1E a bootia barongan Iteraera ni kabane Iotua i Tekem. E weteia unim'aane ma taan kairiri, ma taan moti, ma b'akuakun Iteraera ni kabane b'a a na ikotaki i matan Ana Ati ni Berita te UEA.
2Ao e taku Iotua nakoia aomata ni kabane, “Aikai Ana taeka te UEA, A taromauriia anti tabem'aang ami bakatibu ngkoa ngke a maeka n iteran te karaanga are Iuberetiti, are i mainiku. Ao ami bakatibu anne bon teuare Tera, are taman Aberaam ma Naora.
3Ao I anaa Aberaam are ami bakatibu anne man te aba anne ri aon te Iuberetiti ma ni karinna i aon te aba ae Kanaan ni kabuta. Ao I anganna ana kariki aika a m'aiti kurikuri. I a anganna natina are Itaaka.
4Ao I angan Itaaka Iakob'a ma Etau. I a angan Etau aaba ake a tabukibuki i Etom b'a abana, ao ami bakatibu are Iakob'a e nako Aikubita ma natina.
5 Rimwi riki ao I kanakoa Moote ma Aaron, ao I karokoa te kaangaanga ae ab'ab'aki i aon Aikubita, ma I kaotinakoi ngkami mai iai.
6I kaotinakoia ami bakatibu mai Aikubita, ao a rimwi aomatan Aikubita ma aia kaa ni buaka ao taan toka i aoia aoti. Ma ngke a roko ami bakatibu n taari are uraura
7ao a tang nako iu ao I kab'aroa taari i aoia ana taanga ni buaka Aikubita ao a bane ni b'ab'a ni mate. Ao kam bane n noori baike I karaoi nakoia taanga ni buaka mai Aikubita.
Kam maeka n te rereua n te tai ae e maan,
8ao i mwiina I a manga uotingkami nako abaia aomatan Amoraite ake a maeka i mainikun te Ioretan. A buakani ngkami ma I anganingkami te tokanikai i aoia. Kam taua abaia ao I kamaunaia mai m'aaimi.
9E buakani ngkami naba uean Moaba are B'araka are natin Tibore. E kanakoa ana taeka nakon B'araam are te burabeti are natin Beora te m'aane b'a e na karereanti ngkami.
10Ma I aki kariaia b'a e na karaoa anne B'araam ngaia are e a manga kakab'aiaingkami ao kam riki ni kamaiuaki iai mai roun B'araka.
11Kam ri aon te Ioretan ao kam roko i Ieriko ao a buakani ngkami aomatan Ieriko ma taian Amoraite, ma Beritaite ma aomatan Kanaan ma aomatan Eta ma taian Kirekataite, ma Iwaite ma aomatan Iebuti, ma kam konaia ni kabane i bukina b'a I anganingkami te tokanikai i aoia.
12Ngke kam roko b'a kam na buakaniia uean Amoraite ake uoman, ao bon akea bonganan ami kainikatebe ma ami kabaang i bukina ngke I a kaman karina te maaku i nanoia ao I kakioia nako mai m'aaimi.
13I anganingkami te aba ae kam aki karaoa aona, ao taian kaawa aika kam aki katei autiia. Ao ngkai kam a maeka iai ao kam a am'arake ni kureebe ao oriwa aika kam aki uniki!”
14E a manga taku riki Iotua, “Ma ngaia ae ngkai, kam na karinea te UEA, tooro i rouna ma te koaua ao te kakaonimaki. Tai manga taromauriia anti n aroia ami bakatibu ngkoa i Metobotamia ao i Aikubita. Ma kam na taromauriia te UEA n ti ngaia.
15Ngkana kam aki kan toro i rouna, ao kam na motika nanomi n te bong aei b'a antai ae kam na toro i rouna, antiia ami bakatibu ake i Metobotamia, ke antiia taian Amoraite ae kam maeka i abaia ngkai. B'a ngai ma au utu ti na toro iroun te UEA.”
16Ao a kaeka aomata ni kaangai, “Ti na bon aki kona ni kiitana te UEA ni manga onimakiniia anti tabem'aang!
17E kaotinakoia tamara ao E kainaomataira naba man te tautoronaki i Aikubita, ao ti bon noori kakai ake E karaoi. Ao E kaawakiniira naba mai rouia botannaomata ake ti rirarikiia i nanon ara tai ni m'am'ananga n te tai teuana ma teuana.
18Ao ngke ti niniia te aba, ao E kakioia nako taian Amoraite mai m'aaira ake a maeka ngkoa ikai. Ma ngaia are ti bon riai ni beku i bukin te UEA b'a bon ti Ngaia Atuara.”
19E taku Iotua nakoia, “Tiaki te b'ai ae beebete te kakaonimaki nakon te UEA, b'a bon te Atua ae tabu ae tangira te kakaonimaki. E aki manga kab'araa ana bure ane e aki kakaonimaki nakoina.
20Ao E na bon karekea kaimi ngkana kam a manga onimakiniia anti ianena. E na tiringngkami e ngae ngkana E a tia ni karaoa ae raoiroi nakoimi mai m'aaina.”
21Ao a taku aomata nakon Iotua, “Tiaki taromauriia anti tabem'aang ma ti na taromauriia te UEA n ti ngaia.”
22E taku Iotua nakoia, “Kam bon koaua b'a kam na taromauriia te UEA n ti ngaia?” ao a kaeka aomata, “Eng, ti bon koaua.”
23Ao e a manga taku Iotua, “Ao kam riai ni kamaunai ngkai anti ianena aika i roumi, ao kam na berita b'a kam na kakaonimaki nakon te UEA ae Atuaia Iteraera.”
24Ao a kaeka aomata nako Iotua, “Ti na taromauriia te UEA ae Atuara, ao ti na ongotaeka i rouna.”
25Ao e karaoa te boraraoi Iotua i bukiia aomata ma te UEA n te bong arei, ao e anganiia taian tua ma kawai ake a na riai n iri nanoia.
26Ao e koroi tuua aikai Iotua n ana boki n tua te Atua. Ao i mwiina e katea te atiibu ae buubura i rarikin um'an te UEA i aan te aroka ae te oke.
27Ao e taku nakoia aomata, “E na riki te atiibu aei b'a te tia kakoaua, b'a e a tia n ongo b'aai ni kabane ake E taekin te UEA nakoira. Ao e na riki b'a te tia kakoaua ni kaoti ara bure nakon te UEA.”
28Ao ngke e tia anne ao e a kaokiia aomata Iotua nako abaia nako. Ao a bane n okiri abaia.
Maten Iotua ma Ereata29Ao i mwiin anne ao e mate Iotua are natin Nuun are Ana toro te UEA. E mate ngke tebubua tebwiina ana ririki.”
30Ao a tauna rab'atana i bon i abana are Timnata-Tera n aaba ake a tabukibuki ake i Eberaim i meangin te maunga are Kaati.
31Ao a taromauriia te UEA aomata i nanon ana tai ni maiu Iotua. Ngke e a mate Iotua ao a bon teimatoa naba n taromauriia te UEA aomatan Iteraera i bukina ngke a bon maiu naba aia taani kairiri ake a bon noori naba Ana m'akuri ni kabane te Atua ake E a tia ni karaoi i bukiia Iteraera.
32A uoti riin Ioteb'a aomatan Iteraera mai Aikubita, ao a taunna i Tekem are te m'akoro n aba are e kabooa Iakob'a ngkoa n tebubua te m'akoro n tirewa mai roun natin Amora are taman Tekem. E b'ainaki te m'akoro n aba aei i rouia kanoan Ioteb'a.
33E a manga mate Ereata are natin Aaron ao e taunaki i Kibea, te kaawa are n aaba ake a tabukibuki i Eberaim, te kaawa are e a manga anganaki natina te m'aane are Bineati.
Who We AreWhat We EelieveWhat We Do
2025 by iamachristian.org,Inc All rights reserved.
