2.Tamuera 7 - Kiribati New Version Bible

Ana Rongorongo te UEA Nakon Tawita(1 Rongo 17.1-15)

1Ao e m'aing Tawita nakon te bareti ae e boou, ao te UEA e kariaia b'a e na waaki abanueana ma te rau.

2N te bong teuana, ngke e tabe n taetae Tawita ma Natan are te burabeti, ao e taku Tawita, “Nooria, I maeka n te bareti ae e karaoaki n te tiira, ma e meemena te Atiniberita i nanon te autinrianna.”

3Ao e taku Natan, “E mena te UEA iroum, ma ngaia are, ko na karaoa are ko bon taku!”

4N te tairiki anne, e tuanga Natan te UEA

5b'a e na nako ni kawara Tawita n anganna te rongorongo ae e kaangai:

Tawita bon au tia m'akuri ngkoe, ma ngaia are, ko na ongora nakon te b'ai ae I taekinna. E aera ngkai ko na karaoa te tembora ibuku?

6I bon aki maeka n te tembora ngke I kaotinakoia au aomata mai Aikubita, ao I tuai ni maeka naba i nanon teuana n te tai aei. Bon mwengau te autinrianna n taabo nako ike I iriia nako iai.

7I rineia taani kairiiri ao I tuangiia b'a a na riki b'a taani kaawakintiibu i bukiia au aomata aika Iteraera. Iai te tai ae I tia iai n tuanga temanna mai buakoia b'a e na karaoa te tembora man te tiira ibuku?

8Tawita, aei au taeka Ngai ae te UEA ae Moan te M'aaka nakoim. I uotiko n nako mai man te tawaana are ko tararuaia am nanai n tiibu iai, ao I karikiko b'a te tia kairiiri irouia au aomata.

9I buokiko n taabo nako ike ko nako iai, I buokiko ni kamaunaia am kairiribai i boni matam. Ao I karikiko b'a temanna mai buakoia aomata aika kabanea ni kakannato ao n tanoata n te aonnaba.

10I a tia n anganiia au aomata aika Iteraera oin abaia ike a na konaa ni maeka ma te rau iai, ao a na aki manga ruru ni maaku riki. A na aki manga roko aomata aika a buakaka n aki karauaia, n aron are a tia ni karaoia ngkoa

11ngke I kariaia taani motikitaeka b'a a na tautaekana au botannaomata. Ao I a tia n taraia ami kairiribai b'a a na aki buakaningkami.

Ngkai I berita b'a ko na uea ma am kariki.

12N na rinea temanna mai buakoia natim m'aane b'a e na uea ngkana ko a roko n tokin maium ma n taunaki n ruanimateia am bakatibu. N na karikia b'a te tia tautaeka ae e korakora,

13ao bon akea temanna ae e na konaa n anaa abanueana mai rouna. Boni ngaia are e na katea te tembora ibuku.

14N na riki b'a tamana, ao e na riki b'a natiu te m'aane.

N na kaetia ngkana e karaoa te kaairua, n aroia naati ngkana a kaetaki irouia aia karo.

15Ma N na bon kateimatoa au boraraoi ma ngaia, n arou ngkoa ngke I katoka au boraraoi ma Tauro, are e uea ngkoa i m'aaim.

16N na kakoauaa raoi b'a e na uea n taai nako temanna mai buakoia am kariki.

17E tuanga Tawita te burabeti are Natan b'aai ni kabane ake e ongo raoi n te mii.

E Anga Ana Kaaitau Tawita Nakon Te UEA

(1 Rongo 17.16-27)

18Ao e nako Tawita n rin n te autinrianna are e a tia ni kateia i bukin te Atiniberita. Ao i mwiina, e tekateka ikekei n tataro ni kaangai:

Te UEA ae Moan te M'aaka, e bon riai n aki reke nako iu ma au utu te b'ai ae Ko a tia ni karaoia nakoira,

19ma e ngae n anne, Ko a tia ni berita b'a ko na karaoa riki ae e m'aiti. Bon aei arom ae e ko kaakaraoia nakoia am aomata?

20Bon am tia m'akuri ngai, ao Ko atai au iango nako, ma ngaia are, bon akea riki te b'ai ae I tangiria n taekinna.

21Ko a tia ni karaoa te m'akuri ae e kamimii aei, ao Ko kariaia b'a N na ataia, i bukina ngke Ko tangiria ni kakoroa bukin am berita.

22Te UEA ae Moan te M'aaka, Ko korakora riki nakoia ake tem'angina. Bon akea ae ti te bo ma Ngkoe, bon ti Ngkoe te Atua. A bane ni koaua b'aai ni kabane aika taekam ake ti ongo.

23Bon akea riki te botannaomata n te aonnaba ae ti te bo ma Iteraera, te botannaomata are Ko kamaiua man te tautoronaki i Aikubita b'a a na riki b'a oin Am b'ai. Ko moanna n ataaki ni karaoan kakai aika a kamimii ngkana Ko kairoroia botannaomata ma antiia b'a a na kiitana abam, b'a a aonga ni konaa ni maeka ikai Am aomata.

24Ko a tia ni rinea Iteraera b'a Am aomata n aki toki, ao Ko a tia n riki b'a Atuaia.

25Ao ngkai te UEA ae te Atua, taiaoka ni karaoa te b'ai are Ko a tia ni berita iai nako iu ma au kariki nako.

26Ao ane E na tanoata iai taekam n aki toki, ao ane a na bane ni kaangai aomata, “E tautaekana Iteraera te UEA ae Moan te M'aaka, ao ana uea aika e rineia bon Tawita ma ana kariki nako.”

27E ngae n anne, bon te UEA ae Atuan Iteraera ae Moan te M'aaka Ngkoe. Ko a tia n tuangai b'a ko na karikiia b'a uea au kariki nako, Ao bon anne ngkai I kaungaaki n tataro nakoim n aron aei, e ngae ngkai bon ti am tia m'akuri ngai.

28Te UEA ae Moan te M'aaka, bon te Atua Ngkoe. Ko a tia ni berita ni b'aai tabeua aika a raraoi nako iu, ao ko bon kakoauaaki b'a Ko na karaoa te b'ai are Ko a tia ni berita iai.

29I butiiko b'a Ko na kakab'aiaia au kariki ma ni kariaia b'a a na riki b'a uea aika a rineaki. Ko a bon tia ni berita iai, ao I kakoaua b'a Ko na bon kakab'aiaa au utu n aki toki.