Jope 3 - Ai Vola Tabu (Vakadewa Makawa Vakavoutaki 2021)（FRV21）

Sa Vosavakacacataka na Siga e Sucu kina ko Jope

1 Jere 20.14-18 Sa oti oqo, sa qai vosavakacacataka na nona siga ko Jope.

2A sa kaya ko Jope,

3“Me yali na siga ka'u a sucu kina,

kei na bogi sa tukuni kina,

‘Sa kunekunetaki e dua na gonetagane.’

4Me butobuto na siga ko ya!

Me kakua ni nanuma kina na Kalou mai cake,

me kakua talega ni cilava na rarama.

5Me sa nodrau ga na butobuto kei na yaloyalo ni mate.

Me ubia tikoga na o;

me ka rerevaki sara ga na kena butobuto.

6Ia na bogi oqori—me vesuka na butobuto loaloa!

Me kakua ni reki vata kei na veisiga ni yabaki;

me kakua ni wili vata kei na veivula.

7Raica, me tu duadua na bogi oqori;

me kakua ni rogo kina na domo ni reki.

8Me ra vosavakacacataka ko ira era sa dauvosavakacacataka na wasawasa,

ko ira era vakarau tu me yavalata na Livaiacani.

9Me vakabutobutotaki na kalokalo e na kena yakavi;

me waraka na rarama, ia me sega ga;

me kakua talega ni kunea na mataka caca—

10ni sa sega ni sogota na kete i tinaqu,

ka sega ni vunia na rarawa mai na mataqu.

11“A cava ka'u a sega kina ni mate ni'u sa qai sucu mai?

A cava ka'u a sega kina ni ciba ni'u sa lako mai na kete?

12A cava sa tabei au kina na duruna,

kei na mata-ni-sucu me'u sucuma?

13Kevaka e segai, au a qai koto vakadua edaidai ka sega ni oca;

ka'u a qai moce ga; ka'u na qai tiko vakacegu

14kei ira na tui kei ira na daubose kei vuravura,

ko ira era sa cakava me nodra na yasana sa sega ni tawa,

15se kei ira na turaga era sa vakoula,

ko ira sa vakasinaita na nodra vale e na siliva.

16Se na cava ka'u a sega kina ni bulu me vaka na gone lutudole,

me vaka na gone lalai era sa sega ni kunea na rarama?

17Sa mudu mai kea na nodra veivakararawataki na tamata ca,

a ra sa vakacegu mai kea ko ira era sa oca.

18Era sa vakacegu vata mai kea ko ira na bobula;

era sa sega ni rogoca na vosa ni dauveivakasaurarataki.

19Era sa tiko mai kea na lalai kei na lelevu,

a sa sereki na tamata mai vua na nona turaga.

20“A cava sa soli kina na rarama vei koya sa rarawa,

kei na bula vei koya sa gaga na yalona,

21 Vtaki 9.6 ko ira era sa gadreva me ra mate, ka sa sega ga,

a ra sa gu vakalevu kina ka vakalailai ki nai yau sa vuni tu;

22ko ira era sa marau vakalevu,

ka reki ni ra sa kunea nai bulubulu?

23A cava sa soli kina na rarama vua na tamata sa vuni tu na nona sala,

ko koya sa vakalatia na Kalou?

24Ni sa liu mai na noqu vakaloloku ka sa muri na noqu kana,

ka sa sovaraki yani na noqu vutugu me vaka na wai.

25Ni sa yacovi au na ka ka'u a domobula kina,

kei na ka ka'u a rerevaka sa qai yaco mai vei au.

26Au sa sega ni tiko vinaka, se tiko vagagalu;

sa sega ni'u vakacegu, ka sa yaco ga mai na ka rarawa.”