Tiko mai na Lekutu 20 - Ai Vola Tabu (Vakadewa Makawa Vakavoutaki 2021)（FRV21）

Na Cala i Mosese mai Ketesa(Lako Yani 17.1-7)

1Era sa qai lako mai na Isireli, io ko ira nai soqosoqo taucoko, ki na vanua lala ko Sini, e nai matai ni vula, ka ra sa tiko mai Ketesa na tamata. A sa mate mai kea ko Miriama, a sa bulu kina.

2 Lako 17.1-7 A sa sega na medra wai nai soqosoqo. A ra sa soqoni vata me veivorati kei Mosese kei Eroni.

3A ra sa veileti kei Mosese na tamata, ka kaya, “E ca ni keimami a sega ni ciba ni ra ciba e na mata i Jiova na weka i keimami!

4Ia a cava drau sa kauti ira kina nai soqosoqo i Jiova ki na vanua lala oqo, me keimami mate kina kei na neimami manumanu e yavai va?

5Ia a cava drau sa kauti keimami cake kina mai Ijipita, me kauti keimami ki na vanua ca oqo? Sa sega ni vanua ni sore ni kau, se ni lolo, se ni veivaini, se ni pomekaraneti; ka sa sega talega na wai ni gunu.”

6A rau a lako yani ko Mosese kei Eroni mai vei ira nai soqosoqo ki na katuba ni vale ni veitavaki, a rau sa cuva vakatoboicu. A sa rairai vei rau na serau i Jiova.

7A sa kaya vei Mosese ko Jiova,

8“Mo kauta nai titoko, ka vakasoqoni ira vata nai soqosoqo, ko iko kei Eroni na tuakamu, ia drau vosa ki na uluvatu e na matadra me solia mai na kena wai. Ia ko na kauta mai vei ira na wai mai na vatu; ko na vagunuva kina nai soqosoqo kei na nodra manumanu e yavai va.”

9A sa kauta nai titoko ko Mosese mai na mata i Jiova, me vaka ka vakarota vua.

Sa Tukia na Vatu ko Mosese

10A rau sa vakasoqona vata nai soqosoqo ko Mosese kei Eroni me ra donuya na uluvatu, a sa kaya vei ira ko koya, Dou rogoca mada, na tamata talaidredre; me keirau vakavurea beka mai na memudou wai mai na vatu oqo?

11A sa dodoka na ligana ko Mosese, ka tukia vakarua na vatu e nona i titoko; a sa dave vakalevu na wai, ka ra sa gunu nai soqosoqo kei na nodra manumanu e yavai va.

12A sa kaya vei Mosese kei Eroni ko Jiova, “Ni drau a sega ni vakabauti au, mo drau dokai au e na matadra na Isireli, drau na sega kina ni kauta nai soqosoqo oqo ki na vanua ka'u sa solia vei ira.”

13Oqo na wai ni Meripa; ni ra veileti kei Jiova na Isireli, ia sa vakarokorokotaki ko koya vei ira.

Tarovi Ira na Isireli ko Tui Itomi

14A sa tala eso nai talaki ko Mosese mai Ketesa vua na tui Itomi, me kaya vua, “Sa vosa vakaoqo na wekamu na Isireli: Ko sa kila na oca kecega sa yacovi keimami:

15ni ra a lako sobu ki Ijipita na neimami qase, ka keimami sa tiko vakadede mai Ijipita. A ra sa vakararawataki keimami kei ira na neimami qase ko ira na kai Ijipita.

16Ia ni keimami a tagi vei Jiova, sa rogoca na domo i keimami ko koya, a sa tala na agilosi, ka kauti keimami tani mai Ijipita. Ka raica, keimami sa mai tiko e Ketesa, na koro e nai yalayala ni nomu vanua.

17Au sa kerei iko mo laivi keimami me keimami lako mada e nomu loma ni vanua. Keimami na sega ni lako e loma ni veiwere se na veivaini, keimami na sega talega ni gunuva na wai mai nai keli-wai. Keimami na lako ga e na salatu ni tui. Keimami na sega ni lako vaka ki nai matau se ki nai mawi, ka me keimami sivia mada nai yalayala ni nomu vanua.”

18Ia sa kaya vua ko tui Itomi, “Mo kakua ni lako e noqu loma ni vanua, de'u sa la'ki veivala kei iko.”

19A ra sa kaya vua ko ira na Isireli, “Keimami na lako ga e na salatu; ia kevaka keimami sa gunuva na memu wai, koi keimami kei na neimami manumanu e yavai va, ia keimami na sauma ga. Me keimami lako takoso walega e yavai keimami, ka sai koya ga ko ya.”

20Ia sa kaya ko koya, “Ko ni na sega ni lako kina.” A sa lako yani ko tui Itomi, kei ira na tamata e lewe vuqa, me veivala kei ira.

21A sa bese ko tui Itomi ni laivi ira na Isireli me ra lako e nona loma ni vanua; a ra sa mani gole tani mai vua ko ira na Isireli.

Na Mate i Eroni

22A ra sa lako mai Ketesa ko ira na Isireli, ko ira nai vavakoso taucoko, ka yaco ki na Ulunivanua ko Ori.

23A sa vosa vei Mosese kei Eroni ko Jiova mai na Ulunivanua ko Ori, e nai yalayala ni vanua ko Itomi, ka kaya,

24“Ko Eroni e na toki yani vei ira na kai nona, ni na sega ni curu ki na vanua ka'u sa solia vei ira na Isireli, ni drau a talaidredre ki na noqu vosa mai na wai ko Meripa.

25Mo kauti Eroni kei Iliesa na luvena, ka kauti rau cake ki na Ulunivanua ko Ori;

26ia mo luvata nai sulu i Eroni, ka vakasuluma kina na luvena ko Iliesa. Ena qai toki yani vei ira na kai nona ko Eroni, io ena mate mai kea.”

27A sa kitaka ko Mosese me vaka ka vakarota ko Jiova. A ratou a cabeta na Ulunivanua ko Ori, e na matadra nai soqosoqo taucoko.

28Lako 29.29; Tiko 33.38; Vrua 10.6A sa luvata nai sulu i Eroni ko Mosese, ka vakasuluma kina na luvena ko Iliesa; a sa ciba mai kea ko Eroni e na dela ni ulunivanua. A rau sa siro sobu mai na ulunivanua ko Mosese kei Iliesa.

29Ia ni ra sa raica nai soqosoqo taucoko ni sa mate ko Eroni, era a tagicaki Eroni ka bogi tolusagavulu, io ko ira kecega na lewe-ni-vuvale i Isireli.