Iperiu 12 - Ai Vola Tabu (Vakadewa Makawa Vakavoutaki 2021)（FRV21）

Nai Lala i Vakadinadina Levu

1E na vuku ni ka oqo, me vaka ni ra sa vakavolivoliti keda e lewe vuqa nai vakadinadina, me da biuta laivi kina na ka bibi kece kei nai valavala ca eda sa tao rawarawa kina, ka me da ciciva tikoga na cere sa tu e matada,

2ka me da raici Jisu tikoga, o koya sa vakatekivuna ka na sauma talega na noda vakabauta, o koya sa vosota na kauveilatai e na vuku ni reki sa vakarautaki tu e matana, ka sa sega ni madua ni sa vakalialiai kina, ka sa qai tiko sobu ko koya e na liga i matau ni tikotiko-vakaturaga ni Kalou.

3Dou qai vakananumi koya sa vosota ni sa vosavakacacataki koya vakalevu ko ira na tamata ca, me kakua kina ni dou oca ka waicala na lomamudou.

4E na nomudou veivala kei nai valavala ca, dou se sega mada ni veivorati me yacova na kena vakadavei na nomudou dra.

5Jope 5.17; Vbale 3.11,12Ka dou sa guilecava li nai vakavuvuli sa vosa kina kivei kemudou me vaka ni dou sa luvena—

“Na luvequ, mo kakua ni beca ni sa vakadodonutaki iko na Turaga,

se yalowai ni sa vunauci iko ko koya;

6o koya sa lomana na Turaga sa vakadodonutaka ko koya,

ka sa vakanakuitataki ira kecega na luvena sa vinakata ko koya.”

7Kevaka dou sa vosota ni dou sa vakadodonutaki, sa qai kitaka oqo vei kemudou na Kalou me vaka vei ira na luvena. Io, ko cei na gone sa sega ni vakadodonutaki koya ko tamana?

8Ia kevaka dou sa sega ni sotava na veivakadodonutaki me vaka sa dauia vei ira kecega, dou sa qai vaka na gone e sega ni vakatamani, ka sega ni vaka na luvena dina.

9Ia sa dauvakadodonutaki keda na tamada vakayago, ia eda a daudoka. Ena sega li ni levu cake sara na noda talairawarawa vei koya na Tama ni yaloda, ka da na bula kina?

10Ia ko ira oqori era sa dauvakadodonutaki keda e na siga walega eso me vaka era sa vinakata, ia ko koya sa vakadodonutaki keda, me da vinaka kina, me da wasea vata kina na nona yalosavasava.

11Ia oqo, sa sega ni ka ni marau na veivakadodonutaki ni sa ia tiko, a ka rarawa ga. Ia e muri sa qai vuataka na vua ni yalododonu era sa vakacegui kina ko ira sa vakatavulici mai kina.

Nai Vakavuvuli Eso

12 Aisea 35.3 O koya oqo mo dou qai vakaukauwataka na liga sa wadamele, kei na duru sa malumalumu;

13Vbale 4.26ka vakadodonutaka na sala ki na yavamudou, me kakua ni vakasesei ko koya sa gera, ia me vakabulai ga.

14Dou segata mo dou veivinakati kei ira na tamata kecega, kei na yalosavasava, ni sa sega e dua ena raica na Turaga kevaka e sega vua na ka oqo.

15Vrua 29.18Ka dou qarauni kemudou vinaka de bale e dua mai na loloma ni Kalou; ka me kakua ni dua na waka gaga me tubu cake ka ia kina na rarawa, ka vaqeleqelewataki kina na lewe vuqa.

16Vteki 25.29-34Dou qarauna me kakua ni dua me vakataki Iso, o koya sa ia na veidauci, a sa beca na ka tabu, ka sa volitaka na nona ulumatua e na kakana e dua bau.

17Vteki 27.30-40Ni dou sa kila, sa gadreva e muri ko koya me vosavakalougatataki, ia sa bureitaki vua (ni sa sega ni kunea na ka e rawa kina na vuki me duatani), ia ka sa vakasaqara matua, ka vakawai na matana.

18 Lako 19.16-22; 20.18-21; Vrua 4.11,12; 5.22-27 Ni dou sa sega ni lako mai ki na ulunivanua sa tarai rawa, a sa caudre e na buka, kei na o loaloa, kei na butobuto, kei na cava,

19kei na rorogo ni davui, kei na domo ni vosa; ko ya sa masu kina ko ira era a rogoca, me kakua ni vosataki tale vei ira;

20Lako 19.12,13ni ra sa sega ni vosota rawa na ka sa vakaroti, “Kevaka e tara na ulunivanua e dua na manumanu e yavai va, ena vakaviriki e na vatu;”

21Vrua 9.19ia sa ka rerevaki sara na kenai rairai ni ka ko ya, ka sa kaya kina ko Mosese, “Au sa domobula ka sautaninini vakalevu.”

22Ia dou sa lako mai ki na Ulunivanua ko Saioni kei na koro ni Kalou bula, ki Jerusalemi vakalomalagi, kei na nodra i soqosoqo na agilosi e sega ni wili rawa,

23kei na nodra i soqosoqo na ulumatua sa volai mai lomalagi, vua talega na Kalou sa lewai ira kecega na tamata, kei na yalodra na tamata yalododonu sa yaco kece kina na nodra vakalougatataki,

24Vteki 4.10kivei Jisu talega na dautataro ni veiyalayalati vou, kei na dra sa kureitaki, oqori ga sa cavuta tiko na ka vinaka, sa cavuta na ka ca na dra i Epeli.

25 Lako 20.22 Dou raica, mo dou kakua ni bese vua sa vosa. Ia kevaka era a sega ni dro bula ko ira era a bese vua sa vosa e vuravura, ena dredre vakalevu cake vei keda, kevaka eda sa vuki tani mai vua sa vosa mai lomalagi.

26Akeai 2.6O koya sa vakayavalati vuravura e na domona e na gauna ko ya, a sa qai yalataka, ka kaya, “Sa vakadua tale, ka'u na sega ni vakayavalati vuravura ga, ko lomalagi talega.”

27Na vosa oqo, “Me vakadua tale,” sa vakatakilai na kena kau tani yani na veika sa vakayavalati—oqori na veika sa buli—me tudei kina na veika sa sega ni vakayavalati rawa.

28O koya oqo me vaka ni sa noda na matanitu sa sega ni yavalati rawa, me da vakavinavinaka, ka vakacacabo vua na Kalou e na vakarokoroko kei na rere,

29Vrua 4.24ni sa bukawaqa dauveivakarusai na noda Kalou.