Vakatekivu 37 - Ai Vola Tabu (Vakadewa Makawa Vakavoutaki 2021)（FRV21）

Ko Josefa kei na Nona Tadra

1A sa tiko ko Jekope e na vanua ka tiko vulagi kina ko tamana, e na vanua ko Kenani.

2Oqo nai tukutuku ni vuvale i Jekope.

Sa tinikavitu na yabaki i Josefa, ka sa dauvakania na sipi kei ira vata na tuakana; a sa dautiko na gone kei rau na luve i Pila, kei rau na luve i Silipa, a watina lalai nei tamana; a sa dau kauta mai kivei tamana ko Josefa na kedratou i tukutuku rogorogo ca.

3A sa levu na loloma i Isireli vei Josefa, ka lailai vei ira kecega na luvena, ni sa luvena ni sa qai qase mai; a sa cakava vei koya e dua na kote veivolavolai duidui-roka.

4Ia sa raica na tuakana ni sa levu na nona loloma na tamadra vei koya, ka lailai vei ira kece na tuakana, ka ra sa qai cati koya, a ra sega ni vosa vinaka rawa vua.

5A sa tadra ko Josefa, ka tukuna vei ira na tuakana, a ra qai cati koya vakalevu.

6A sa kaya vei ira ko koya, “Dou rogoca mada na noqu tadra.

7Raica, eda a vau sila tiko mai na were, ka sa tucake na noqu i vau, ka wavu tu; ka sa tu vakavolivolita na nomudou i vau, ka cuva e na vakarokoroko ki na noqu i vau.”

8A ra sa kaya vua ko ira na tuakana, “Ko na lewa dina beka vei keitou? Se ko na veiliutaki dina beka vei keitou?” A ra sa cati koya vakalevu sara e na vuku ni nona tadra, kei na nona vosa.

9A sa tadra tale ko koya, ka tukuna vei ira na tuakana, a sa kaya, “Raica, ka'u sa tadra tale; sa cuva e na vakarokoroko vei au na mata-ni-siga, kei na vula, kei na kalokalo e tinikadua.”

10Ia ni sa tukuna vei tamana kei ira talega na tuakana, a sa vunauca ko tamana, ka kaya vua, “A mataqali tadra vakacava oqo ko sa raica? Ena lako beka mai koi au kei tinamu kei ira na tuakamu, ka cuva ki na qele kivei iko?”

11Caka 7.9A sa vuvutaki koya kina ko ira na tuakana, ia sa nanuma voli ga na ka oqo ko tamana.

Volitaki ko Josefa ka Kau ki Ijipita

12A ra sa lako na tuakana me ra vakania na sipi nei tamadra mai Sikemi.

13A sa kaya vei Josefa ko Isireli, “Era sega li ni la'ki vakania na sipi mai Sikemi na tuakamu, ne? Lako mai, me'u talai iko mada vei ira.” A sa kaya ko koya, “Koi au oqo.”

14A sa kaya vua ko koya, “Mo lako mada, mo raica se ra tiko vinaka na tuakamu kei na qele ni sipi, se segai; ka qai kauta tale mai vei au na kenai tukutuku.” A sa talai koya yani mai na buca ko Epironi.

A sa lako yani ko koya ki Sikemi,

15ka sa kunei koya e dua na tamata ni sa lako sese voli mai veikau; a sa tarogi koya na tamata, “A cava ko sa vakasaqara voli?”

16A sa kaya, “Au sa vakasaqarai iratou tiko na tuakaqu. Yalo vinaka, mo ni tukuna mada vei au na vanua era vakania tiko kina na sipi.”

17A sa kaya na tamata, “Eratou sa lako oti yani eke, ni'u sa rogoci iratou ni ratou kaya, ‘Tou lako yani ki Tocani.’ ” A sa qau muri iratou na tuakana ko Josefa, ka kunei iratou mai Tocani.

18A ra sa raici koya mai ni se yawa tiko yani, ia ni se bera ni volekati ira, era sa bukia na kena vere me ra vakamatea.

19A ra sa veikayaka vakai ira, “Raica, sa lako mai oqo na dautadra ko ya.

20Tou ia mada, tou vakamatea ka biuta ki na dua nai keli; eda na qai tukuna vaka ne ni sa dua na manumanu kila sa kania, ka da na qai raica kina se na yaco vakacava na nona tadra.”

21Ia ni sa rogoca ko Rupeni, a sa vakabulai koya mai na ligadra, ni sa kaya, “Tou kakua ni vakamatea.”

22Sa kaya vei iratou ko Rupeni, “Dou kakua ni vakadave-dra, dou biuti koya ga ki nai keli oqo e na loma ni vanua lala, ia dou kakua ni yavita”—ka ni sa nakita me vakabulai koya mai na ligadra ka vakasuka tale vei tamana.

23Ia ni sa qai yaco mai ko Josefa vei ira na tuakana, era sa luvata tani vei Josefa na nona kote veivolavolai duidui-roka sa vakote kina ko koya.

24A ra sa qai kauti koya ka biuta ki nai keli. A sa di nai keli; sa sega kina na wai.

25A ra sa qai tiko sobu me ra kana. A ra sa ta cake, ka rai yani, ka raica, sa dua nai vavakoso vei ira na luve i Isimeli era sa lako mai Kiliati, kei na nodra kameli, era sa kauta voli na ka boi vinaka, kei nai lumu wainimate, kei na mura, ka ra kauta sobu tiko ki Ijipita.

26A sa kaya ko Juta vei ira na veitacini, “A cava na kena yaga kevaka eda vakamatea na tacida, ka vunia na kena dra?

27Tou ia mada ka volitaki koya kivei ira na luve i Isimeli, ia me da kakua ni vakamatea, ni sa tacida, ka tiki ni yago vata.” A ra sa vakadonuya vata na veitacini.

28Caka 7.9Ni ra sa yaco yani ki kea eso na kai Mitiani era tamata dauveivoli, eratou sa qai laveti Josefa cake mai nai keli, ka ratou volitaki koya vei ira na luve i Isimeli e na ruasagavulu na tiki ni siliva. A ra sa kauti Josefa ki Ijipita.

29Ni sa lesu yani ki nai keli ko Rupeni ka raica ni sa sega ni tiko e nai keli ko Josefa, sa qai dresulaka na nona i sulu,

30ka lesu vei ira na veitacini, ka kaya, “Sa yali na gone, ia koi au, ka'u na qai lako beka vei cei?”

31A ratou sa qai taura na kote i Josefa, ka vakamatea e dua na me, ka lomoca na kote e na dra.

32A ra sa vakasuka na kote veivolavolai duidui-roka, ka kauta vei tamadra, ka ra sa kaya, “Keitou sa kunea ga oqo; mo raica mada se na kote nei na luvemu, se segai.”

33A sa kila ko koya, ka kaya, “Isa, oqo na kote nei luvequ! Sa kani koya na manumanu kila; sa sega ni vakatitiqataki ni sa dresulaki vakaidina ko Josefa.”

34A sa qai dresulaka na nona i sulu ko Jekope, ka vauca nai sulu taqarotu ki na tolona, ka tagicaka na luvena ka bogi vuqa.

35A ratou sa tovolea kece na luvena tagane kei na luvena yalewa kecega me ra vakacegui koya, ia sa bese ga ni via vakacegui, ka sa kaya, “E sega, au na lako sobu ga ki bulu ki vua na luvequ, ka tagicaki koya.” A sa vakaloloku voli ga kina ko tamana.

36Ia, era sa volitaki koya oti na kai Mitiani ki Ijipita kivei Potifa, na vakailesilesi i Fero, ka kavetani ni valu i vakatawa.