1 Veigauna 12 - Ai Vola Tabu (Vakadewa Makawa Vakavoutaki 2021)（FRV21）

Ko Ira na Penijamini ka Muri Tevita ki Sikilaki

1Ia ko ira oqo era sa lako mai kivei Tevita ki Sikilaki, ni sa vunitaki koya tiko e na vuku i Saula na luve i Kisi. Ia era sa duavata kei ira na tamata qaqa era sa veivuke e nai valu.

2A nodra i yaragi na dakai dina, era sa rawata me ra viri vatu ka vanataka na gasau e na dakai dina e na ligadra i matau se na ligadra i mawi; ka ra sa weka i Saula na Penijamini.

3O Eieseri sa liu, kei Joasa, erau tagane ka luve i Simaa na kai Kipea; kei Jisieli, kei Peleti, erau luve i Asimavece ka tagane; kei Piraka, kei Jeu na kai Anacoci,

4kei Isimaia na kai Kipioni, a tagane qaqa vei ira na lewe tolusagavulu, a sa nodra turaga na le tolusagavulu; kei Jeremaia, kei Jeesieli, kei Joenani kei Josapati na kai Kitera,

5ko Elusei, kei Jirimoci, kei Pialaia, kei Semaraia, kei Sefataia na luve i Arufi;

6ko Ilikana, kei Isaia, kei Esareli, kei Joeseri, kei Jasopiami, ko ira na luve i Kora;

7kei Joela, kei Sepataia, koi rau na tagane na luve i Jiroame mai Kitori.

Eso Vei Ira na Mataqali i Kata ka Muri Tevita

8Ka so vei ira e na yavusa i Kata era vuki vei Tevita, ka ra tiko kaya e na koro ni drodro mai na vanua lala, a ra sa tamata qaqa ka dauia nai valu, a ra sa dautaura nai sasabai kei na moto; a sa vaka na mata ni laione na matadra, a sa totolo me vaka na me kila e na veiulunivanua;

9ai matai ko Esa, ai karua ko Opetaia, ai katolu ko Iliavi;

10ai kava ko Misimana, ai kalima ko Jeremaia;

11ai kaono ko Atai, ai kavitu ko Ilieli;

12ai kawalu ko Joenani, ai kaciwa ko Elisapati;

13ai katini ko Jeremaia, ai katinikadua ko Makipanai.

14O iratou oqo eratou tagane na luve i Kata, eratou sa kavetani vei ira na mataivalu; o koya sa lailai sobu sa lewa e le dua na drau, ia ko koya sa levu cake sa lewa e le dua na udolu.

15Sai ira oqo era sa lako ki tai kadua ni Joritani e nai matai ni vula, ni sa luvu na batina kecega; a ra sa vakasevi ira kecega era sa tiko e na veibuca, o ira mai na tokalau kei ira mai na ra talega.

Ko Ira na Penijamini kei na Juta era Muri Tevita

16A sa lako mai kivei Tevita ki na koro ni drodro eso vei ira na luve i Penijamini kei Juta.

17A sa lako yani ko Tevita me tavaki ira, ka sa kaya vei ira, “Kevaka dou sa lako vakavinaka mai vei au me vukei au, ena kabiti kemudou na lomaqu; ia, kevaka dou sa lako mai me temaki au vei ira na noqu meca, ni sa sega na ca e na ligaqu, me raica mada na nodra Kalou na noda qase, ka cudruvaka.”

18Sa qai lutu mai na Yalo kivei Amasai, o koya sa liu vei ira na turaga oqo, a sa kaya,

“Keitou sa nomuni ga, i Tevita;

ka keitou mai totaki kemuni, na luve i Jese!

Mo ni vakacegu sara koi kemuni,

me ra vakacegu talega ko ira era sa vukei kemuni!

Ni sa vukei kemuni na nomuni Kalou.”

Sa qai vakacegui ira ko Tevita, ka lesi ira me ra turaga ni mataivalu.

Na Lewe ni Mataqali i Manasa era Muri Tevita

19A sa vuki kivei Tevita eso vei ira na Manasa, ni sa lako vata ko koya kei ira na kai Filisitia, me veivala kei Saula; a ra sa sega ni vukei ira; ni ra sa bose ko ira na nodra turaga na kai Filisitia, ka ra sa talai koya tani, ka kaya, “Ena vuki tale ko koya kivei Saula na nona turaga, ena qai tamusuki kina na uluda.”

20Ni sa lako ko koya ki Sikilaki, sa vuki vua mai vei ira na Manasa ko Atina, kei Josapati, kei Jitieeli, kei Maikeli, kei Josapati, kei Ilaiu, kei Silicei, eratou sa turaga ni nodra veiudolu na Manasa.

21A ra sa vukei Tevita me vala kei ira na mataivalu daubutako; ni ra sa tamata qaqa ka doudou kecega, a ra sa kavetani vei ira na mataivalu.

22Ia e na gauna oqori era sa lako tiko e na veisiga kecega kivei Tevita eso me vukei koya, a sa yaco kina mei valu levu, me vaka nai valu ni Kalou.

Na Mataivalu i Tevita e Epironi

23Ia oqo na kedrai wiliwili na veimataivalu sa vakarau tu ki nai valu, era sa lako mai kivei Tevita ki Epironi, me vukica vei koya na matanitu i Saula, me vaka na vosa i Jiova.

24Sa le ono na udolu ka walu na drau vei ira na yavusa i Juta sa dau nodra i yaragi nai sasabai kei na moto, ka ra sa vakarau tu ki nai valu.

25Sa le vitu na udolu ka dua na drau vei ira na yavusa i Simione, era tamata kaukauwa ka qaqa sara e nai valu.

26Sa le va na udolu ka ono na drau vei ira na yavusa i Livai.

27A sa veiliutaki vei ira na Eroni ko Jioiata, a sa tiko kaya e le tolu na udolu ka vitu na drau.

28Kei Setoki, e dua na cauravou kaukauwa ka qaqa sara, ka le ruasagavulu ka rua na turaga mai na vale i tamana.

29A sa le tolu na udolu vei ira na yavusa i Penijamini, era sa weka i Saula, ka ni ra sa lewe vuqa vei ira era a vakatawa na vale i Saula ka yacova na gauna oqo.

30A sa le rua na oba ka walu na drau (20,800) vei ira na luve i Ifereimi, a ra tamata kaukauwa ka qaqa, ka tamata rogo e na vale ni nodra qase.

31Ia vei ira na yavusa-veimama i Manasa, sa le dua na oba ka walu na udolu (18,000), sa cavuti na yacadra yadua, me ra lako mai ka buli Tevita me tui.

32Ia vei ira na luve i Isakari, era sa vuku e na ka ni gauna oqori, me ra kila na ka sa dodonu me ra kitaka ko ira na Isireli; o ira era sa liu vei ira era sa le rua na drau; ia sa vakarorogo tiko kivei ira ko ira vakaaduaga na wekadra.

33Sa le lima na oba (50,000) vei ira na Sevuloni, era sa lako rawa ki nai valu, ka tuvai ira rawa ki nai valu, e nai yaragi kecega ni valu, era daulako vakayatuni; ka ra sa sega ni lomalomarua.

34A sa le dua na udolu na turaga-ni-valu vei ira na Navitalai, a sa duavata kei ira e le tolusagavulu ka vitu na udolu sa vakasasabai ka vakamoto.

35Ia vei ira na Tani era sa tuva rawa nai valu sa le ruasagavulu ka walu na udolu ka ono na drau.

36Ia vei ira na Aseri, sa le va na oba (40,000) era sa yaga me lako ki nai valu, ka tuva rawa nai valu.

37Ia mai tai kadua ni Joritani, mai vei ira na Rupeni, kei ira na Kata, kei na yavusa-veimama i Manasa, sa le oba vakatinikarua (120,000), a ra sa taura nai yaragi kece e yaga e nai valu.

38O ira kece na tamata i valu oqo, era lako rawa ni ra sa yatuni tu, era sa lako mai e na loma dina ki Epironi, me buli Tevita me nodra tui kece na Isireli; ia ko ira kece tale na Isireli, era sa yalovata me ra buli Tevita me tui.

39A ra sa tiko vata kei Tevita mai kea ka bogi tolu, a ra sa kana ka gunu, ni sa vakarautaka na kedra ko ira na wekadra.

40Ia ko ira talega era sa tiko voleka, ko ira na Isakari, kei ira na Sevuloni, kei ira na Navitalai, era sa kau kakana mai ni ra vakavodoka ki na asa, kei na kameli, kei na meule, kei na bulumakau—na kedra madrai droka, nai buli lolo, kei nai soso vua-ni-vaini, kei na waini, kei na waiwai, kei na bulumakau, kei na sipi e dua na ka levu sara, ni sa marau ko ira na Isireli.