1Ao e mate Abiia ao e taunaki i Ierutarem. Ao e a manga uea natina te m'aane are Ata, ao e rau aon Iuta i nanon te maan ae tebwiina te ririki.
2E ongotaeka Ata iroun te UEA are Atuana ao e kakaraoa ae e eti.
3E kamaunai baangotan te aba ao taian baonikarea i bukin taian anti. E urui taian atiibu ake bannan taian anti ao e koroi ni kab'akai taiani boua ake a tabu ake a kabonganaaki i bukin taromaurian te anti are Nei Atera.
4Ao i mwiina, e tuangiia aomata ni kabane i aon Iuta b'a a na taromauriia te UEA ae te Atua, n ai aron are a tia ni karaoia aia bakatibu, ao a iri nanon taian tua ma taian reirei.
5E kamaunai baangotan te aba ni kabane ao taiani baoni karea ake i bukin b'aai ni kaboiarara ake i Iuta.
6E kakab'aia Iuta te UEA n anga te rau ngke e uea Ata, ao n te tai anne, e nonoi kaawa aika a m'aiti Ata.
7E taku nakoia aomata, “Ti na karaoi taian oo ao taian taua n totoko i bukin ara kaawa nako, ao ti na karaoi taian mataroa aika a konaa n rokanaki n taiani biti aika a buubura. E na riki te aba aei b'a ara b'ai, i bukina b'a ti a tia n ongotaeka iroun te UEA ae Atuara. E a tia n anganiira te rau mairouia ara kairiribai.” Ao a bane ni karaoi b'aai ni kabane aomata ake e iangoi Ata.
8Bon iai ana taanga ni buaka Ata e korakora aika a ninikoria: Tenibubua te ngaa mai buakoia bon man te baronga are Iuta ao iai otangaia ao aia kainiwai n tatabemaniia nako; uabubua wanibwi te ngaa man te baronga are Beniamin ao iai aia kainikatebe ao aia kanoanikatebe.
Konaakiia Ana Taanga ni Buaka Itiobia Irouia kaain Iuta9E kaira te taanga ni buaka Tera are kaain Itiobia ae m'aitina teuana te mirion tautiana ao tenibubua taiani kaanibuaka nakon te kaawa are Maretia i Iuta.
10E kaaitibo ma Ata ikekei, ao a katauraoi nakon te buaka taanga ni buaka aika uoua aikai n te M'arua are Tebata.
11E tataro Ata ao e taku:
Te UEA ae te Atua, bon ti ngkoe ae ko konaa ni buoka te taanga ni buaka ae akea korakorana ma ni katokanikaia i aon ae korakora. Ma ngaia ae, ti onimakinna b'a ko na buokiira. Ti na buakana te taanga ni buaka ae korakora aei i bukin neboan aram, ao ti ataia b'a ko bon aki konaa ni konaaki. Bon te UEA ae Atuara ngkoe.
12E buokiia Ata ma ana taanga ni buaka te UEA ni kataenikaiia kaain Itiobia. A biri nako tautia,
13ma a kakioaki irouia Ata ma ana taanga ni buaka ni karokoa Kerara. Bon te konaaki koaua a bon aki konaa ni buaka Itiobia.
Ao a anai b'aai ni kabane tautian Iuta ake aia b'ai kaain Itiobia.
14A ongo aomata ake a maeka ni kaawa aika a uarereke i rarikin Kerara ao a maaka te UEA. Ma ngaia are, e a rangi ni beebete irouia ana taanga ni buaka Iuta ni kataenikaiia ma ni uoti nako b'aai ake a tangiri aika a kakaawaki man taiani kaawa aikai.
15A bon buakani naba taiani maeka n rianna ake a maeka iai taani kaawakin tiibu, kooti, ao kaamero. Ao i mwiina, a oki nako Ierutarem.
Who We AreWhat We EelieveWhat We Do
2025 by iamachristian.org,Inc All rights reserved.
