1E tabekai rake Tamnein te UEA ao e uotai nako mataroan te Tembora, ike I a noora iai uangaun ma niiman m'aane, n reitaki ma taan kairiiri ake uoman ake Iaatania are natin Atura te m'aane ao Beratia are natin Benaia te m'aane.
2E taku te UEA, Etekiera, natin te aomata, a kataia m'aane aikai ni karaoi iango aika a buakaka ao n anga taian taeka n reirei aika a kamaamate nakoia kaain Ierutarem.
3A taekin taeka n aron aikai, ‘Ti na karaoi auti aika a m'aiti riki. Ti te bo te kaawa ae e buubura aei ma tein te b'aata ni kuuka ae e toka i aon te ai, ao ti riki ngaira b'a kaanga taian iriko maiu, ma ti aki riki b'a taian iriko maiu ngkana e aki kaburoira te b'aata i aon te ai.’
4Ma ngaia ae, Etekiera, ko na kabuakakaia!”
5E niniai Tamnein te UEA ao E tuangai b'a n na tuangiia taani kairiiri ni kaangai:
I atai baika kam taekin ngkami aika taani kairiiri Ngai ae te UEA ae te Atua.
6Kam a tia ni tiringiia aomata aika a rangi ni m'aiti n te aro are e a on te kaawa ae e buubura n taiani mate!
7Bon te b'aata ni kuuka te kaawa ae e buubura aei, ao bon taian iriko maiu rab'ataia koraki aika kam tiringiia. Ma ngaia ae N na kairoroingkami b'a kam na kiitana Ierutarem,
8ao N na kanakoia taanga ni buaka b'a a na buakaningkami, n aron are kam a kaman maakua.
9Ao i mwiina, kam na tauaki ao kam na katuaaeaki irouia ianena aika kairiribai.
10Kam na tiringaki i bon oin abami, ma e na riki anne i m'aain ae kam ataia ae bon Ngai ae te UEA ae I karaoi baikai.
11Kam taekinna ngkami aika taani kairiiri b'a taian iriko maiu ngkami i nanon te b'aata ni kuuka, ma e na bon aki kamanoingkami te kaawa ae e buubura aei. E na bon aki, kam na mate i aon tian abaia Iteraera.
12Ane kam na ataia b'a n iriiran aia tua botannaomata akana i rarikimi, kam bon aki ongotaeka iai nakon au tua ma au reirei. Ao bon te UEA Ngai!
13I m'aain banen au taeka, ao a b'aka ni mate Beratia. I bobaraaki n takaarua n tang ni kaangai, “Taiaoka te UEA ae te Atua, ko na aki tiringiia aika taian nikira i Iteraera.”
Te Berita I bukin Te Kaantaninga14Ao e kaeka te UEA ni kaangai:
15Etekiera, ae natin te aomata, a taku aomata aika a maeka i Ierutarem ko a rangi raroa nako ma Iteraera ake tekorakina man taromauriakiu. Ao a taku naba b'a ai bon ti abaia te aba ae Iteraera.
16Ma aio te b'ai ae I tangiria b'a ko na tuangiia Iteraera ake i B'aburon:
Bon te koaua ae bon te UEA Ngai ae te Atua, ae I kairoroingkami ni kanakoingkami man oin abami ma ni karikingkami b'a kam na maeka i buakoia botannaomata aika ianena. Ma ngkai, N nang mena iroumi n taabo nako ike kam mena iai, b'a kam aonga ni konaa n taromauriai.
17Ao n te bong teuana, N na ikotingkami mai buakoia botannaomata nako ake kam maaenako i buakoia ma ni manga kamaekaingkami riki i Iteraera.
18Ngkana e riki anne, ao I tangiringkami b'a kam na kaitiaka te aba ni kanakoi taian bouannanti aika a rangi n ribaaki.
19Ao i mwiina, N na taekiinako taningabonomi ma ni karikingkami b'a kam na rangi ni kan kakaonimaki raoi. Ane kam na tangiria n ongotaeka i Rou
20ma au tua nako ma au taeka n reirei nako. Kam na riki b'a au aomata, ao N na riki b'a Atuami.
21Ma a na katuaaeaki koraki akana a taromauri taiani bouannanti ao a na karekea te b'ai are a bon uaa korona. Bon aei Au taeka Ngai ae te UEA.
E A Kiitana Ierutarem Mimitongin Te UEA22Ao ngke e a tia n taetae te UEA, a taakin baiia ni kiba maan akekei ao a kiba rake i nanon te ang, ao a mena taiani wiira akekei i rarikiia. E mena raneanean mimitongin te UEA i aoia
23ao e kiitana Ierutarem ao e tei i aon te tabuki are i mainikun te kaawa are e buubura arei.
24Ao i mwiin anne i nanoni miiu, E a tabekai rake Tamnein te UEA ao e uotai ni kaokai nakoia taenikai ake tekorakina i B'aburon. Ao e mauna nako te mii arei mairou,
25ao I tuangiia b'aai ni kabane ake e a tia ni kaoti te UEA nako iu.
Who We AreWhat We EelieveWhat We Do
2025 by iamachristian.org,Inc All rights reserved.
