Te Tua-Kaua 26 - Kiribati New Version Bible

Ana B'ai Te UEA Moan Uaan Te TaiAo e taku Moote nakoia Iteraera:

1E anganingkami te aba te UEA, ao e nang reke iroumi n te tai ae aki maan, ma n tekateka iai,

2ao kam nang uniki arokami taiani uita ma b'aare iai. Ao ngkana kam a moana taian uaan arokami mai iai, ao kam na nnea are kam moan anaia i nanon te b'atiketi. Kam na uoti nakon te tabo are e a tia n rineia te UEA ae Atuami b'a te tabo are E na taromauriaki iai,

3ao kam na tuanga te ibonga ni kaangai, E a tia ni berita nakoia ara bakatibu te UEA ae Atuara n taai ake ngkoa, b'a E na anganiira te aba aei. Ao n te bong aei, I kaaitaua i bukin kaawakinakin ana Berita, ao anganakiu tib'au te aba.

4Ao a na anaa te b'atiketi ibonga ma ni katikua i matan ana Baonikarea te UEA.

5Ao i mwiina, kam na tei i matan te tabo n taromauri, ao kam na tataro ni kaangai:

Bon akea aia auti ngkoa au bakatibu,

kaain Aram ake a nako ni maeka

i Aikubita.

Bon te utu ngkoa ngaiia

ao ti tabeman ngaiia i abaia,

ma a rikirake m'aitiia

ao korakoraia,

bon te botannaomata ngaiia ae kauaomata.

6A rangi n iowawa kaain Aikubita nakoira

ao akea naba aia tangira nakoira.

A karaoi m'akuri aika buakaka nakoia ara aomata

ao ni kam'akurira n aroia tooro.

7Ti tang ni kakaea buokara

nakoim, te UEA ae Atuaia

ara bakatibu.

Ko ongo tangira;

ao Ko ataia ae ti a reke n te kangaanga

ma te b'ainikiriinaki.

8Ao Ko a kakamaakuia kaain Aikubita

n am kakai ae korakora

ao Ko kamaiura mai Aikubita.

9Ko karokoira ikai

ao Ko anganiira te aba aei

ae m'aiti iai te miriki ma ana karewe te manibeeru.

10Ao ngkai te UEA, I uoti nakoim

kabanean raraoin uaan te uita ma te b'aare

ake Ko a bon tia n anganai.

11Ao i mwiina, kam na karaoa ami bootaki n am'arake ngkami ma ami utu n te tabo n taromauri ni kaaitaua te UEA ae Atuami i bukin anganakimi uaan te tai aika raoiroi. Ao kam na ururingnga naba ni kaoiia kanoan Rewi ao iruwa akana maeka n ami kaawa.

Teuana Te Katebwina ni M'akoro Man Uaan Te TaiAo e taku Moote nakoia Iteraera:

12Kam na anga teuana te katebwina ni m'akoro man uaan ami tai ni katoa ririki nakon te UEA. Ma kam na anga teuana te katebwina mani m'akoron uaan ami tai n te katenua n ririki nakoia aika kainano aika maeka n ami kaawa, n reitaki naba ma kanoan Rewi, iruwa, ataei aika akea aia karo, ao aine aika mate buuia. B'a a na reke kanaia ae tau n te aro anne.

13Ao i mwiina, kam na manga tataro:

Te UEA ae Atuara, Ko a tia n taekinna b'a e na kaokoroaki teuana te katebwina ni m'akoro man uaan ara tai. I a tia n ongotaeka nakon am Tua n anganiia aomata aika kainano baikai, n reitaki naba ma kanoan Rewi, iruwa, ataei aika akea aia karo, ao aine aika mate buuia.

14I bon tuai mani kana naba teutana m'akoron am'arake aika tabu aikai ngkana I tanginiwenei; ao ni koauana, I bon tuai man riingnga naba ngkana I kam'araa. Ao bon akea naba mai buakoia ae I a tia n anga b'a te karea nakoia maate. I a tia ni karaoi b'aai ni kabane n aron aika Ko a tia ni baaireia.

15Ara UEA, Ko na tararikaaki man am Tembora ane i karawa ao kakab'aiaia Iteraera. Ko berita ngkoa nakoia ara bakatibu b'a Ko na anganiira te aba aei ae kaub'aina te miriki ma ana karewe te manibeeru, ao Ko a tia ni kaawakina am Berita.

Te UEA bon Atuaia Iteraera, Ao Ngkami Bon Ana AomataAo e taku Moote nakoia Iteraera:

16E tuangingkami te UEA ae Atuami n te bong aei b'a kam na ongotaeka nakon ana Tua ma ana Reirei ma nanomi ao tamneimi ni kabane.

17Ao ngkami kam a tia ni kariaia b'a E na riki te UEA b'a Atuami, ao kam na ongotaeka nakon ana Tua ma ana Reirei, ao kam na ongo i rouna ngkana E taetae nakoimi.

18Ao ngkai kam a tia ni kariaia b'a kam na ongotaeka iroun te UEA, ao E a tia naba Ngaia ni kariaia b'a kam a riki b'a ana Aomata, ao Ana b'ai, n aron are E a tia ni berita iai.

19E karikiia botannaomata ni kabane te UEA, ma E na karikingkami b'a te botannaomata ae rangi ni kinaaki, ao e na reke iroumi te neboaki ma te karineaki ae m'aiti nakoia. Ti ngkami ae kam na b'ainaki iroun te UEA ae Atuami, n aron are a tia ni berita iai.