1 Korinica 1 - Ai Vola Tabu (Vakadewa Makawa Vakavoutaki 2021)（FRV21）

1Koi au ko Paula, sa kacivi mei apositolo i Karisito Jisu, e na lewa ni Kalou, kei Sosiceni na wekaqu,

2 Caka 18.1 Kivei ira nai soqosoqo lotu ni Kalou era sa tiko mai Korinica, vei ira sa tu vata kei Karisito Jisu ka sa vakasavasavataki, era sa kacivi me ra yalosavasava, kei ira kecega e na veiyasana kecega era sa masuta na yaca ni noda Turaga ko Jisu Karisito, io, na noda kei na nodra talega:

3Me yaco vei kemudou na loloma kei na vakacegu mai vua na Kalou ko Tamada, kei na Turaga ko Jisu Karisito.

Na Veivakalougatataki ena Vuku i Karisito

4Au sa vakavinavinaka e na veisiga vua na noqu Kalou e na vukumudou, e na vuku ni loloma ni Kalou sa soli vei kemudou e na vuku i Karisito Jisu,

5ni dou sa vakavutuniyautaki e na ka kecega e na vukuna, e na vosa kecega kei na vuku kecega—

6me vaka ni sa vakadinadinataki vei kemudou nai tukutuku kei Karisito—

7ka mo dou kakua ni vakuwai kina e na dua nai solisoli vakayalo ni dou sa waraka tiko na kena vakarairaitaki mai na noda Turaga ko Jisu Karisito.

8O koya talega ena vakataudeitaki kemudou me yacova nai vakataotioti, mo dou tawa cala e na siga ni noda Turaga ko Jisu Karisito.

9Sa yalodina na Kalou, o koya ka sa kacivi kemudou ki na veitokani kei na Luvena, ko Jisu Karisito na noda Turaga.

Na Tatawasewase e Loma ni Lotu

10Ia ka'u sa vakamasuti kemudou, na veiwekani, e na yaca ni noda Turaga ko Jisu Karisito, mo dou duavata kecega e na vosa, ia me kakua vei kemudou na veisei, ia mo dou veivinakati sara ni dou sa lomavata ka lewa vata.

11Ni sa tukuni kemudou mai vei au, kemudou na veiwekani, ko ira na lewe ni vuvale i Kiloi, ni dou sa dauveileti vakai kemudou.

12Caka 18.24Ia na ka oqo ka'u sa vosa kina, ni dou sa kaya yadua, “Oi au sa nei Paula,” ia, “Oi au sa nei Apolosa,” ia, “Oi au sa nei Kifa,” ia, “Oi au sa nei Karisito.”

13Sa tawase beka na Karisito? Sa vakoti beka ki na kauveilatai e na vukumudou ko Paula? Se dou sa papitaisotaki beka e na yaca i Paula?

14Caka 18.8; 19.29; Roma 16.23Au sa vakavinavinaka vua na Kalou ni'u sa sega ni papitaisotaka e dua vei kemudou, oi rau ga ko Kirisipo kei Keio,

15de kaya e dua ni dou sa papitaisotaki e na yacaqu.

161Kori 16.15Au sa papitaisotaki ira talega na lewe ni vuvale i Setefana; ia ka'u sa sega ni nanuma rawa e dua tale ka'u sa papitaisotaka.

17Ni sa sega ni talai au na Karisito me'u veipapitaisotaki, me'u vunautaka ga nai tukutuku-vinaka, ia ka sega ga e na vosa sa vuku, de vakatawayagataki kina na kauveilatai i Karisito.

Ko Karisito na Kaukauwa kei na Vuku ni Kalou

18Ni sa ka lialia vei ira sa rusa na kena vunautaki na kauveilatai, ia sa kena kaukauwa ga ni Kalou vei keda sa vakabulai.

19Aisea 29.14Ni sa volai,

“Au na vakarusa na nodra vuku era sa dauvuku,

ka vakatawayagataka na nodra yalomatua era sa dauyalomatua.”

20 Jope 12.17; Aisea 19.12; 33.18; 44.25 Evei na vuku? Evei na vunivola? Evei na dauveileti ni vuravura oqo? Sa sega beka ni vakalialiataka na vuku ni vuravura oqo na Kalou?

21Io, ni sa vuku tu na Kalou, a ra sa sega ni kila na Kalou na kai vuravura e na nodra vuku, sa qai vinakata na Kalou me vakabulai ira era sa vakabauta, e na vosa vakalialia.

22Ni ra sa taroga nai vakatakilakila ko ira na Jiu, a ra sa vakasaqara na vuku ko ira na kai Kirisi,

23ia keitou sa vunautaki Karisito ni sa lauvako ki na kauveilatai, a ka era sa tarabe kina ko ira na Jiu ka sa ka lialia vei ira na kai Kirisi,

24ia vei ira ga era sa kacivi, se ra Jiu se ra kai Kirisi, na Karisito na kaukauwa ni Kalou kei na vuku ni Kalou.

25Ni sa ka vuku na sesewa ni Kalou ka sa uasivi vei ira na tamata; a sa kaukauwa na malumalumu ni Kalou me uasivi vei ira na tamata.

26Ni dou sa raica, na veiwekani, na kenai valavala ni nomudou kacivi, ni sa sega ni lewe vuqa era sa vuku vakayago, sa sega ni lewe vuqa era sa kaukauwa, sa sega ni lewe vuqa era sa turaga me sa kacivi.

27Ia sa digitaka na Kalou na veika sa ka lialia e vuravura me vakamaduataki ira na vuku; ia na veika sa malumalumu e vuravura sa digitaka na Kalou me vakamaduataka na veika sa kaukauwa;

28kei na veika vakaisi e vuravura, kei na veika e beci, sa digitaka na Kalou, kei na veika sa sega walega me vakarusa na veika sa tudei,

29me kakua kina na tamata me dokai koya e mata ni Kalou.

30Ia mai vei koya ga dou sa tu vata kina kei Karisito Jisu, o koya sa cakava na Kalou me vu ni vuku vei keda, ka vu ni vakadonui, ka vu ni vakasavasavataki, ka vu ni bula;

31Jere 9.24me yaco kina na ka sa volai, “O koya sa vosa doudou, me vosa doudou e na vuku ni Turaga.”