Aisea 24 - Ai Vola Tabu (Vakadewa Makawa Vakavoutaki 2021)（FRV21）

Ena Cudruva na Vanua ko Jiova

1Raica, sa vakalalataka na vanua ko Jiova, sa vakatoboicutaka,

ka sa dui vakasevi ira era tiko kina.

2Ia ena yaco vua na bete, me vaka sa yaco vei ira na tamata;

vua talega na turaga, me vaka vua na nona tamata;

vua na marama, me vaka vua na nona vada;

vua sa volitaka, me vaka vua sa volia;

vua sa solia me talevaki, me vaka vua sa kerea;

vua sa taura na kenai kere, me vaka vua sa solia na kenai kere.

3Ena vakalalataki sara na vanua, ka vakacacani sara;

ni sa cavuta na vosa oqo ko Jiova.

4Sa tagi na vanua, ka sa malai yani,

sa ceguoca ko vuravura, ka sa malai yani;

ko ira era turaga e vuravura, era sa ceguoca mai.

5Sa vakadukadukalitaki talega ko vuravura

e na vuku ni lewena;

ni a sa talaidredre ki na vunau,

era sa vakatanitaka nai lesilesi,

era sa voroka na veiyalayalati tawa mudu.

6O koya oqo sa kani vuravura kina na cudru,

a ra sa vakacalai ko ira era sa tiko kina;

o koya oqo sa vakamai kina na lewe i vuravura,

ka ra lewe lailai na tamata sa vo tiko.

7Sa tagi na waini vou,

sa malai na vaini,

ko ira na yalo daureki era sa vutugu.

8Sa mudu na vakamarautaki ni tibereli,

sa oti na kedra rorogo na daumarau,

sa mudu na vakarekitaki ni api.

9Era na sega ni ia vata na gunu waini kei na meke;

ena gaga na yaqona vei ira sa gunuva.

10Sa basuki sobu na koro sa lala,

sa sogo tu na veivale kecega, me sega e curu kina.

11Sa ra tagi e na saqata ni koro e na vuku ni waini,

sa dromu kecega na reki;

sa yali na marau ni vanua.

12Sa vo ga na rusa e loma ni koro,

ka sa basubasuki sara na matamata-ni-koro.

13Ia ena vakaoqo e loma i vuravura

e na kedra maliwa na veimatanitu,

ena vaka ni sa kurei na olive,

ka vaka ni sa tomitomiki na vua-ni-vaini ni sa oti na vula i vaini.

14Era na tabalaka na domodra, era na ia na sere

e na vuku ni nona tiko vakaturaga ko Jiova,

era na kaikaila mai waitui.

15O koya oqo dou vakavinavinakataki Jiova kina;

mai na veiyanuyanu ni wasawase me vakarokorokotaki na yaca i Jiova, na Kalou ni Isireli.

16Mai nai yalayala kei vuravura eda sa rogoca na sere,

io na vakavinavinaka vua na yalododonu.

Ia ka'u a kaya, “Ulei koi au,

ulei koi au, au sa ca!

Era butako na daubutako;

io, era butako vakalevu ko ira na daubutako.”

17A rere, kei nai keli, kei nai cori,

sa qai yacovi iko, na lewe-ni-vanua!

18Ia ena yaco, ko koya sa na dro mai na nodra qoqolou ni rere

ena lutu ki nai keli;

ko koya talega sa cabe cake mai nai keli

ena coriti e nai cori.

Ni sa tadola nai sogo kei lomalagi,

ka sa yavala na yavu kei vuravura.

19Sa basubasuki ko vuravura,

sa kavida sara ko vuravura,

sa vakayavalati vakalevu ko vuravura.

20Sa yatayata ko vuravura me vaka na daumateni,

ka sa veisuayaki me vaka nai mocemoce lilili;

ia sa bitaki koya na kena talaidredre,

ena bale, ka sega ni tucake tale.

21Ia ena yaco e na siga ko ya, ena qai cudruva ko Jiova

nai vavakoso cecere sa tiko e na tikina cecere,

kei ira na tui kei vuravura e dela i vuravura.

22A ra na vakasoqoni vata

me vaka na bobula e nai keli;

a ra na sogolati e na valeniveivesu,

ia ni sa oti na bogi vuqa era na qai totogi.

23Ena qai taqaya na vula,

ka madua na mata-ni-siga;

ni na lewa ko Jiova-ni-lewevuqa

mai na Ulunivanua ko Saioni kei Jerusalemi,

me vakarokorokotaki e matadra na kena qase.