1 Korinica 7 - Ai Vola Tabu (Vakadewa Makawa Vakavoutaki 2021)（FRV21）

Nai Vakasala Eso me Baleta na Vakawati

1Ia e na vuku ni veika dou sa volavola kina vei au: “Sa vinaka vua na tagane me kakua ni veiyacovi kei na yalewa.”

2Ia e na vuku ni veitemaki ni veidauci, me sa bau vakawati kina na tagane yadua, ka me sa bau vakawati na yalewa yadua.

3Me ia vua na yalewa na tagane na ka sa dodonu e na veilomani, me vaka talega kina na yalewa vua na tagane.

4Sa sega ni veitaliataka na yagona na yalewa sa vakawati, sa lewa ga na watina; a sa vaka talega kina ni sa sega ni veitaliataka na yagona na tagane sa vakawati, sa lewa ga na watina.

5Dou kakua ni tarova na nomudou dautiko vata na veiwatini, ka vakavo ga kevaka e rau sa vinakata ruarua e na gauna lekaleka, me qaravi kina na lolo kei na masu; ia dou qai tiko vata tale, de dauveretaki kemudou ko Setani e na vuku ni malumalumu ni nomudou lewa-e-loma.

6Ia ka'u sa tukuna oqo, ni sa ka e vakadonui vata, ka sega ni ka sa vakaroti.

7Ni ka'u sa vinakata me vakataki au na tamata kecega. Ia sa rawata mai vua na Kalou na tamata yadua nai solisoli e dui yaga, e dua sa vakaoqo, ka dua tale sa vaka ko ya.

8Au sa kaya vakaoqo me baleti ira sa sega ni vakawati kei ira na yada, E yaga vei ira me ra kakua ni vakawati me vakataki au.

9Ia kevaka era sa dredre ni tarovi ira, e dodonu me ra vakawati. Ni sa vinaka cake me vakawati ka ca me kama tiko na lomana e na daugagano.

10 Maciu 5.32; 19.9; Mari 10.11-12; Luke 16.18 Ia ka'u sa vakaroti ira sa vakawati tiko—ia ka sa sega ni koi au, na Turaga ga—me kakua ni biuta na watina na yalewa sa vakawati

11(ia kevaka sa vakakina, me kakua ni vakawati tale ko koya, ke segai, ia me rau veilesuvi tale kei na watina), kei na tagane sa vakawati me kakua talega ni biuta na watina.

12Ia vei ira na kena vo—ka'u sa kaya ga koi au, ka segai na Turaga—kevaka e dua na wekada, sa sega ni lotu na watina, ka sa via tiko vata kaya na watina, me kakua ni biuta tani.

13Kevaka sa loma ni tagane tawa-lotu me rau tiko vata kei na watina, me kakua ni biuti koya na yalewa.

14Ni sa vakasavasavataka na tagane tawa-lotu na watina, a sa vakasavasavataka talega na yalewa sa sega ni vakabauta ko koya na watina. Ia kevaka sa sega ni vakaoqo, era sa tawa-savasava na nomudou gone, ia oqo, era sa savasava.

15Ia kevaka sa veibiu ko koya sa tawa-lotu, me lako ga. Sa sega ni vauci kina na tagane se na yalewa sa lotu ni sa vakaoqo. Sa kacivi keda na Kalou me da tiko vakacegu ga.

16Ko sa kila vakaevei, o iko na yalewa se ko na vakabula na watimu, se segai? Se ko sa kila vakaevei, o iko na tagane, se ko na vakabula na watimu, se segai?

Ni Bula Voli me Vaka sa Kacivi Kemuni na Kalou

17Ia me vaka sa solia yadua vei ira na tamata na Kalou, me vaka na nona tiko ni sa kacivi koya na Turaga, me tiko ga vakakina. Au sa lewa me vakakina e na veisoqosoqo lewe ni lotu kecega.

18Kevaka e dua sa kacivi ni sa cili me kakua ni biuta na cili. Ke dua sa sega ni cili ni sa kacivi, me kakua ni cilivi.

19A ka walega na cili, a ka wale talega na tawa cili, ia sa sega ni vakakina na talairawarawa ki nai vakaro ni Kalou.

20Me tiko ga na tamata yadua me vaka na nona tiko ni sa kacivi.

21O sa bobula beka ni ko sa kacivi? Kakua ni vuturi kina. Ia kevaka e rawa mo sereki, mo vakayagataka ga.

22O koya sa bobula ni sa kacivi koya na Turaga sa qai nona tamata sere na Turaga. Sa vaka talega kina ko koya sa lalaga ni sa kacivi, sa bobula vei Karisito.

23Dou sa voli ga e nai voli; dou kakua ga ni nodra bobula na tamata.

24Na veiwekani, me tiko na tamata yadua kei na Kalou, e nai tutu sa tiko kina ni sa kacivi.

Ko Ira na Sega ni Vakawati kei Ira na Yada

25Ia e na vukudra era sega ni vakawati, sa sega ni tu vei au nai vakaro ni Turaga, ia ka'u sa lewa vakai au ga, me vaka e dua sa rawata na yalololoma ni Turaga me'u dina kina.

26A ka oqo ka'u sa nanuma sa yaga e na gauna ni ca oqo, me tiko walega na tamata sa vakakina.

27Sa dua beka na watimu ko sa vauci kina? Kakua ni vakatovolea mo sereki tale. Sa sega beka ni dua na watimu, ko sa vauci kina? Kakua ni vakasaqara e dua me watimu.

28Ia kevaka ko sa ia na vakawati, ko sa sega ni cala kina, ia kevaka sa ia na vakawati e dua na goneyalewa, sa sega ni cala kina. Ia ko ira sa vakaoqo ena vakararawataki na yagodra, ia koi au, au sa lomani kemudou.

29Ia na ka oqo ka'u sa kaya, oi kemudou na veiwekani, Sa vakalekalekataki na gauna sa vo. Ia oqo, me ra vakataki ira era sa sega ni vakawati ko ira na tagane sa vakawati,

30kei ira era sa tagi me ra vakataki ira era sa sega ni tagi, kei ira era sa reki me ra vakataki ira era sa sega ni reki, kei ira era sa veivoli me ra vakataki ira sa sega na nodra ka,

31kei ira era sa vakayagataka na veika ni vuravura oqo me ra vakataki ira era sa sega ni vakayagataka vakaca; ni sa lako tani yani nai valavala ni vuravura oqo.

32Ia ka'u sa vinakata mo dou kakua ni lomaocaoca. Na tagane sa sega ni vakawati sa daunanuma ga na veika ni Turaga, se me vinaka vakaevei vua na Turaga;

33ia na tagane sa vakawati sa daunanuma ki na veika ni vuravura oqo, me vakayalovinakataki koya vakaevei na watina.

34Sa duatani na goneyalewa kei na yalewa sa vakawati. A yalewa sa sega ni vakawati sa daunanuma ki na veika ni Turaga, me savasava tiko na yagona kei na yalona talega; ia na yalewa sa vakawati sa daunanuma ki na veika ni vuravura, se na vinakati koya vakaevei na watina.

35Ia na ka oqo ka'u sa kaya me yaga vei kemudou, au sa sega ni via vakataotaki kemudou, ia au tukuna ga na ka sa kilikili kei kemudou, mo dou dauqarava na Turaga ka sega ni lomaocaoca.

36Ia kevaka e dua na tagane sa lomaleqa ni sa sega ni lewa vinaka e na vuku i koya na yalewa erau sa veivosaki kaya, ka sa kaukauwa tikoga na nona gagano, me vaka sa gadrevi, ia me cakava ga na ka sa lomana kina; sa sega ni cala kina ko koya, me rau vakawati ga.

37Ia ko koya sa dei sara na lomana, a sa sega ni dredre vua me tiko wale, a sa lewa vinaka na nona gagano, ka sa vakadeitaka e yalona me rau sa sega ni vakawati, e na caka vinaka ko koya.

38Sa qai vakaoqo, o koya sa vakawati kei na nona i tau e na caka vinaka, ia ko koya sa sega ni vakawati e na caka vinaka cake.

39Sa vauci vakalawa na yalewa ki vua na watina ni sa bula tiko na watina. Ia kevaka sa mate na watina, sa qai tara vua me vakawati tale kei na tagane sa vinakata ko koya, ka me ia ga kei koya sa nona na Turaga.

40Ia sa noqu lewa sa kalougata cake ko koya kevaka sa tiko ga vaka ko ya. Ia ka'u sa vakasama talega ni sa tiko vei au na Yalo ni Kalou.