wale na noqu kaukauwa ka sa sega dina ni yaga;

ia sa tu vei Jiova na noqu veivakadonui,

kei na noqu cakacaka sa tu ga vua na noqu Kalou.”

5Ia oqo, sa qai kaya ko Jiova,

ko koya ka buli au ni'u sa sucu me'u nona tamata,

me'u kauti ira lesu na Jekope ki vua,

ka me ra vakasoqoni mai ko ira na Isireli ki vua,

ni ka'u na dokai ga e na mata i Jiova,

ka sa noqu kaukauwa talega na noqu Kalou—

6 Aisea 42.6; Luke 2.32; Caka 13.47; 26.23 sa kaya ko koya,

“Sa dua ka lailai ga mo noqu tamata

mo vueta cake na veiyavusa i Jekope

ka vakalesui ira mai na Isireli era maroroi tiko;

ka'u na vakayacori iko mo rarama ki na veimatanitu,

me yaco kina na noqu veivakabulai ki nai yalayala kei vuravura.”

Na Vakalesui Tale ni Bula e Jerusalemi

7Sa kaya vakaoqo ko Jiova,

ko koya nai Vakabula ni Isireli kei na nona Yalosavasava,

vua sa beci sara, vua era sa vakasisilataka na lewe-ni-vanua,

vua na nodra tamata na turaga,

“Era na raica ko ira na tui ka tucake,

ko ira talega na turaga, a ra na cuva,

e na vuku i Jiova ko koya sa daudina,

ko Koya na Yalosavasava ni Isireli, ko koya sa digitaki iko.”

8 2Kori 6.2 Sa kaya vakaoqo ko Jiova,

“E na gauna ni vinakati ka'u a rogoci iko,

e na siga ni bula ka'u a vukei iko;

ka'u na maroroi iko, ka soli iko

mo veiyalayalati kei ira na tamata,

mo vueti vuravura,

me vakatawa tale na veiyasana lala;

9ka mo kaya vei ira sa vesuki, ‘Dou lako mai;’

ka vei ira ka tiko e na butobuto, ‘Dou vakaraitaki kemudou mai.’

Era na kana voli e na sala,

ia na kedra vanua veico ena tu mai na veiyasana cecere kecega.

10 Vtaki 7.16,17 Era na sega ni viakana se viagunu;

ena sega ni kati ira na nuku kata se na mata-ni-siga;

ni na tuberi ira ko koya sa lomani ira,

ka na tuberi ira e na bati ni wai vure.

11Ka'u na cakava kecega na noqu ulunivanua me gaunisala,

ia ena cecere na noqu salatu.

12Raica, ko ira oqo era na lako vakayawa mai;

ka raica, ko ira oqo mai na vualiku, kei na ra talega;

kei ira oqo mai na vanua ko Sainimi.”

13Dou ia na sere, na lomalagi; mo marau, na vuravura;

dou lagata vata mai na sere, na veiulunivanua!

Ni sa vakacegui ira na nona tamata ko Jiova,

ena lomani ira na nona era sa rarawa.

14Ia sa kaya ko Saioni, “Sa biuti au ko Jiova,

ka sa guilecavi au na Turaga.”

15“E dua li na yalewa me na guilecava na luvena sa sucu,

me kua ni lomana na luve ni ketena?

Io, e na rawa ni guilecava beka,

ia koi au ka'u na sega ni guilecavi iko.

16Raica, ka'u sa ceuti iko e na qeteqete ni ligaqu;

a nomu bai sa tikotiko ga e mataqu.

17Ko ira era tarai iko cake era sa kusarawa mai;

ko ira na dauvakacacani iko ka vakalalataki iko sa lako tani vei iko.

18Mo ta cake ka veiraiyaki;

era sa soqoni vata mai, era sa lako mai vei iko.

Me vaka ni ka'u sa bula, sa kaya ko Jiova,

ko na daramaki ira kece kina vei iko me vaka nai ukuuku,

ka vauca me vaka sa ia na yalewa sa qai vakawati.

19“A nomu veiyasana ka rusa ga ka lala,

kei na nomu vanua ka vakarusai—

sa qai osooso sara mai e na vuku ni tamata era tawana,

ka ra na yawa tani sara ko ira era sa tilomi iko.

20Era na qai kaya tale e daligamu

ko ira na luvemu era a yali vei iko:

‘Sa oso sara na noqu tikina;

mo toro yani, me'u tiko rawa.’

21Ko na qai kaya e lomamu:

‘Ko cei sa vakasucumi ira mai oqo me noqu?

Ni ka'u a rarawa voli ka yava,

ka'u a tiko vakabobula ka biu tani—

ia ko cei beka sa susugi ira oqo?

Raica, koi au ka'u a biu laivi duadua tu—

evei beka na vanua era sa qai lako mai kina oqo?’ ”

22Sa kaya vakaoqo na Turaga ko Jiova,

“Raica, ka'u na dodoka na ligaqu vei ira na veimatanitu,

ka vakaduria na noqu kuila vei ira na tamata;

ka ra na keveti ira na luvemu tagane e ligadra,

kei ira na luvemu yalewa era na colata mai e tabadra.

23Ko ira na tui era na tamamu dauveisusu,

kei ira na nodra ranadi era na tinamu dauveiqaravi.

Ni ra na cuva ka vakarokoroko vei iko,

ka dramica na kuvu-ni-soso ni yavamu.

Ia ko na qai kila kina ni sai au ko Jiova;

ka ra na sega ni madua ko ira era sa waraki au.”

24Me na kovei li nai toki-ni-valu mai vua sa qaqa,

se ko ira era vakabobulataki mai vua sa rerevaki me na vakabulai?

25Ia sa kaya vakaoqo ko Jiova,

“Ena kovei ga ko ira na bobula mai vua sa qaqa,

ka kaliraki nai toki-ni-valu mai vua sa rerevaki;

ka'u na vala kei ira era veivala kei iko,

ka vakabulai ira na luvemu.

26Ka'u na vakani ira era vakasaurarataki iko e na lewedra dina;

era na mateni e na kedra dra dina, me vaka e na waini vou.

Ia na tamata kecega era na kila ni sai au ko Jiova na nomu i Vakabula,

ni sai au ka voli iko, koi au na Kaukauwa i Jekope.”