Itaia 48 - Kiribati New Version Bible

E Kaetiia Ana Aomata Te UEA

1Kaain Iteraera

kam nako mai roun ana utu Iakob'a

ao barongan Iuta.

Kam taekinna b'a kam taromauriia,

te UEA ae Atuan Iteraera,

ma kam kewe.

2Kam atonga Ierutarem b'a mwengami

ao kam taekinna b'a kam onimakinai,

Ngai ae te UEA ae Moan te M'aaka,

ae Atuan Iteraera.

3I katanoata ni bong ake ngkoa

te b'ai ae e na riki,

ao i mwiina I karikia,

n te aro ae akea te katauraoi.

4I ataia ae kam taningabono

ao kam atuumatoa.

5Ao I tuangngkami b'aai aikai,

b'a ngkana a riki

ao kam na aki kaangai,

“A karaoa te aekaki aei taian bouannanti ake ti taromaurii.”

6Kam ongo ngkoa te b'ai are I taekinna,

ao kam a tia n nooria b'a e a tia n riki.

Ngkai kam na taekinna b'a e boni koaua!

N na kaoti nakoim b'aai aika a raba

aika kam tuai man atai.

7I karaoa te b'ai ae e boou n te bong aei,

te b'ai ae kam aki konaa n taekinna

ae kam a tia n ongo mai m'aaina.

8Kam tuai mani kan

kakauongo nakon te b'ai ae I taekinna;

man te tai are kam bungiaki iai,

I ataia b'a kam na kaaitaraa.

E Kauringiia Kaain Iteraera Te UEA

9Bon te UEA Ngai, ae I bon koaua i bon irou;

N na neboaki

tiaki i bukin katuaeakimi

ke tiringakimi.

10I katai ngkami n taai aika a matoatoa

kaanga te tirewa ae e a manga karaoaki

n te ai ae e uram'aaka.

11I karaoa aei bon ibuku.

I rawa ngkana I aki karineaki

ke n tib'aa neboau

ma anti tem'angina.

12Iteraera ae au aomata ae e rineaki,

kakauongo irou

Bon ti te UEA Ngai,

te moan ao te kabane.

13I karika te aonnaba

n oin baiu

ao n taakina nako karawa.

A ongotaeka n taeka ni kabane.

E taetae Te UEA Nakoia Bootanaomata Nako

14Bootaki i rarikiu, ngkami ni kabane!

kakauongo nakon te b'ai ae N na taekinna.

Iai mairouia ami bouannanti

aika a kaman taekinna b'a a na riki baikai?

A taekinna b'a e na karaoa

te b'ai ae a tangiria raoraou

nakon ae N na karaoia

nakon B'aburon?

15Bon Ngai ae I rineiko.

I a tia ni uotia man te tabo ae e raroa,

ao e na tootokanikai.

16Kaaniko ao kakauongo!

I tuai man karabai

b'aai aika I a tia n taekin,

ao I a kaman mena ikai

i m'aain waakin te tai.

E Raoiroi Te Ongotaeka Iroun Te UEA

E a tia ni kanakoai te UEA ae te Atua

ni m'aakan te Tamnei are Raoiroi.

17ma taian rongorongo aika:

Kaain Iteraera,

Bon te UEA ae te Atua ae e tabu Ngai,

are e kamaiungkami.

bon i bukimi,

I reireiningkami,

ao I kairingkami

i aon te kawai ni koaua.

18Ai korakorara nanou

n tangiringkami b'a kam na ongotaeka nakon au tua!

E na riai n taorake

n te karaanga ae e taonako

ami tootokanikai ao tekeraoimi.

19A na kakab'aiaki am botannaomata

n anganaki riki ana aomata

ae kaanga te uita

ao te bike.

Ao N na aki manga kariaia

b'a e na manga kamaunaaki abami.

20Kam na kiitana B'aburon ngkai!

Ao kam na karaoa ami kukurei i nanoni kawaimi n nako.

Kam na kukurei ao n takaarua

b'a a aonga n ongo aomata nako,

“E a tia te UEA ni kamaiua

ana toro ae Iteraera!

21E kairiira i nanon te rereua

ao e karaanga nako te ran man te b'a

ni katoki nanoia aika a taka.

22Ma e a tia te UEA ni berita

b'a bon akea temanna ae e buakaka

ae na maeka ma te rau.”