1I mwin maten te uea are Amatia, ao a manga katokaa ana baunuea natina te m'aane are Utia
2e ngae ngke ai tib'a tebwi ma onoua ana ririki ni maiu n te tai anne. E tautaeka Utia i nanon nimabwi ma uoua te ririki mai Ierutarem, are bon ana kaawa neiere tinana are Nei Iekoria.
3I nanon ana tai n tautaeka, e a manga taua ma ni manga katea te kaawa are Erata.
4E ongotaeka iroun te UEA ni kaakaraoa ae e raoiroi, n aron are e a tia ni karaoia tamana are Amatia.
5Ana tia iango Utia bon Tekaria are e reireinna te ongotaeka iroun te Atua. Ai ngaia are, ngke e maiu Tekaria ao e kakaonimaki Utia nakon te Atua, ao e karaoia te Atua b'a e na tetekeraoi.
6Ngke e uea Utia, ao e waakina te buaka ni kaitaraia kaain Biritia. E urui oon taiani kaawa aika a buubura ake Kata, Iabene, ao Atota, ao e a manga karaoi taiani kaawa ake i rarikin Atirota ao ni m'akoron Biritia ake tabeua.
7E buokia te Atua ni kataenikaiia kaain Biritia, kaain Arabia ake a maeka i Kura-B'aara, ao kaain Meun.
8A bon kab'ab'akaa naba te ronrab'ata kaain Ammon nakon Utia. E rikirake korakoran m'aakana, ao a ongo rongorongona aomata ake a maeka n taabo aika a raroa nako i Aikubita.
9E karaoi i Ierutarem taian taua aika a nonoaki Utia n te Mataroa are Koona, te Mataroa are M'arua, ao n te tabo are e a rairaki iai oon te kaawa n rin nako.
10E boni karaoi naba taian taua n taratara n te rereua.
Iai ana nanai ni man ae moan te korakora i oin taian tabuki ake i maeao, ao n aaba aika a aoraoi, ike iai nnen taian ran aika a kenaki i bukin rawean te karau. E rangi n tatangira te ununiki, ai ngaia are, a m'aiti arokana n te tawaana, ao taian kureebe aika e uniki i aon aaba ake a tabukibuki ike iai te bon ae raoiroi, ao e kabooia taan ununiki b'a a na tararuai.
11E a bon tatauraoi naba ana taanga ni buaka Utia nakon te buaka. Ao ana aobitia bon Maateia are e kaawakina m'aitiia tautia, ao m'aane ake uoman ake a mena i aan ana kairiiri Anania, are temanna ana mataniwi Utia.
12M'aitiia tautia ake a kataneiaaki bon tenibubua itiua te ngaa ao nimabubua, ao a bane ni mena i aan aia kairiiri uoua te ngaa onobubua taani kairiiri.
13Aio te taanga ni buaka ae korakora are e tararua te uea mairouia ana kairiribai.
14E katoaia ana taanga ni buaka Utia n taian otanga, kainiwai, b'araia, barengaru, kainikatebe, ao taian atiibu i bukin te bana.
15Iai tabeman ana taani m'akuri aika rarabakau ake a kunei karaoan taian mitiin ake a konaa ni katebe n taian kanoanikatebe ao taian atiibu aika a buubura. E katei baikai Utia i Ierutarem n ana taua n totoko ao ni koonan naba oon te kaawa are e buubura.
E buoka Utia te Atua b'a e na rikirake man rikirake ni korakora, ao e a rangi n tanoata taekana ni kabuta te aonnaba.
Rikiraken Kamoamoan Utia16Ao e a rangi ni kamoamoa Utia i bukin m'aakana, ao aei ae e karekea b'akana.
N te bong teuana, ao e a aki ongotaeka Utia nakon te UEA ae Atuana ngke e nako n rin te Tembora ao e kabuoka te b'ai ni kaboiarara b'a te angab'ai nako ina.
17A ira Utia Ataria are te ibonga ao ibonga aika waningaun aika ninikoria nakon te Tembora
18ao e taku, “Teuae ko karineaki. E bon aki eti te b'ai ae ko karaoia! Kam aki kariaiakaki ni kabuoki taian b'aini kaboiarara nakon te UEA. B'a e na ti karaoaki anne irouia taiani ibonga ake ana kariki Aaron. Kam a riai n nako! Kam a tia ni bure nakon te UEA, ao E na bon aki kakab'aiaingkami.”
19Utia, are e tei i rarikin te baonikarea i bukin kabuokan taiani boiarara n te tai anne, e tabe n tautaua b'aini kabuokan te kaboiarara, are e a tauraoi b'a e nang anga nakon te UEA. E rangi n un ngke e ongo ana kauring Ataria, ao e karina ni kaoti te rebera i aon ram'ana!
20Ao a nooria taiani ibonga ake tekorakina, ao a tuangnga b'a e na kiitana te Tembora. Ao e a ataia Utia ae e a katuaaea te UEA, ma ngaia are, e a kawaekoa n otinako.
21Ao e rebera Utia ni kabane bongin maiuna. Ao e aki manga kariaiakaki b'a e na rin i nanon te Tembora ao n oin naba ana bareti. Ao bon anne bukina are e a maeka iai natina are Iotam ikekei man tautaeka i mwiina.
22Ao b'aai n kabane ake e karaoi Utia i nanon ana tai ni uea a mena n te rongorongo are e koreia te burabeti are Itaia are natin Amoti te m'aane.
23I bukina ngke e rebera Utia, e a bon aki konaa n taunaki n ruanimateia uea. Ma e a taunaki n te ruanimate ae e uakaan ae e b'ainaki irouia uea. E uea natina te m'aane are Iotam i mwiina.
Who We AreWhat We EelieveWhat We Do
2025 by iamachristian.org,Inc All rights reserved.
