Aisea 13 - Ai Vola Tabu (Vakadewa Makawa Vakavoutaki 2021)（FRV21）

E na Cudruvi Papiloni na Kalou

1 Aisea 47.1-15; Jere 50.1—51.64 Na vosa ni parofisai bibi kei Papiloni, oqori ka raica ko Aisea na luve i Emosi.

2Dou vakarewataka na drotini e na ulunivanua cecere;

tabalaka na kaci vei ira;

yalovaka na ligamudou me ra curuma

na nodra matamata-ni-koro na turaga.

3Au sa vakaroti ira ka'u sa vakatabuya,

io ka'u a kacivi ira na noqu tamata qaqa,

ko ira era marautaka na ka ka'u na rogo kina,

me ra vakayacora na noqu cudru.

4Na rorogo ni valu levu e na veiulunivanua,

sa vaka era sa lewe vuqa!

A domo ni nodra ue na veimatanitu

ni lewe ni veivanua era sa soqoni vata!

Ko Jiova-ni-lewevuqa sa vakasoqoni ira vata na nona mataivalu

me ia nai valu.

5Era sa lako mai na vanua yawa,

mai na vu ni lomalagi,

io ko Jiova, kei nai yaragi ni nona cudru levu,

me vakarusa na vanua taucoko.

6 Joeli 1.15 Dou qoqolou; ni sa voleka na siga i Jiova;

ena yaco me vaka na veivakarusai mai vei Koya sa Kaukauwa.

7Ena malumalumu kina na ligadra kecega,

ka waicala na yalo ni tamata kecega,

8a ra na sautaninini.

Na yaluma kei na rarawa ena tarai ira;

era na yaluma me vaka na yalewa sa taratara.

Era na dui kidacala e dua vua e dua;

ia na matadra ena vaka na yameyame ni buka.

9Raica, sa toro mai na siga ni Jiova,

sa ka rarawa dina sara e na cudru levu kei na cudru waqawaqa,

me vakarusa na vanua,

ia ena vaqeavutaka ko koya na kena tamata i valavala ca.

10 Isi 32.7; Maciu 24.29; Mari 13.24,25; Luke 21.25; Vtaki 6.12,13; 8.12 Ni na sega ni cila mai na kalokalo ni lomalagi

kei na veikalokalo era vakayacani vata;

ena butobuto na mata-ni-siga ni sa cabe mai,

kei na vula ena sega talega ni cila mai.

11Ia ka'u na cudruvi vuravura e na vuku ni kena ca,

kei na tamata caka cala e na vuku ni nodra i valavala ca;

ka'u na muduka talega na nodra viavialevu na yalolevu,

ka vakasivoya na nodra viavia turaga era daurerevaki.

12Ka'u na cakava me kunekunei dredre na tamata ka rawarawa na koula dina;

io me kunekunei dredre e dua bauga na tamata ka rawarawa na koula ni Ofa.

13Ia ka'u na vakayavalati lomalagi,

ko vuravura talega ena tavuki tani mai na kena yasana,

e na cudru levu i Jiova-ni-lewevuqa,

kei na siga ni nona cudru waqawaqa.

14Ia ena vaka na dia sa vakasasataki,

kei na sipi sa sega e vakasoqona,

era na dui lesu vei ira na kai nona,

ka dui dro ki na nona vanua.

15O koya yadua sa kune ena lausua,

kei koya yadua sa tauri ena mate e nai seleiwau.

16A nodra gone ena botobotolaki ki na vatu

e matadra;

a nodra veivale ena yanaki,

ka na yarataki na watidra.

17Raica, ka'u na vakauqeti ira na kai Mitia me nodra meca,

era na sega ni nanuma na siliva,

ka ra na sega ni marautaka na koula.

18A nodra dakai-titi ena vakabalei ira na cauravou ki na vatu;

na vua ni kete era na sega ni lomana;

ena sega ni loloma na matadra vei ira na gone.

19 Vteki 19.24 Ia ko Papiloni, ka rogo vei ira na veimatanitu,

na nodra ka lagilagi era dokai ira kina na kai Kalitia,

ena tautauvata kei Sotoma kei Komora

ni sa vukica na Kalou.

20Ena sega ni tawa tale,

ena sega tale ni tiko kina e dua nai tabatamata;

ena sega ni birika mai kea na kai Arapea na nona valelaca,

ko ira talega nai vakatawa era na sega ni vakadavora mai kea na nodra qele ni sipi.

21 Aisea 34.14; Sefa 2.14; Vtaki 18.2 Ia ena koto ga mai kea na manumanu kila,

ka na tawa na nodra veivale e na manumanu dautagi vakaloloma;

ena tiko mai kea na luve ni ositeriji,

ena meke mai kea na me-tevoro.

22Ena tagi na wolifa e na nodra veivale vakaturaga,

kei na gata lelevu e na nodra bure vinaka;

ka sa voleka ni yaco na kena gauna,

ia na kena siga ena sega ni vakaberaberataki.