Jope 5 - Ai Vola Tabu (Vakadewa Makawa Vakavoutaki 2021)（FRV21）

Sa Vakadodonutaki Jope na Kalou

1“Mo kaci mada; e na tiko beka e dua ka via rogo mai vei iko?

Ia ko cei vei ira na yalosavasava ko na goleva?

2Ni sa vakamatea na tamata lialia na yalo ca,

ka sa vakarusai koya sa yalowai na loma vuvu.

3Au sa kunea na lialia ni sa vakawakana tu,

ia ka'u a kaya vakasauri me sa ca na nona i tikotiko.

4Sa sega ni maroroi vinaka ko iratou na luvena,

a ra sa butuqaqi mai na matamata-ni-koro,

ka sa sega e dua me vakabulai ira.

5Sa kania na kedra vuata ko koya sa viakana,

ka sa kauta tani mai na loma ni kau votovotoa,

ka sa tiloma na nodra i yau ko koya sa viagunu.

6E dina sa sega ni tubu na ca mai na kuvu-ni-soso,

ka sa sega ni tubu mai na qele na rarawa;

7ia sa sucu ga na tamata me kune rarawa,

me vaka ni sa dauvuka cake na lidi-ni-buka.

8“Ia koi au, ka'u na golevi koya kina na Kalou,

ka'u na vakacabora na noqu gagadre vua na Kalou.

9Ko koya sa daucakava na veika levu ka sa sega ni kilai rawa,

na veika e veivakurabuitaki sa sega ni wili rawa.

10Ko koya sa vakatauca na uca ki vuravura,

ka sa solia na wai ki na veiwere;

11me vakatikori ira ki cake era tiko e ra,

me ra vueti cake me ra tiko vinaka ko ira sa dautagi.

12 1Kori 3.19 Sa vukica ko koya na nodra i lawaki na tamata qaseqase,

ka sa sega kina ni kitaka rawa na ligadra na ka era segata tiko.

13Sa coriti ira na vuku e na nodra qaseqase,

a sa biliga tani na nodra lewa na yalovakatani.

14Era sa ciciva na butobuto ni sa siga tu,

a ra sa vakayayamo voli e na siga levu me vaka e na bogi.

15Ia sa vakabula ko koya na dravudravua mai nai seleiwau

mai na gusudra, kei na ligadra na kaukauwa.

16A ka oqo sa nuidei kina ko koya na dravudravua,

ka sa sogorubu na gusuna sa sega ni dodonu.

17 Vbale 3.11,12; Ipe 12.5,6 “Raica, sa kalougata na tamata sa vunauca ko koya na Kalou;

a ka oqo mo kakua kina ni beca ni sa vakadodonutaki iko ko Koya sa Kaukauwa.

18 Osea 6.1 Ni sa vakavuna na mavoa, ia sa vadretitaka talega;

sa vakavuna na rarawa, ia sa vakabula talega e na ligana.

19E na ka rarawa e ono, ena vakabulai iko ko koya;

ia e na kenai kavitu, ena sega na ca me tauvi iko.

20Ni sa dausiga, ena vakabulai iko mai na mate,

e nai valu talega, mai na kaukauwa ni seleiwau.

21Ko na vunitaki mai na veivakamavoataki ni yame,

ia ni sa lako mai na veivakarusai, ko na sega ni rerevaka.

22Ko na dredrevaka na veivakarusai kei na dausiga,

ko na sega talega ni rerevaka na manumanu ni vanua.

23Ni dou na tovata kei na veivatu ni vanua,

ka ra na veivinakati kei iko na manumanu ni vanua.

24Ia ko na kila talega ni na sautu na nomu vale,

ia ko na taleva na nomu i tikotiko, ka na sega na ka e yali kina.

25Ko na kila talega ni ra na le vuqa na luvemu,

ia na nomu kawa ena vaka na co ni vanua.

26Ko na yaco ki na nomu i bulubulu ni ko sa qase vinaka mai,

me vaka nai vau sila sa yau yani ki na rara ni samu sila e na kena gauna.

27Raica oqo keitou sa vakadikeva, ka sa vakakina.

Mo rogoca, ka kila talega mo vinaka kina.”