2 Veigauna 16 - Ai Vola Tabu (Vakadewa Makawa Vakavoutaki 2021)（FRV21）

Sa Cudruvi na Vakararavi nei Esa ki Siria(1 Tui 15.17-22)

1E na kenai katolusagavulu ka ono ni yabaki ni nona lewa ko Esa, sa lako cake ko Pasa na tui Isireli me veivala kei ira na Juta, ka tarai Rama, ka me kakua ni dua me lako tani se lako mai vei Esa na tui Juta.

2Sa qai kauta mai ko Esa na siliva kei na koula mai nai yau mai na vale i Jiova, kei na vale-ni-tui, a sa vakauta kivei Peni-etati, na tui Siria, ko koya sa tiko mai Tamasiko, a sa kaya,

3“Sa dua na nodaru veiyalayalati, me vaka sa tu vei rau na tamadaru. Raica, au sa vakauta vei iko oqo na siliva kei na koula. Mo lako, mo voroka na nomudrau veiyalayalati kei Pasa na tui Isireli, me lako tani kina vei au ko koya.”

4A sa vakarorogo ko Peni-etati kivei Esa na tui, ka sa vakatalai ira na kavetani ni nona veimataivalu, me kaba na nodra veikoro na Isireli. A ra sa samuti Aijoni, kei Tani, kei Epeli-meimi, kei na veikoro ni yau kecega mai Navitalai.

5Ia ni sa rogoca ko Pasa, sa cegu ni tarai Rama, ka sa mudu na nona cakacaka.

6A sa kauti ira kecega na Juta ko Esa na tui, ka ra sa colata tani na kena veivatu, kei na kena kau, ka tarai Rama tiko kina ko Pasa, ka sa tarai Kipa kina kei Misipa ko koya.

Na Parofita ko Anani

7Ia e na gauna ko ya sa lako mai ko Anani na daurai kivei Esa na tui Juta, a sa kaya vua, “Ni kemuni sa vakararavi vei tui Siria, ka sega ni vakararavi vei Jiova na nomuni Kalou, sa dro bula kina mai na ligamuni nai valu ni tui Siria.

8Era a sega li ni lewe vuqa sara ko ira na kai Eciopea kei na kai Libiya, ka levu sara na qiqi-ni-valu kei na tamata era vodo ose? Ia ni kemuni a vakararavi vei Jiova, sa soli ira ko koya ki na ligamuni.

9Ni sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua. O ni sai valavala vakalialia e na ka oqo, ia e na gauna e muri ena ia vei kemuni nai valu.”

10Sa qai cudru sara ko Esa vua na daurai, ka sa biuti koya ki na valeniveivesu, ni sa levu na nona cudru vua e na vuku ni ka oqo. Sa vakasaurarataka talega ko Esa eso vei ira na tamata e na gauna ko ya.

Nai Cavacava ni Bula nei Esa(1 Tui 15.23-24)

11Ka raica, na cakacaka i Esa, a kenai vakatekivu, kei na kenai otioti, sa volai e na kedrai vola na tui Juta kei Isireli.

12A sa dua na mate sa tauva na yava i Esa e na kenai katolusagavulu ka ciwa ni yabaki ni nona lewa, ka sa levu sara na nona mate. Ia sa sega ni golevi Jiova e na nona mate, sa golevi ira ga na vuniwai.

13A sa moce vata kei ira na nona qase ko Esa, sa ciba e na kenai kavasagavulu ka dua ni yabaki ni nona lewa.

14A sa bulu e na nona i bulubulu ka sa taya ko koya me nona e na koro i Tevita. A sa vakotori e nai davodavo sa vakasinaiti e na ka boi vinaka, kei na ka eso ka vakarautaki me vaka na nodra i valavala na dau-ni-saluaki, ka ra sa cakava e dua na kama levu sara e na vukuna.