Vakarua 31 - Ai Vola Tabu (Vakadewa Makawa Vakavoutaki 2021)（FRV21）

Veisosomitaki ko Josua e na Veiliutaki(Tiko mai na Lekutu 27.12-23)

1A sa lako ko Mosese ka tukuna na vosa oqo vei ira kecega na Isireli.

2Tiko 20.12A sa kaya vei ira, “Sa dua na drau ka ruasagavulu na noqu yabaki e na siga oqo. Sa dredre vei au me'u daulako tiko yani ka daulako mai. A sa kaya vei au ko Jiova, ‘O na sega ni lako kosova na Joritani oqo.’

3Ko Jiova na nomuni Kalou ena liutaki kemuni ko koya. Ena vakarusai ira na veimatanitu oqo ko koya e matamuni, ia ko ni na rawai ira. Ko Josua, ena liutaki kemuni ko koya, me vaka sa kaya ko Jiova.

4Tiko 21.21-35Ia ena cakava vei ira ko Jiova me vaka na ka sa cakava vei Sioni kei Oki, na nodra tui na Amoraiti, ki na nodrau vanua talega, koi rau sa vakarusa ko koya.

5Ia ena soli ira vei kemuni ko Jiova, mo ni kitaka vei ira me vaka nai vakaro kecega ka'u sa vakarota vei kemuni.

6Mo ni kaukauwa ka qaqa. Kakua ni rere se sautaninini e na vukudra, ni sa lako vata kei kemuni ko Jiova na nomuni Kalou. Ena sega ni weletaki kemuni se biuti kemuni.”

7A sa kacivi Josua ko Mosese, ka sa kaya vua e matadra kecega na Isireli, “Mo kaukauwa ka qaqa, ni ko na lako kei ira na tamata oqo ki na vanua sa bubului kina ko Jiova vei ira na nodra qase me solia vei ira; ia ko na kauti ira me ra taukena.

8Josua 1.5; Ipe 13.5Ia ko Jiova ga, sa liutaki iko. Ena tiko vata kei iko ko koya; ena sega ni weletaki iko se biuti iko. Mo kakua ni rere se yalolailai.”

Na Wiliki ni Vunau e nai Kavitu ni Yabaki

9A sa vola na vunau oqo ko Mosese, ka solia vei ira na bete na Livai, era daucolata na kato ni veiyalayalati i Jiova, vei ira talega na qase kecega ni Isireli.

10Vrua 15.1; 16.13-15A sa vakaroti ira ko Mosese, ka kaya, “Ni oti na yabaki e vitu, e na gauna sa lokuci me yabaki ni veisereki, e na solevu ni vale tabanikau,

11ni ra sa lako kecega mai na Isireli me rairai e na mata i Jiova na nomuni Kalou e na yasana sa digitaka ko koya, mo ni wilika na vunau oqo vei ira kecega na Isireli me ra rogoca.

12Mo ni vakasoqoni ira na tamata—na tagane, kei na yalewa, kei na gone lalai, kei na nomuni kai tani sa tiko e na nomuni lomanibai—me ra rogoca ka vulica kina na rerevaki Jiova na nomuni Kalou, ka vakabauta me ra cakava na vosa kecega ni vunau oqo,

13ka me ra rogoca ko ira na luvedra era sa sega ni kila eliu, ka me ra vuli me ra rerevaki Jiova na nomuni Kalou, e na gauna kecega ko ni na bula kina e na vanua ko ni sa qalo kosova kina na Joritani mo ni taukena.”

Ciqoma ko Mosese kei Josua na Veivakaroti ni Kalou

14A sa kaya vei Mosese ko Jiova, “Raica, sa toro mai na nomu siga mo mate kina. Kacivi Josua, ka la'ki vakaraitaki kemudrau e na vale ni veitavaki, me'u tauca vua nai vakaro.” A rau a lako ko Mosese kei Josua ka vakaraitaki rau e na vale ni veitavaki.

15A sa rairai mai ko Jiova e na Vale tabu e na duru o. A sa tu na duru o ka donuya na katuba ni Vale tabu.

16A sa kaya vei Mosese ko Jiova, “Raica, ko na moce vata kei ira na nomu qase. Ia na tamata oqo era na lako vakatani ni ra muria na veikalou tani ni lewe ni vanua era la'ki tiko e na kedra maliwa, ia era na biuti au, ka vakacataka na noqu veiyalayalati ka'u a cakava kei ira.

17Ena qai waqa mai na noqu cudru vei ira e na siga ko ya, ia ka'u na biuti ira, ka vunia vei ira na mataqu, era na coriti vakarawarawa, ka na yacovi ira na ka ca e vuqa kei na rarawa. Era na kaya kina e na siga ko ya, ‘Sa sega li ni yacovi keda na ka ca kecega oqo, ni sa sega ni tiko kei keda na noda Kalou?’

18Ia ka'u na vunia vakaidina na mataqu e na siga ko ya, e na vuku ni ka ca kecega era sa cakava, ni ra sa vuki ki na kalou tani eso.

19“Ia oqo, mo vola me nomudou na sere oqo, ka vakavulica vei ira na Isireli. Mo tauca ki na gusudra, me kenai vakadinadina vei au na sere oqo e na vukudra na Isireli.

20Ni'u sa kauti ira oti ki na vanua sa dave kina na sucu kei na oni, ka'u a bubului kina vei ira na nodra qase; a ra sa kana ka mamau, ka ra levulevu mai; era na qai vuki ki na kalou tani eso, ka qaravi ira, ka beci au, ka vakacataka na noqu veiyalayalati.

21Ia ni sa yacovi ira na ka ca kei na ka rarawa e vuqa, ena qai tukuni ira na sere oqo me vaka nai vakadinadina; ni na sega ni guileca mai na gusu ni nodra kawa. Ni'u sa kila na nodra i naki era sa veinanuyaka tiko e na gauna oqo, ni'u se bera ni kauti ira ki na vanua ka'u a bubului kina.”

22A sa vola na sere oqo ko Mosese e na siga ko ya, ka vakavulica vei ira na Isireli.

23 Tiko 27.23; Josua 1.6 A sa vakaroti Josua na luve i Nuni, ka kaya, “Mo kaukauwa ka qaqa, ni ko na kauti ira na Isireli ki na vanua ka'u a bubului kina vei ira. Ia ka'u na tiko vata kei iko.”

24Ni sa vola oti na vosa ni vunau oqo e na dua nai vola ko Mosese me yacova sara ni sa oti vinaka,

25sa qai vakarota ko Mosese vei ira na Livai era daucolata na kato ni veiyalayalati i Jiova, ka kaya,

26“Mo ni kauta nai vola ni vunau oqo, ka vakotora e na yasa ni kato ni veiyalayalati i Jiova na nomuni Kalou, ka me toka mai kina me i vakadinadina ni veibeitaki e baleti kemuni.

27Ni'u sa kila na nomuni talaidredre kei na nomuni domoqa. Raica, ni'u sa bula tiko kei kemuni e na siga oqo, ko ni sa talaidredre ga vei Jiova. Ena vakaevei li na kena levu cake ni'u sa mate!

28Ni vakasoqoni ira vata vei au na qase kecega ni nomuni veiyavusa, kei ira na nomuni vakailesilesi, me'u tukuna e daligadra na vosa oqo, ka cavuti lomalagi kei vuravura me kilai ira ni ra sa ca.

29Ni'u sa kila, ni'u sa mate, ko ni na vakacacani kemuni sara, ka lesu tani mai na sala ka'u sa vakarota vei kemuni; ena yacovi kemuni talega na ca e na gauna mai muri; ni ko ni na caka ca e na mata i Jiova, me vakacudrui koya e na cakacaka ni ligamuni.”

Na Sere i Mosese

30A sa cavuta na vosa ni sere oqo ko Mosese e daligadra kecega nai soqosoqo ni Isireli, me oti sara.