1Ao I nora te niira ni boki i atain Teuare tekateka i aon te kaintokanuea. Iai te koroboki i nanona ao i akuuna, ao e kanim'aki ni kanim ake kanikina aika itiua b'a e na aki uki.
2Ao I nora te anera ae korakora ae taetae n te b'anaa ae korakora ni kaangai, “Antai ae riai ni kauka te nira ni boki ma ni kaaki b'aini kanim'ana ake kanikina?”
3Ao bon akea temanna i karawa, ke i aonnaba, ke i aantano, ae e kona ni kauka te niira ni boki ma n tarataraia.
4Ao I bati n tang i bukina b'a e aki kuneaki temanna ae riai ni kauka te nira ni boki ma n tarataraia.
5Ao e kaangai temanna mai buakoia unimm'aane akekei nako iu, “Tai tang; noria, E tokanikai te Raian are riki man te baronga are Iuta: te Raian aei boni kanoan ana kariki Tawita, ao E kona n urui kanim ake kanikina ake itiua ake e kanim'aki iai te niira ni boki.”
6Ao I nora te Tiibuteteei n tei i nukan te kaintokanuea ma baike a maiu ake aman, ma unimm'aane akekei: E tara n ae E a tia ni kamateaki te Tiibuteteei arei, ao itiai korona, ao itiua matana, ake tamnei ake mairoun te Atua, ake a a tia ni kanakoaki nako aon aaba ni bane.
7Ao E nako n anaa te nira ni boki mai atain Teuare tekateka i aon te kaintokanuea.
8Ao ngke E anaa te nira ni boki, ao baike a maiu ake aman, a katorobubua ni bobaraaki i matan te Tiibuteteei, ao a toa baiia n te b'ai ni katangitang ae te aabi ae te koora, ma taiani boora aika koora naba; a on baikai ni b'aai aika boiarara, ake aia tataro aomata ake a itiaki.
9Ao a anene n te anene ae boou, ao a anene ni kaangai,
“Ko riai n anaa te niira ni boki
ma ni kanakoi b'aini kanim'ana ake kanikina.
B'a Ko kamateaki; ao Ko kamaiuia aomata n raraam b'a ana b'ai te Atua
mai buakoia baronga nako, ma reeti n aomata nako, ma aomata nako aika a kakaokoro aia taetae,
10 Te Ka 1.6 ao Ko karaoia b'a ana ibonga te Atua n ueana;
ao a na uea i aonnaba.”
11Ao I taratara nako ao I ongo b'anaaia anera aika bati aika katobibia te kaintokanuea ma b'anaaia baike a maiu ma unimm'aane; ao m'aitin te koraki arei tebubua te mirion ao nga ma nga;
12ao a kaangai n te b'anaa ae korakora,
“E riai te Tiibuteteei are kamateaki
n anganaki te m'aaka, ma te kaub'ai, ma te rabakau, ma te korakora,
ma te karineaki, ma te neboaki, ma te karaoiroaki!”
13Ao I ongo b'anaani baika karikaki ni kabane ake i karawa, ao i aonnaba, ao i aantano, ao ake i marawa, ma baike i nanoia ni kabane, b'a a kaangai:
“Ana b'ai te Tiibuteteei ma Teuare tekateka i aon te kaintokanuea
te karaoiroaki, ma te karineaki, ma te neboaki, ma te tautaeka,
n aki totoki!”
14Ao baike a maiu ake aman a kaangai, “Amen!” Ao unimm'aane a katorobubua ni bobaraaki ao a taromauri.
Who We AreWhat We EelieveWhat We Do
2025 by iamachristian.org,Inc All rights reserved.
