1Ia e na kenai katinikawalu ni yabaki i Jeropoama na tui, sa buli me tui Juta ko Apaija.
2Sa tui tiko mai Jerusalemi ka yabaki tolu. Ia na yaca i tinana ko Mekaia, na luve i Urieli mai Kipea.
A rau sa veivaluvaluti ko Apaija kei Jeropoama.
3A sa tuvai valu ko Apaija, era sa mataivalu qaqa, sa le vasagavulu na oba (400,000) era tamata digitaki. Sa tuvai valu talega ko Jeropoama me veivaluti kaya, kei ira vata na tamata digitaki e le walusagavulu na oba (800,000), era tamata i valu qaqa.
4A sa tucake ko Apaija e na dela ni Ulunivanua ko Simareimi, oqori e na vanua veiulunivanua ko Ifereimi, a sa kaya, “Dou rogoci au mai, ko iko Jeropoama, kei kemudou kecega na Isireli;
5sa sega li ni kilikili kei kemudou, mo dou kila ni ka solia ko Jiova na nodra Kalou na Isireli vei Tevita me lewai ira na Isireli ka tawa mudu, io, vei koya kei ira na luvena, ni sa veiyalayalatitaka kei na masima.
6Ia ka sa tucake ko Jeropoama, na luve i Nipati, e dua na tamata i Solomoni na luve i Tevita, a sa vuki tani mai vua na nona turaga.
7A sa soqoni vata vei koya na tamata lialia eso, na luve ni vu-ni-ca, a ra sa vakaukauwataki ira me ra biuti Reopoama na luve i Solomoni, ni sa gone ga ko Reopoama ka yalowai, ka sega ni vorati ira rawa.
8“Ia edaidai dou sa nanuma mo dou vorata na matanitu i Jiova ka tu ga vei iratou na luve i Tevita, ia dou sa lewe vuqa, ka sa tiko vata kei kemudou na luve ni bulumakau koula ruarua ka cakava ko Jeropoama me nomudou kalou.
9Dou sa sega li ni biuti ira tani na bete i Jiova, ko ira na luve i Eroni, kei ira na Livai, ka lesia na nomudou bete me vaka na veimatanitu ni veivanua? Sa yaco me bete vei ira era sa sega ni kalou, ko ira yadua sa la'ki kauta e dua na luve ni bulumakau, ka vitu na sipi tagane, me vakatabui koya kina.
10Ia koi keimami, sa neimami Kalou ga ko Jiova, ia keimami sa sega ni biuti koya; kei ira na bete, era sa qaravi Jiova tiko, era sa luve i Eroni, kei ira na Livai era kitaka tiko na nodra i tavi.
11Ia e na veimataka kei na veiyakavi kecega era sa vakama vei Jiova nai soro kama kei na ka boi vinaka, era sa vakarautaka talega na madrai dau yatuni e dela ni tepeli savasava; kei nai tutu-ni-cina koula kei na kena cina, me caudre e na veiyakavi. Ni keimami sa vakabauta nai lesilesi i Jiova na neimami Kalou, ia koi kemudou, dou sa biuti koya.
12Ka raica, sa tiko kei keimami na Kalou, me neimami vu-ni-valu, kei ira na nona bete, kei na davui rorogo me vakatagi na nomudou i tutu. Oi kemudou na Isireli, kakua ni dou veivala kei Jiova na Kalou ni nomudou qase; ni dou na sega ni gumatua.”
13A sa talai ira na bikalawa ko Jeropoama me ra sa vakasaraviravi ira ki dakudra. Ia era sa tu e matadra na Juta, ka tiko ko ira na bikalawa mai dakudra.
14Ia ni sa rai ki muri ko ira na Juta, raica, sa tiko e matadra nai valu, e dakudra talega. Ka ra sa tagi vei Jiova, ka vakatagi davui ko ira na bete.
15A ra sa qoqolou ko ira na Juta. A sa yaco ni sa qoqolou tiko ko ira na Juta, sa yaviti Jeropoama kei ira kecega na Isireli na Kalou, e na mata i Apaija kei ira na Juta.
16A sa dro ko ira na Isireli e matadra na Juta, ka sa soli ira na Kalou ki na ligadra.
17A sa mokuti ira e na moku levu ko Apaija kei ira na nona tamata; a sa bale mate kina vei ira na Isireli e le limasagavulu na oba (500,000) era tamata digitaki.
18A ra sa vakamalumalumutaki ko ira na Isireli e na siga ko ya, ka ra sa gumatua ko ira na Juta, ni ra sa vakararavi vei Jiova na Kalou ni nodra qase.
19A sa vakasavi Jeropoama ko Apaija, a sa rawata eso na nona veikoro, ko Peceli kei na kena veikoro, kei Jisana kei na kena veikoro, kei Ifironi kei na kena veikoro.
20A sa sega ni kaukauwa tale ko Jeropoama e na gauna i Apaija; a sa vakayaco mate vua ko Jiova, a sa mate kina ko koya.
21A sa tubu me kaukauwa tiko ko Apaija, a sa veiwatini kei na yalewa e le tinikava, a sa vakatubura e lewe ruasagavulu ka rua na luvena tagane, ka le tinikaono na luvena yalewa.
22Ia na kena vo ni cakacaka i Apaija, kei na nona i valavala, kei na nona vosa, sa volai e nai tukutuku ni parofita ko Ito.
Who We AreWhat We EelieveWhat We Do
2025 by iamachristian.org,Inc All rights reserved.
