Filipai 1 - Ai Vola Tabu (Vakadewa Makawa Vakavoutaki 2021)（FRV21）

1 Caka 16.12 Mai vei keirau ko Paula kei Timoci, na dauveiqaravi i Karisito Jisu,

Kivei ira kecega era sa lotu mai Filipai, era sa tu vata kei Karisito Jisu, kei ira na qase ni lotu, kei ira na tuirara:

2Me nomudou na loloma kei na vakacegu mai vua na Kalou ko Tamada, kei na Turaga ko Jisu Karisito.

Na Masu i Paula Baleti Ira mai Filipai

3Au sa vakavinavinaka vua na noqu Kalou e na gauna kecega ka'u sa nanumi kemudou kina,

4e na veisiga kecega, e na noqu masu kecega, au sa masulaki kemudou e na marau,

5ni dou sa lomavata tu e nai tukutuku-vinaka mai nai vakatekivu ka yacova na siga edaidai.

6Ia na ka oqo ka'u sa vakadinata sara, ko koya sa vakatekivuna na cakacaka vinaka e na lomamudou, ena kitaka tiko me yaco mada na siga i Jisu Karisito.

7Ia sa dodonu me'u nanumi kemudou kecega vakaoqo, ni dou sa tiko e na lomaqu, ni dou sa rawata vata kei au na loloma koi kemudou kecega, ni'u sa vesu tu, ka totaka ka vakadinadinataka nai tukutuku-vinaka.

8Ni sa kila na Kalou, ni'u sa lomani kemudou kecega vakalevu sara e na yalololoma i Karisito Jisu.

9Ia na ka oqo ka'u sa kerea, me tubu cake vakalevu sara na nomudou loloma e na vuku kei na lewa vinaka kecega,

10mo dou vinakata kina na veika sa vinaka sara, mo dou yalodina ka sega ni cala me yaco mada na siga i Karisito,

11ni dou sa sinai e na vua ni yalododonu, sa tubu e na vuku i Jisu Karisito, me vakarokorokotaki ka vakavinavinakataki na Kalou.

Na Vesu i Paula sa Toso kina nai Tukutuku-vinaka

12Ia ka'u sa vinakata, mo dou kila, na veiwekani, ni sa tubu cake nai tukutuku-vinaka e na vuku ni ka sa yaco vei au,

13Caka 28.30ka sa vakaraitaki kina na noqu vesuki e na vuku i Karisito vei ira kecega na sotia e na vale-ni-tui, vei ira kece talega na kena vo.

14A ra sa lewe vuqa na veiwekani era sa tu vata kei na Turaga, era sa gumatua mai ni'u sa vesuki tu, a ra sa doudou cake kina me ra tukuna na Vosa ni Kalou ka sega ni rere.

15E dina ga ni so era sa vunautaki Karisito ni ra sa dauvuvu ka dauveileti, ia eso talega ni ra sa lomavinaka.

16Sa vunautaki Karisito ko ira eso ni ra sa dauveileti, ka segai e na lomadina, era nakita ga me vakaikuritaka na noqu vesu e na ka rarawa eso;

17eso tale e na loloma, ni ra sa kila ka'u sa lesi me'u totaka nai tukutuku-vinaka.

18Ia ka vakaevei? Sa takiveivinaka, se ra vakailasu, se ra dina, sa vunautaki na Karisito; ia na ka oqo ka'u sa rekitaka, io, ka'u na rekitaka tikoga.

19Ni'u sa kila ni na yaco na ka oqo me ka me'u bula kina, e na vuku ni nomudou masu, kei nai solisoli ni Yalo i Jisu Karisito,

20me vaka na ka ka'u sa dauwaraka ka vakanuinuitaka me'u kakua ni madua e na dua na ka, me'u doudou sara ga, me vaka eliu, me vakakina edaidai me vakalevulevui na Karisito e na vuku ni yagoqu, se sa bula, se sa mate.

21Ni sai koya na Karisito ka'u sa bula kina; ia sa ka vinaka kevaka ka'u sa mate.

22Ia kevaka sa vakavuana tiko na noqu cakacaka ni'u sa bula vakayago oqo, au sa qai sega ni kila na ka me'u digitaka.

23Ni'u sa lomalomarua e na ka e rua, ni'u sa gadreva me'u lako yani, ka tiko vata kei Karisito; o koya sa vinaka cake sara;

24ia sa yaga cake vei kemudou me'u tiko ga vakayago.

25Ia ni'u sa vakadinata oqo, au sa kila ni'u na tiko ga, io, ka tiko vata kei kemudou kecega, mo dou tubu cake kina e na marau ni vakabauta;

26me levu cake e na vukuqu na nomudou rekitaki Karisito Jisu, e na noqu tiko vata tale kei kemudou.

27Mo dou ia ga nai valavala sa kilikili kei nai tukutuku-vinaka kei Karisito, me'u rogoci kemudou kina, se'u lako yani ka raici kemudou, se'u tiko tani, ni dou sa tudei e na yalovata, ka gumatua sara e na lomavata me tubu na vakabauta ni tukutuku-vinaka;

28me kakua ni vakarerei kemudou ko ira na nomudou meca e na dua na ka; oqori nai vakatakilakila vei ira ni ra na rusa, ia vei kemudou ni dou na bula, ia oqo mai vua na Kalou.

29Ni sa soli vei kemudou e na vuku i Karisito, e segai walega mo dou vakabauti koya, mo dou vosota talega na ca e na vukuna—

30Caka 16.19-40ni sa nomudou na veivala dou sa raica eliu vei au, ka dou sa rogoca sa yaco vei au edaidai.