1.Rongorongo 6 - Kiribati New Version Bible

Ana Kariki Rewi

1Rewi bon tamaia Kerition, Koata, ao Merari.

2Koata bon tamaia Amram, Itiia, Eberon, ao Utiera.

3Amram bon tamaia Aaron, Moote, ao Miriam.

Iai natin Aaron m'aane aika aman: Nataba, Abiu, Ereata, ao Itama.

4Aikai ana kariki Ereata: Bineati, Abitua,

5Buki, Uti,

6Teraia, Meraiota,

7Amaria, Aituba,

8Tatoka, Aimaati,

9Ataria, Ioanan,

10Ataria are te ibonga are e m'akuri n te Tembora are e karaoia te uea are Toromon, i Ierutarem,

11Amaria, Aituba,

12Tatoka, Tiarum,

13Irekia, Ataria,

14Teraia, ao Ieotataka.

15E anaa Ieotataka uean Aikubita are Nebukaneta nako B'aburon b'a te taenikai ngke E karaoia te UEA b'a a na nako mai abaia kaain Iuta ma Ierutarem.

16Iai natin Rewi ake teniman: Kerition, Koata ao Merari

17Ao a bane ni kariki ao iai natiia m'aane. Kerition bon tamaia Ribeni, ao Timei.

18Koata bon tamaia Amram, Itara, Eberon, ao Utiera.

19Merari bon tamaia Mari, ao Muti. Ana kariki Rewi aikai ake a manga riki b'a taani kairiiri ni bon aia kaainga n tatabemaniia nako.

20Ana kariki Kerition bon Ribeni, Iaata, Timm'a,

21Ioa, Ito, Tera, ao Ieaterai.

22Ana kariki Koata bon Amminataba, Kora, Atira,

23Erekana, Ebiataba, Atira,

24Taata, Uriera, Utia, ao Tiaura.

25Erekana bon tamaia Amatai, ao Aimota.

26Ana kariki Aimota bon Erekana, Tob'ai, Naata,

27Eriaba, Ieroam, ao Erekana.

28Tamuera bon tamaia Ioera are te karimoa, ao Abiia are te karimwi.

29Ana kariki Merari bon M'ari, Ribeni, Timei, Uta,

30Timea, Akia, ao Ataia.

Taani Katangitang n Te Tembora

31Ngke e a tia ni kam'ainga te Atiniberita te uea are Tawita nako Ierutarem, ao e a rineia taani katangitang man te baronga are Rewi b'a taani katangitang n te tabo n taromauri.

32A m'akuri taani katangitang aikai n te Um'antabunrianna ao i mwiina, a manga m'akuri n ana Tembora te UEA are e karaoia Toromon.

33Aikai araia taani katangitang aikanne ma aia utu:

Eman are kaain te kaainga are Koa are boni ngaiia mataniwi. E okirikaaki ana bakatibu nakon Iakob'a n reitaki ma Ioera, Tamuera,

34Erekana, Ieroam, Eriera, Toa,

35Tuba, Erekana, Maata, Amatai,

36Erekana, Ioera, Ataria, Tebania,

37Taata, Atira, Ebiataba, Kora,

38Itiia, Koata, ao Rewi.

39Ataba bon ana koraki Enam ao e riki ngaia b'a te tia buobuoki. Ana bakatibu Ataba bon Berekia, Timea,

40Mikaera, Baateia, Marekia,

41Eteni, Tera, Ataia,

42Etan, Timm'a, Timei,

43Iaata, Kerition, ao Rewi.

44Etan bon ana koraki naba Eman ao e riki ngaia b'a te tia buobuoki. Etan boni kaain te kaainga are Merari, ao ana bakatibu bon Kiti, Aberi, Maruka,

45Atiabia, Amatia, Irekia,

46Amti, Bani, Temera,

47M'ari, Muti, Merari, ao Rewi.

48Ao nikiraia kaain te baronga are Rewi a rineaki b'a taani m'akuri n te Um'antabunrianna.

Ana Kariki Aaron

49Bon ti Aaron man ana kariki aika a kariaiakaki n angakarea ao b'ai ni kaboiarara i aon te baonikarea ake uoua ake n te Um'antabunrianna. Bon tabeia te m'akuri n te Tabo are Moan te Tabu ao bootaki ni kab'arabure, n aron are e a tia n anga iai ana mwioko ana toro te UEA are Moote.

50Ana kariki Aaron mairoun natina te m'aane are Ereata, Bineati, Abitua,

51Buki, Uti, Teraia,

52Meraiota, Amaria, Aituba,

53Tatoka, ao Aimaati.

Aia Kaawa Kaain te Baronga are Rewi

54Ana kariki Aaron bon kaain te kaainga are Rewi are kaain Koata, ao boni ngaiia te moani koraki n rineaki b'a a na anganaki aia kaawa are a na maeka iai.

55A anganaki te kaawa are Eberon n te aba are Iuta ao aaba aika a raoiroi uteuteia ake i rarikina.

56Ma e a anganaki Kareb'a are natin Iebunne te m'aane taabo n ununiki ma kaawa ake i rarikin Eberon.

57Ma ngaia are, e a anganaki ana kariki Aaron Kaawa ni Kamauri

58ao aaba aika a raoiroi uteuteia ake i rarikin Eberon ake,

59Eberon, Ribena, Iatira, Etitemoa, Iren, Tebira, Atan, ao Beta-Temeti.

60Ao a anganaki man te baronga are Beniamin kaawa aika Keeb'a, Aremeta, ao Anatota ao aaba aika a raoiroi uteuteia ake i rarikina. Tebwi ma tenua kaawa ake a anganaki ana kariki Aaron.

61Ao nikiraia kaain te baronga are Rewi ake mairoun Koata a anganaki tebwina taiani kaawa mairouia kaain Manate Maeao.

62Ao kaain te kaainga are Rewi ake mairoun Kerition a karekei 13 kaawa mairouia baronga ake Itakara, Atera, Nabetari, ao Manate Mainiku i Batian.

63Ao kaain te kaainga are Merari a reke irouia tebwi ma uoua kaawa mairouia baronga ake Reuben, Kata, ao Teburun.

64Ma ngaia are, a anganiia kaain te baronga are Rewi kaawa ake a na maeka iai Iteraera ao taian aba naba aika a raoiroi uteuteia ake i rarikiia.

65A rineaki kaawa ni kabane i aan ana buobuoki te UEA, n reitaki naba ma kaawa aika man te baronga ake Iuta, Timeon, ao Beniamin.

66Tabeua man te kaainga are Koata a reke aia kaawa man te baronga are Eberaim.

67Aikai kaawa ni Kamauri ma aaba aika a raoiroi uteuteia ake i rarikiia ake a reke irouia tabeua utu: Tekem n aaba ake a tabukibuki, Ketera,

68Iokemeam, Beta-Oron,

69Aitiaron, ao Kata-Rimmon.

70Ao a anganaki Anera ma Biream mai Manate Maeao, ni ikotaki ma aaba aika a raoiroi uteuteia ake i rarikiia.

71E anganaki te kaainga are Kerition mairoun te baronga are Manate Mainiku uoua kaawa aika: Koran are i Batian, ao Atiterota, n reitaki ma aaba aika a raoiroi uteuteia ake i rarikiia.

72E anganaki naba te kaainga are Kerition aua kaawa mairoun te baronga are Itakara aika: Keteti, Taberata,

73Ramota, ao Anem, n ikotaki ma aaba aika a raoiroi uteuteia ake i rarikiia.

74A anganaki aua kaawa kaain Kerition mairoun te baronga are Atera aika: Matiara, Abeton,

75Ukoka, ao Reoba, ni ikotaki ma aaba aika a raoiroi uteuteia ake i rarikiia.

76N tokina, e anganaki tenua kaawa mairoun te baronga are Nabetari aika, Keteti i Kariraia, Ammon, ao Kiriataim, n reitaki ma aaba aika a raoiroi uteuteia i rarikiia.

77Ao nikiraia kaain te kaainga are Merari a anganaki kaawa ake Rimmono, ao Tabora ao aaba ake a raoiroi uteuteia ake i rarikiia, mairouia te baronga are Teburun.

78A anganaki naba kaawa aika aua ake i mainikun te Karaanga are Ioretan man te baronga are Reuben aika, Betera n aaba ake a aoraoi, Iata,

79Ketemota, ao Meb'ata, n ikotaki ma aaba ake a raoiroi uteuteia ake i rarikiia.

80Ao kaain Merari a anganaki man te baronga are Kata kaawa aika Ramota i Kireata, Maanaim,

81Etibon, Iatera, n ikotaki ma aaba ake a raoiroi uteuteia ake i rarikiia.