2 Samuela 13 - Ai Vola Tabu (Vakadewa Makawa Vakavoutaki 2021)（FRV21）

Ko Eminoni kei Tema

1Sa oti oqo, sa dua na gane i Apisalome na luve i Tevita, sa matavinaka, na yacana ko Tema. A sa domoni koya ko Eminoni na luve i Tevita.

2A sa rarawa ko Eminoni, ka tauvi mate kina e na vuku i Tema na ganena; ni sa goneyalewa tabu-tagane ko koya; ka sa nanuma ko Eminoni ni sa dredre me cakava vua e dua na ka.

3A sa dua nai tau i Eminoni, na yacana ko Jonatapi, na luve i Semea na tuakai Tevita; ia sa tamata qaseqase ko Jonatapi.

4A sa kaya vua, “A cava ko sa yago ca kina vakaoqo e na veisiga, o iko na luvena na tui? O na sega beka ni tukuna mai vei au?” A sa kaya vua ko Eminoni, “Au sa domoni Tema na gane i Apisalome na taciqu.”

5A sa kaya vua ko Jonatapi, “Mo davo sobu e na nomu i mocemoce, ka mo tauvi mate vakalasulasu. Ia ni sa lako mai me raici iko ko tamamu, mo kaya vua, ‘Me lako mada mai ko Tema na ganequ, ka vakani au, ka cakava na kakana ni'u raica tiko, ka me'u kania mai na ligana.’ ”

6A sa koto sobu ko Eminoni, ka sa tauvi mate vakalasulasu. A sa lako mai me raica ko koya na tui, a sa kaya vua na tui ko Eminoni, “Me lako mada mai ko Tema na ganequ, ka bulia e mataqu e rua na keke, me'u kania mai na ligana.”

7A sa qai talaki ki vale vei Tema ko Tevita, ka kaya, “Mo lako mada ki na vale i Eminoni na ganemu, ka vakarautaka na kena kakana.”

8A sa lako ko Tema ki na vale i Eminoni na ganena, ki na vanua sa davo koto kina ko koya. A sa kauta na madrai droka ko koya, ka natuka, ka bulia e matana eso na keke, a sa vavia na keke.

9A sa kauta na tavuteke, ka sovara e matana, ia sa bese ni kana ko koya. A sa kaya ko Eminoni, “Me lako tani vei au ki tautuba na tamata kecega.” A ra sa lako tani kina ki tautuba na tamata kecega.

10A sa kaya vei Tema ko Eminoni, “Mo kauta mai ki loma ni rumu na kakana, me'u kania mai na ligamu.” A sa taura ko Tema na keke sa cakava ko koya, ka kauta ki na loma ni rumu vei Eminoni na ganena.

11Ia ni sa kauta vua ko koya me kania, sa tauri koya ko koya, ka sa kaya vua, “Mai, me daru moce vata mada, na ganequ.”

12A sa kaya vua ko koya, “Me kakua, na ganequ, mo kakua ni vakasaurarataki au; ni sa sega ni daucaka vakaoqo e Isireli; mo kakua ni kitaka na ka lialia oqo!

13Ia koi au, me'u na kauta kivei na noqu madua? Ia ko iko, ko na okati me dua vei ira na tamata lialia e Isireli. Ia oqo, au sa kerea mo vosa mada vua na tui, ni na sega ni bureitaki au vei iko ko koya.”

14Ia sa sega ga ni via vakarorogo vei Tema ko Eminoni; ka ni sa kaukauwa cake ka malumalumu ko Tema, ka sa vakacacani koya ka moceri koya.

15A sa qai cati koya vakalevu sara ko Eminoni, ka ni sa levu cake sara na nona cati koya ka lailai na nona a domoni koya eliu. A sa kaya vua ko Eminoni, “Tu cake! Lako tani!”

16Ia sa kaya vua ko koya, “Me kakua, na ganequ, ni sa cala levu cake na nomu sa vakatalai au yani oqo, ka lailai na ka ko ya ko a cakava vei au.” Ia sa bese ga ko koya ni rogoci koya.

17Sa qai kaciva na nona tamata ka dauqaravi koya ka kaya vua, “Mo kauta tani na yalewa oqo ki tautuba, ka lokataka mai vua nai sogo ni katuba.”

18(A daramaka tiko ko koya nai sulu balavu veivolavolai, ni ra sa dauvakaisulu kina na luve ni tui era sa goneyalewa tabu-tagane.) A sa kauti koya tani ki tautuba ko koya na nona tamata, ka lokataka vua nai sogo ni katuba.

19Ia sa kaburaka ki uluna na dravusa ko Tema, ka dresulaka na nona i sulu balavu veivolavolai sa vakaisulu kina. Ka sa tabaka na uluna e na ligana, ka tagi e na domo levu ni sa lako voli.

20A sa kaya vua ko Apisalome na ganena, “Sa tiko vata li kei iko ko Eminoni na ganemu? Ia mo kakua ga ni tukuna, na ganequ. A ganemu ga ko koya; mo kakua ni rarawa e na ka oqo.” A sa tiko voli ga kina ko Tema e na vale i Apisalome na ganena, ka sa bikai ga e na rarawa.

21Ni sa rogoca na ka kecega oqo ko Tevita na tui, a sa cudru vakalevu.

22Ia ko Apisalome sa sega ni tukuna e dua na ka vinaka se na ka ca vei Eminoni, ni sa cati Eminoni ko Apisalome, baleta ni sa vakacacani Tema na ganena.

Sauma Lesu ko Apisalome na Vakacacani nei Ganena

23Ni sa oti e rua vinaka na yabaki, sa qai tiko vei Apisalome eso na tamata daukoti sipi mai Peali-asori, ko ya sa voleka ki Ifereimi, ka sa sureti ira kece mai kina na luvena tagane na tui ko Apisalome.

24A sa lako vua na tui ko Apisalome, ka kaya, “Raica, sa tiko vei au na nomuni tamata eso na tamata daukoti sipi; mo ni lako vata kei au na nomuni tamata koi kemuni na tui, kei ira talega na nona tamata.”

25Ia sa kaya vei Apisalome na tui, “Me kakua ga, na luvequ, me keitou kakua mada ni lako kece yani, de keitou sa rui vakaicolacolataki iko.” A sa cikevi koya, ia sa sega ni via lako, ka sa qai vosavakalougatataki koya ga.

26A sa kaya ko Apisalome, “Ia kevaka e segai, me lako mada kei keitou ko Eminoni na tuakaqu.” A sa kaya vua na tui, “A cava me lako kina kei iko ko koya?”

27Ia sa cikevi ga koya ko Apisalome me yacova ni sa soli Eminoni kina na tui kei iratou kecega na luvena, me ratou lako vata kaya.

28A sa vakarota ko Apisalome vei ira na nona tamata, ka kaya, “Dou raica na gauna sa marau kina na yalo i Eminoni e na waini, ka gauna ka'u kaya kina vei kemudou, ‘Dou mokuti Eminoni’, ka mo dou qai vakamatei koya. Kakua ni rere; sa sega beka ni'u vakarota oqo vei kemudou? Dou yalo doudou tiko ka qaqa.”

29A ra sa kitaka vei Eminoni ko ira na tamata i Apisalome, me vaka sa vakarota ko Apisalome. Eratou sa qai cavu tu ko ira kecega na luvena na tui, ka ra dui vodoka na nodra meule na tamata yadua, ka dro.

30Ia ni ratou sa lako tiko e na sala, sa yaco vei Tevita nai tukutuku oqo, “Sa mokuti iratou kecega na luvena na tui ko Apisalome, ka sa sega ni vo e dua vei iratou.”

31Sa qai duri cake na tui, ka dresulaka na nona i sulu, ka davo e na qele; a ra sa dresulaka talega na nodra i sulu ko ira na nona tamata era tu voleka vua.

32Ia sa vosa ko Jonatapi, na luve i Semea na tuakai Tevita, ka kaya, “Me kakua mada ni nanuma ko koya na noqu turaga ni sa vakamatei ko iratou kecega na cauravou na luve ni tui, ni ko Eminoni duaduaga sa mate. Ni sa nakita na ka oqo ko Apisalome mai na siga ka vakacacani Tema kina na ganena ko koya.

33Ia oqo, me kakua ni rarawa kina ko koya na noqu turaga na tui, me nanumi ni ratou sa mate ko iratou kecega na luvemuni na tui, ni sa mate duaduaga ko Eminoni.”

Dro ki Kesuri ko Apisalome

34Ia sa dro ko Apisalome. Ka sa ta cake na cauravou sa vakatawa, ka vakararai voli, ka raica, sa lewe vuqa na tamata era sa lako tiko mai e na sala e na yasa ni ulunivanua ki dakuna.

35A sa kaya vua na tui ko Jonatapi, “Raica, eratou sa lako mai na luvena na tui, me vaka ka'u sa kaya na nomuni tamata, ni sa yaco vakakina.”

36Ni se qai vosa oti tikoga, raica, eratou sa tadu mai na luvena na tui, ka ratou sa ia na tagi yaso. Ia na tui talega kei ira kece na nona tamata era sa tagi e na tagi levu sara.

37 2Samu 3.3 Ia sa dro ko Apisalome, ka lako vei Talimei, na luve i Amiute, na tui Kesuri. Ka sa tagicaka na luvena e na veisiga ko Tevita.

38A sa dro ga ko Apisalome, ka lako ki Kesuri, ka sa tiko mai kea ka yabaki tolu.

39A sa gadreva ko Tevita na tui me lako yani vei Apisalome, ni sa qai yalo vakacegu e na vuku ni mate i Eminoni.