1 Veigauna 29 - Ai Vola Tabu (Vakadewa Makawa Vakavoutaki 2021)（FRV21）

Na Veisolisoli Eso me Tara Kina na Valenisoro

1 1Vei 22.5 Sa kaya talega ko Tevita na tui vei ira kece era soqoni tu, “Ko Solomoni na luvequ, ko koya duaduaga sa digitaka ko koya na Kalou, sa gone ga ka sa daurerere, ka sa rui levu na cakacaka; ni sa sega ni nona na tamata na vale vakaturaga oqo, sa nei Jiova ga na Kalou.

2Ia ka'u sa vakarautaka e na noqu i gu kece, ki na nona vale na noqu Kalou, na kena koula ni yaya koula, kei na kena siliva ni yaya siliva, kei na kena parasa ni yaya parasa, na kena kaukamea ni yaya kaukamea, kei na kau ni yaya kau; na vatu onikisa, kei na vatu me vonoti, na vatu sa serau ka veivolavolai, kei na vatu talei kece, kei na vatu vulavula, na ka levu.

3Ia ni'u a lomana vakalevu na vale ni noqu Kalou, nai yau sa noqu vakadodonu, na koula kei na siliva, au sa solia me yaga ki na vale ni noqu Kalou, me kenai kuri ni ka kecega au sa vakarautaka oti me yaga e na vale tabu,

4io sa tolu na udolu na taledi koula, na koula mai Ofa, a sa vitu na udolu na taledi siliva dina, me botani kina na lalaga ni veivale,

5na koula ni yaya koula, kei na siliva ni yaya siliva, kei na nodra cakacaka kecega na matai. Ia ko cei sa vinakata me solia na nona cakacaka e na siga edaidai kivei Jiova?”

6Sa ra qai solia vakayalovinaka ko ira na turaga qase, kei ira na turaga ni nodra veiyavusa na Isireli, kei ira na turaga ni yayaudolu kei na yayadrau, kei ira sa lewa na nona cakacaka na tui.

7A ra sa solia, ki na cakacaka ni vale ni Kalou, na koula sa lima na udolu na taledi kei na tarama e dua na oba (170 na tani), kei na siliva sa tini na udolu na taledi (sivia e 340 na tani), kei na parasa sa tinikawalu na udolu na taledi (620 na tani), kei na kaukamea sa dua na drau na udolu na taledi (sivia e 3,400 na tani).

8Ia ko ira sa nodra na vatu talei eso, era sa solia kivei Jieli na luve i Kerisoni me tu vata kei nai yau ni vale i Jiova.

9Sa ra qai marau ko ira na tamata ni ra a solia e na vinakata, ni sa dina na lomadra ni ra sa solia kivei Jiova e na yalo e vinakata. A sa marau talega vakalevu sara ko Tevita na tui.

Sa Vakacaucautaka na Kalou ko Tevita

10A sa ia na vakavinavinaka kivei Jiova ko Tevita e na matadra na soqoni taucoko, ka sa kaya ko Tevita, “Mo ni kalougata tiko, koi kemuni Jiova na Kalou i Isireli na tama i keimami, ka tawa mudu.

11Maciu 6.13I Jiova, ko ni sa cecere, sa nomuni ga na kaukauwa, kei na lagilagi, kei na gumatua, kei na ka vakaturaga. Ni sa nomuni ga na ka kecega mai lomalagi, kei vuravura; sa nomuni na matanitu, kemuni Jiova, ia ko ni sa cecere cake me ulu ni ka kecega.

12Ia sa taka mai vei kemuni nai yau kei na vakarokoroko, a sa yaco na nomuni lewa ki na ka kecega; a sa tiko e ligamuni na kaukauwa kei na qaqa, sa rawarawa talega ki na ligamuni me vakalevulevuya na tamata kece, ka vakaukauwataka.

13Ia oqo, na neimami Kalou, keimami sa vakavinavinaka vei kemuni, ka seretaka na yacamuni sa vakarokorokotaki.

14“Ia ko cei koi au, se ko cei ko ira na noqu tamata, me rawarawa kina vei keimami me soli-ka e na yalo e vinakata vakaoqo? Ni sa taka mai vei kemuni na ka kecega, ka sa nomuni ga na ka keimami sa solia vei kemuni.

15Ni keimami sa vulagi e matamuni, ka kai tani, me vakataki ira kece na tama i keimami. Sa vaka na yaloyalo na neimami siga e vuravura, ka sega e tiko dei.

16Kemuni Jiova na neimami Kalou, nai yau kece oqo keimami sa vakarautaka me tara kina e dua na vale me nomuni me tiko kina na yacamuni tabu, sa rawa mai na ligamuni, a sa nomuni kecega.

17Au sa kila talega, noqu Kalou, ni kemuni sa dauvakatovolea na yalo, ia ko ni sa vinakata na yalododonu. Koi au, ni sa dodonu na yaloqu au sa solia na ka kecega oqo e na yalo e vinakata, ia ka'u sa qai raica e na marau na nomuni tamata, era sa tiko eke, me soli-ka vei kemuni e na yalo e vinakata.

18Kemuni Jiova, na Kalou i Eparaama, kei Aisake, kei Isireli, na tama i keimami, mo ni vakadeitaka na ka oqo vei ira na nomuni tamata me ra vakananuma tiko kina e na lomadra, ka tawa mudu, ia mo ni vakarautaka na lomadra vei kemuni;

19ia mo ni solia kivei Solomoni na luvequ na yalo sa dina, me vakabauta na nomuni vakaro, na nomuni vakadinadinataki, kei na nomuni lesilesi, ka me kitaka kece, ka me tara ko koya na vale vakaturaga au sa vakarautaka kina na kenai yaya.”

20A sa kaya ko Tevita vei ira kece era soqoni tu, “Ni mai vakavinavinaka vei Jiova na nomuni Kalou.” A ra sa ia na vakavinavinaka ko ira nai soqosoqo taucoko kivei Jiova na nodra Kalou na tamadra, ka vakacuva na uludra, ka vakarokoroko vei Jiova, kei na tui.

21A ra sa vakamatea nai soro eso vei Jiova, ka vakacabora nai soro kama eso kivei Jiova, e na mataka cake, sa dua na udolu na bulumakau, e dua na udolu na sipi tagane, e dua na udolu na lami, kei na kedrai madrali gunuvi, kei nai madrali e vuqa me rauti ira kecega na Isireli;

22a ra sa kana ka gunu e na mata i Jiova e na siga ko ya, ka sa levu na nodra marau.

Sa Lumuti ko Solomoni me Tui

A ra sa buli Solomoni tale na luve i Tevita me tui e nai karua ni gauna; a ra sa lumuta vei Jiova me turaga sa liu, kei Setoki talega me bete.

231Tui 2.12Sa qai tiko ko Solomoni e nai tikotiko vakaturaga i Jiova me tui, mei sosomi kei Tevita na tamana, ka sa tamata yaco; ka sa talairawarawa vua ko ira kecega na Isireli.

24A ra sa vakamalumalumutaki ira kivei Solomoni na tui ko ira kece na turaga, kei ira na tamata qaqa, kei ira kece talega na luve i Tevita na tui.

25A sa vakalevulevui Solomoni vakalevu e matadra kece na Isireli ko Jiova, ka solia vua na ka vakaturaga, sa sega ni vakakina e dua na tui Isireli ka bula eliu.

Ai Soqoni ni Tukutuku ni Veiliutaki nei Tevita

26A sa lewa ko Tevita na luve i Jese vei ira kecega na Isireli.

272Samu 5.4,5; 1Vei 3.4Ia na gauna sa lewai ira kina na Isireli sa vasagavulu na yabaki; sa lewa tiko mai Epironi ka yabaki vitu, ka sa lewa tiko mai Jerusalemi ka yabaki tolusagavulu ka tolu.

28A sa mate ko koya ni sa vuqa vakavinaka na nona yabaki, sa qase vinaka mai, ka levu na nona i yau, kei na vakarokoroko. A sa tui ko Solomoni na luvena, me kenai sosomi.

29Ia na cakacaka i Tevita na tui, eliu, e muri talega, raica, sa volai e nai vola i Samuela na daurai, kei nai vola i Necani na parofita, kei nai vola i Kata na daurai,

30kei na nona lewa kecega, kei na nona kaukauwa, kei na veika sa yaco vua e na nona gauna, vei ira talega na Isireli, vei ira talega na veimatanitu kecega ni veivanua.