2 Tui 15 - Ai Vola Tabu (Vakadewa Makawa Vakavoutaki 2021)（FRV21）

Sa Tui Juta ko Asaraia(2 Veigauna 26.1-23)

1E na kenai karuasagavulu ka vitu ni yabaki i Jeropoama na tui Isireli, sa tekivu me lewa ko Asaraia na luve i Amasaia na tui Juta.

2E tinikaono na nona yabaki ni sa tekivu me lewa, ka sa lewa tiko mai Jerusalemi ka yabaki limasagavulu ka rua. Ia na yaca i tinana ko Jikolaia na marama ni Jerusalemi.

3A sa daucaka dodonu e na mata i Jiova, me vaka na ka kecega ka cakava ko Amasaia na tamana.

4Ia, sa sega ga ni biu vakatikitiki na veitikina cecere. Era a vakacaboisoro tikoga kina na tamata, ka vakama tikoga na ka boi vinaka e na veitikina cecere.

5A sa cudruva na tui ko Jiova, ka sa vukavuka ko koya ka yacova na siga ka mate kina, a sa tiko e na dua na vale vakai koya ga. A sa lewa na vale ko Jocame na luve ni tui, ka lewai ira na lewe-ni-vanua.

6Ia na kena vo ni cakacaka i Asaraia, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

7Aisea 6.1A sa moce vata kei ira na nona qase ko Asaraia; a ra sa buluti koya vata kei ira na nona qase e na koro i Tevita; a sa buli me tui ko Jocame na luvena, me kenai sosomi.

Sa Tui Isireli ko Sakaraia

8E na kenai katolusagavulu-ka-walu ni yabaki i Asaraia na tui Juta, sa lewa vei ira na Isireli mai Samaria ko Sakaraia na luve i Jeropoama ka vula ono.

9A sa daucaka ca ko koya e na mata i Jiova, me vaka na ka era a cakava ko ira na nona qase. Sa sega ni biuta nai valavala ca i Jeropoama na luve i Nipati, o koya ka vakaivalavalacataki ira na Isireli.

10A sa buki kena vere ko Salumi na luve i Jepesi, ka mokuta e na matadra na tamata, ka vakamatea, ka sa lewa me kenai sosomi.

11Ia na kena vo ni cakacaka i Sakaraia, raica, sa volai e nai Vola ni Veika sa Caka e na Nodra Gauna na Tui Isireli.

122Tui 10.30Oqo na vosa i Jiova ka vosataka ko koya vei Jeu, ni sa kaya, “Eratou na dabe tiko e nai tikotiko vakaturaga nei Isireli ko iratou na luvemu, ka yacova na kenai kava ni tabatamata.” A sa yaco me vakakina.

Sa Tui Isireli ko Salumi

13Sa tekivu me lewa ko Salumi na luve i Jepesi e na kenai katolusagavulu ka ciwa ni yabaki i Usaia na tui Juta; a sa lewa mai Samaria e dua dina na vula.

14A sa lako cake mai Tirisa ko Mineemi na luve i Kata, ka lako ki Samaria, a sa mokuti Salumi na luve i Jepesi e Samaria, ka vakamatei koya, a sa lewa me kenai sosomi.

15Ia na kena vo ni cakacaka i Salumi, kei na vere sa bukia ko koya, raica, sa volai e nai Vola ni Veika sa Caka e na Nodra Gauna na Tui Isireli.

16Sa qai mokuti Tifisa ko Mineemi, kei ira kecega era tiko kina, kei na kena veiyasana mai Tirisa, ni ra sa sega ni vakacurumi koya. A sa mokuta kina ko koya, ka tava kecega na yalewa sa bukete era tiko kina.

Sa Tui Isireli ko Mineemi

17E na kenai katolusagavulu ka ciwa ni yabaki i Asaraia na tui Juta, sa tekivu na nona lewa mai Samaria vei ira na Isireli ko Mineemi na luve i Kata, ka sa lewa me yabaki tini.

18A sa daucaka ca ko koya e na mata i Jiova; sa sega ni biuta tani e nona siga kecega nai valavala ca i Jeropoama na luve i Nipati, o koya ka vakaivalavalacataki ira na Isireli.

19Sa lako mai ki na vanua ko Puli na tui Asiria me vala; a sa solia vei Puli ko Mineemi e dua na udolu na taledi siliva, ka me sa totaki koya me vakataudeitaki kina vua na matanitu.

20A sa lavaka nai lavo ko Mineemi vei ira na Isireli, io vei ira yadua na tamata vutuniyau, era tauyalimasagavulu na sikeli siliva, ka me solia vua na tui Asiria. A sa lesu yani kina na tui Asiria, ka sa sega ga ni tiko e na vanua.

21Ia na kena vo ni cakacaka i Mineemi, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Isireli?

22A sa moce vata kei ira na nona qase ko Mineemi, ka sa lewa ko Pikaya na luvena, me kenai sosomi.

Sa Tui Isireli ko Pikaya

23E na kenai kalimasagavulu ni yabaki i Asaraia na tui Juta, sa tekivu me lewa mai Samaria vei ira na Isireli ko Pikaya na luve i Mineemi, ka sa lewa yabaki rua.

24A sa daucaka ca ko koya e na mata i Jiova. Sa sega ni biuta nai valavala ca i Jeropoama na luve i Nipati, o koya ka vakaivalavalacataki ira na Isireli.

25Ia ka sa buki kena vere ko Peka na luve i Rimalaia, e dua na nona turaga-ni-valu, a sa mokuti koya mai Samaria, e na tikina cecere e na vale ni turaga, o koya kei Arikopi kei Eraie, kei ira vata kaya e lewe limasagavulu na tamata era kai Kiliati; a sa vakamatei koya ko koya, a sa lewa me kenai sosomi.

26Ia na kena vo ni cakacaka i Pikaya, kei na ka kecega sa cakava ko koya, raica, sa volai e nai Vola ni Veika sa Caka e na Nodra Gauna na Tui Isireli.

Sa Tui Isireli ko Peka

27E na kenai kalimasagavulu ka rua ni yabaki i Asaraia na tui Juta, sa tekivu me lewa mai Samaria vei ira na Isireli ko Peka na luve i Rimalaia, ka sa lewa yabaki ruasagavulu.

28A sa daucaka ca ko koya e na mata i Jiova. Sa sega ni biuta nai valavala ca i Jeropoama na luve i Nipati, o koya ka vakaivalavalacataki ira na Isireli.

29E na gauna i Peka na tui Isireli, sa lako mai ko Tikilaci-pileseri na tui Asiria, ka kabai Aijoni, kei Epeli-peci-meeka, kei Janoa, kei Ketesi, kei Asori, kei Kiliati, kei Kalili, na vanua taucoko i Navitalai; ka kauti ira vakabobula ki Asiria.

30A sa bukiveretaki Peka na luve i Rimalaia ko Osea na luve i Ela, ka mokuti koya, ka vakamatea, a sa lewa me kenai sosomi, e na kenai karuasagavulu ni yabaki i Jocame na luve i Usaia.

31Ia na kena vo ni cakacaka i Peka, kei na ka kecega sa cakava ko koya, raica, sa volai e nai Vola ni Veika sa Caka e na Nodra Gauna na Tui Isireli.

Sa Tui Juta ko Jocame(2 Veigauna 27.1-9)

32E na kenai karua ni yabaki i Peka na tui Isireli, na luve i Rimalaia, sa tekivu me lewa ko Jocame na luve i Usaia na tui Juta.

33Sa ruasagavulu ka lima na nona yabaki ni sa tekivu me lewa, a sa lewa tiko mai Jerusalemi ka yabaki tinikaono. Ia na yaca i tinana ko Jirusa, na luve i Setoki.

34A sa daucaka dodonu ko koya e na mata i Jiova; sa cakacaka me vaka na ka kecega ka cakava ko Usaia na tamana.

35Ia ka sa sega ni biu na veitikina cecere; sa ra vakacaboisoro tiko ko ira na tamata, ka vakama tiko na ka boi vinaka e na veitikina cecere. Sa cakava ko koya na matamata-ni-koro ni vale i Jiova, e cake.

36Ia na kena vo ni cakacaka i Jocame, kei na ka kecega sa cakava ko koya, sa sega li ni volai e nai Vola ni Veika sa Caka e na Nodra Gauna na Tui Juta?

37E na veisiga ko ya sa vakauqeti Risini na tui Siria, kei Peka na luve i Rimalaia, ko Jiova, me veivala kei Juta.

38A sa moce vata kei ira na nona qase ko Jocame, ka sa bulu vata kei ira na nona qase e na koro i Tevita na nona qase; a sa tui ko Easi na luvena, me kenai sosomi.