Same 30 - Ai Vola Tabu (Vakadewa Makawa Vakavoutaki 2021)（FRV21）

A Vakavinavinaka ni sa Yaco na Bula A Same i Tevita. A sere ni kena vakatabui na Valenisoro.

1Au na vakavinavinaka vei kemuni, Jiova, ni kemuni sa vakatoroi au ki cake,

ka sa sega ni laivi ira na noqu meca me ra marau e na vukuqu.

2I Jiova noqu Kalou, ka'u a tagi vei kemuni,

ia ko ni sa vakabulai au.

3I Jiova, ko ni a tubera cake na yaloqu mai nai bulubulu,

ko ni sa maroroya na noqu bula me'u kakua ni lako sobu ki nai bulubulu.

4Dou sere vei Jiova, koi kemudou na nona tamata yalosavasava,

ka vakavinavinaka ni dou nanuma na nona yalododonu.

5Na nona cudru sa ka lekaleka sara;

e na nona loloma sa tu kina na bula.

Sa ia na tagi e na bogi,

ia sa yaco e na mataka na marau.

6Ia ni'u a tiko vinaka, ka'u sa kaya,

“Au na sega ni vakayavalati.”

7I Jiova, e na nomuni loloma

ko ni sa vakataudeitaka sara na noqu ulunivanua;

ia ko ni sa vunia na matamuni;

ka'u sa qai taqaya.

8Au a tagi vei kemuni, Jiova,

ka'u a ia vei Jiova na masumasu.

9“A cava na betena na noqu dra,

ni'u sa lako sobu ki nai bulubulu?

Ena vakavinavinaka beka vei kemuni na kuvu-ni-soso?

Ena tukuna beka na nomuni dina?

10Ni rogoca, Jiova, ka mo ni lomani au mai!

Ni vukei au mai, Jiova!”

11O ni sa vukica na noqu tagi me'u sere ga;

o ni sa luvata na noqu i sulu taga, ka vauci au e na reki,

12me sere kina vei kemuni na yamequ; me kakua sara ni galu.

I Jiova na noqu Kalou, ka'u na vakavinavinaka vei kemuni ka tawa mudu.