2.Rongorongo 35 - Kiribati New Version Bible

Bukamaruan te Toa are te Riao(2 Uea 23.21-23)

1E anga ana taeka Iotia b'a e na karaoaki te Toa are te Riao i Ierutarem i bukin karinean te UEA. Ma ngaia are, ni katebwi ma auan bongin te moan nam'akaina, ao a tiringaki taian tiibu teteei i bukin bukamaruan te Toa are te Riao.

2N te bong anne, ao e kauringiia ibonga Iotia b'a a na atai raoi tib'angaia aika a na karaoi i nanon te Tembora.

3E weteia kanoan Rewi ake a m'akuri i bukin te UEA ake a reireiniia aomata ana tua nako te UEA, ao e taku:

Kam a aki manga uouota te Atiniberita man te tabo teuana nakon te tabo teuana. E na tiku i nanon te Tembora are e kateaki iroun Toromon are te uea are natin Tawita te m'aane, ike kam na m'akuri iai i bukin te UEA ao Iteraera.

4Katauraoingkami nakon karaoan ami m'akuri ake e a tia Tawita ma Toromon n anganingkami, ni kaineti ma ami kaainga nako.

5Bwenauai ngkami nakon taian m'akoro, ao manga baairei raoi ngkami i nanon te Tembora, b'a a aonga taan taromauri man utu nako n tatabeua nako ni konaa karekea buokaia mairoun temanna mairoumi.

6Ngkana a uoti aia tiibuteteei are b'ain te Toa are te Riao nakoim, ao ko na tiringi mani katauraoia b'a e na kareanaki nakon te UEA. Kam na kakoaua raoi b'a a na karaoa te bootaki aomata ni kaineti ma taian kaetieti ake e anga te UEA nakon Moote, ao kam na aki karaoi b'aai aika kam na kam'ara iai ma n aki kariaiakaki.

7E anga tenibwi te ngaa te tiibu ao te kooti Iotia, ao tenua te ngaa ana kao man oin ana nanai ni kao ao n tiibu i bukiia aomata b'a a na anga b'a aia karea.

8Ao a anga naba nanoia ana mataniwi Iotia ake Irekia, Tekaria, ao Ieiera ake taan tararua te Tembora, ao a anga aia man tabeman nakoia aomata, taian ibonga, ao kanoan Rewi b'a aia karea. A anga uoua te ngaa onobubua te tiibu ao tiibu teitei ao tenibubua taian kao b'a a na kareanaki i nanon tain bukamaruan te Toa are te Riao.

9Taani kairiiri irouia kanoan Rewi bon Konania, tarina are Temaia, ao Netania, ao ai uana naba ma Atiabia, Ieiera, ao Iotabata, ao a anganiia kanoan Rewi ake tekorakina nimaua te ngaa taian tiibu ao kooti, ao nimabubua taian kao b'a taian karea.

10Ao ngke a bane n tauraoi b'aai ni kabane i bukin te Toa are te Riao, ao a tei taian ibonga ma kanoan Rewi n te tabo are e tuangiia Iotia.

11Ao a tiring man kuoti kunin taian tiibu i bukin te Toa are te Riao kanoan Rewi, a anga teutana te raraa nakoia ibonga, ake a katimtim'a i aon te baonikarea.

12A kaokoroi m'akoron te man tabeua kanoan Rewi ake a kainanoi taan taromauri i bukin te karea are kakukureian te UEA, n aron are e tangiraki n ana tua Moote. A karaoa naba ae aron arei nakoia taiani kao.

13A karean taian man i bukin te Toa are te Riao i aon te baonikarea ao a kaburoa irikona i bukin te angab'ai are n te b'aata, te ketoro, ao taian baan. Ao a kabaikoaia n anga te iriko nakoia aomata b'a a aonga n am'arake.

14E bong aia bong ibonga n tabetabe n anga karea ao ni kabuoki nenean taiani man i aon te baonikarea. Ao ngke a bane n tia aomata, a katauraoi taian man i bukin te Toa are te Riao kanoan Rewi bon i bukiia ao i bukiia naba ibonga.

15I nanon tain te bootaki ao iai tabeman kanoan Rewi ake a katauraoia maan i bukin te Toa are te Riao i bukiia taan katangitang ao taan tei, b'a a aonga n aki kitana aia tabo taani katangitang ake kanoan Rewi, ake a tia n anganaki tib'angaia ni kaineti ma ana kaetieti Tawita, Ataba, Eman, ao Ierutun are ana burabeti te uea. Ao a bon aki kiitani aia boua taan tei ake ni mataroan te Tembora.

16Ma ngaia are, n te bong anne, e karaoaki te Toa are te Riao i bukin karinean te UEA, ao a kareanaki taian karea i aon te baonikarea i bukina, n aron are e a tia taekinna Iotia.

17A bukamarua te Toa are te Kariki ae Aki Karikaki i bukin itiua riki te bong.

18A bane n roko ikekei aomata mai Ierutarem ao mani kaawan nako Iuta ao Iteraera. E tuai man karaoaki te Toa are te Riao ae ai aron aei mangkoa man ana tai Tamuera are te burabeti. Ni koauana, ao bon aei te kabanea ni buubura ni bootaki i bukin te Toa are te Riao n rongorongon Iteraera!

19A riki baikai ni kabane i nanon ana katebwi ma wanua n ririki n tautaeka Iotia i aon Iuta.

Maten Iotia n te Buaka(2 Uea 23.28-30)

20Tabeua te tai i mwiina, ao e a kairiia ana taanga ni buaka uean Aikubita are Neko nakon te kaawa ae e buubura are Karekemiti n te karaanga are Iuberetiti. Ao e kairiia ana taanga ni buaka Iotia nakoiang ni kawara ana taanga ni buaka Aikubita.

21E kanakoa ana rongorongo Neko nakon Iotia ae kaangai:

I aki buakaniko, uean Iuta! Ti aki buaka ma ngkami. Ma e tuangai te Atua b'a n na waekoa ni buakana au kairiribai. E mena te UEA n au itera, ma ngaia are, ngkana ko kataia ni katokai, ao e na katuaaeko.

22Ma e aki tabe Iotia ma ana kauring Neko, e ngae ngke e bon nako mairoun te Atua! Ao e boni m'ananga naba ni buakana Neko n te M'arua are Mekito.

23I nanon tain te buaka, ao e katebea Iotia temanna tautian Aikubita. Ao e taku Iotia, “Kararoaira mai ikai! I a teke.”

24Ao a kanakoa Iotia man ana kanibuaka, ao a katoka n te kanibuaka teuana ae e mena ikekei ao a uotia rikaaki nako Ierutarem, ike e aki maan ao e a mate naba. E taunaki i rarikiia ana bakatibu, ao a bane n tang kaain Iuta ao Ierutarem i bukin matena.

25Ao e korea te kuna ni mate Ieremia are te burabeti i bukin karinean Iotia. Ao man te tai anne, ao a bane n anenea te anene anne aomata ni kabane i Iuta ake a tang ni maten Iotia. E bon karinaki naba i buakon kuuna ni mate.

26A koreaki mwiin b'aai ni kabane ake e karaoi Iotia ngke e uea, n reitaki ma ana kakaonimaki n ongotaeka iroun te UEA,

27i nanon te boki are Rongorongoia Uean Iteraera ma Iuta.