Vakarua 10 - Ai Vola Tabu (Vakadewa Makawa Vakavoutaki 2021)（FRV21）

Nai Karua ni Kena Ta na Vatu Raraba e Rua(Lako Yani 34.1-10)

1“Ena gauna ko ya sa kaya vei au ko Jiova, ‘Mo taya e rua na vatu raraba, me vaka na kena eliu, ka cabe mai vei au ki na ulunivanua, ka cakava talega e dua na kato kau.

2Ia ka'u na vola e na vatu raraba na vosa sa volai e na vatu raraba eliu, o koya ko a vorolaka, ia mo qai virinoca ki loma ni kato me no kina.’

3Ia ka'u a cakava e dua na kato e na kau sitimi, ka taya e rua na vatu raraba sa vaka na kena eliu, ka'u sa cabeta na ulunivanua, ka taura tiko na vatu raraba ruarua e na ligaqu.

4A sa vola ko koya ki na vatu raraba, me tautauvata kei nai vola sa volai eliu, na vunau e tini, ka cavuta vei kemuni ko Jiova mai na ulunivanua mai loma ni bukawaqa e na siga ni soqoni levu. A sa solia mai vei au ko Jiova.

5Au a qai gole ka siro sobu mai na ulunivanua, ka tugana na vatu raraba ki loma ni kato ka'u a cakava; a rau sa no kina, me vaka ka vakarota vei au ko Jiova.”

6 Tiko 20.28; 33.38 (A ra sa lako voli ko ira na Isireli, mai Pieroci era sa taukena na luve i Jeekani, me ra lako ki Mosera. A sa ciba kina ko Eroni, ka sa bulu mai kea. A sa vakaisosomitaki koya ko Iliesa na luvena e na cakacaka vakabete.

7Era sa lako tani mai kea ki Kutikota; ka ra lako tani mai Kutikota ki Jotipaci, a vanua sa levu kina na uciwai.

8Tiko 3.5-8E na gauna ko ya sa wasea tani na yavusa i Livai ko Jiova, me ra colata na kato ni veiyalayalati i Jiova, me ra tu talega e na mata i Jiova ka me ra qaravi koya, ka me ra ia na vosa ni veivakalougatataki e na yacana, ka yacova na siga oqo.

9O koya sa sega kina na nodra tikina se ra vakaivotavota kei ira na wekadra ko ira na Livai. Ko Jiova ga sa nodra i votavota, me vaka sa kaya vei ira ko Jiova na nomuni Kalou.)

10 Lako 34.28 “Ia ka'u a tiko e na ulunivanua, me vaka eliu, me siga vasagavulu ka bogi vasagavulu; a sa vakarogoci au ko Jiova e na gauna talega ko ya; ka me sa sega ni via vakarusai kemuni ko Jiova.

11A sa kaya vei au ko Jiova, ‘Mo cavu tu, ka lako mo liutaki ira na tamata, me ra lako kina ka taukena na vanua ka'u a bubului kina kivei ira na nodra qase me'u solia vei ira.’

Me Cilivi na Yalomuni

12“Ia oqo, kemuni na Isireli, a cava na ka sa taroga vei kemuni ko Jiova na nomuni Kalou, mo ni rerevaki Jiova ga na nomuni Kalou, ka mo ni lako e na nona sala kecega ka lomani koya, ka qaravi Jiova na nomuni Kalou, e na lomamuni taucoko kei na yalomuni taucoko,

13mo ni vakabauta nai vakaro i Jiova, kei na ka sa lesia ko koya, ka'u sa vakarota vei kemuni e na siga oqo, me yaco vei kemuni na ka vinaka?

14Raica, sa nei Jiova na nomuni Kalou na lomalagi, kei na lomalagi e cake sara, na vuravura, kei na ka kecega sa tu kina.

15Ia sa marautaki ira ga na nomuni qase ko Jiova ka me lomani ira, ka sa digitaki kemuni na nodra kawa, io koi kemuni, mai vei ira na matanitu kecega, me vaka e na siga oqo.

16Ia oqo, mo ni ciliva na vuso ni yalomuni, ka mo ni kakua ni vakadomoqataki kemuni tiko.

171Timo 6.15; Vtaki 17.14; 19.16; Caka 10.34; Roma 2.11; Kala 2.6; Efe 6.9Ni sa Kalou duaduaga vei ira na kalou ko Jiova na nomuni Kalou, ka sa Turaga vei ira kece na turaga, a Kalou levu, ka kaukauwa, ka rerevaki, ko koya sa sega ni digitaka vakailoa na tamata, se taura nai solisoli ni veivaqumi.

18Sa dauia na lewa e na vukudra era sega ni vakatamani kei na yada, ka sa lomana na vulagi, ka me dausolia vua na kakana kei nai sulu.

19Ia mo ni lomani ira na vulagi, ni kemuni a vulagi mai na vanua ko Ijipita.

20Mo ni rerevaki Jiova na nomuni Kalou; mo ni qaravi koya, ka kabiti koya, ka bubului e na yacana.

21O koya ga sa nomuni ukuuku, ka sa nomuni Kalou ko koya, sa cakava vei kemuni na ka levu ka rerevaki oqo sa raica na matamuni.

22Vteki 15.5; 22.17; 46.27Era a lako sobu ki Ijipita na nomuni qase, a ra sa lewe vitusagavulu ga na tamata; ia oqo, sa qisi kemuni ko Jiova na nomuni Kalou mo ni lewe levu me vaka na veikalokalo mai lomalagi.