Iobi 33 - Kiribati New Version Bible

Ana taeka Eriu nakon Iobi b'a e na kakauongo raoi.

1Ao ngkai, Iobi, ko na kakauongo raoi

nakon au taeka ni kabane.

2Nooria, I a kauka wiiu man taekin

b'aai ni kabane ake a mena i nanou.

3A eti raoi am taeka, ao a koaua.

4E karaoai Tamnein te Atua,

ao E kamaiuai ikeiken Teuare Moan te M'aaka.

5Kaekaai ngkana ko kona, baairei raoi am taeka i matau ao kamatoako raoi.

6Ti te bo arou ma ngkoe i matan te Atua,

ti kaai ni karaoaki man te tano.

7Ma ngaia are, bon akea bukina b'a ko na maakai;

N na bon aki taobekaiko nako.

8Ao aei te b'ai are ko taekinna are I ongo,

9“I aki bure; I tuai karaoa te b'ai ae bure.

Bon tiaki te tia bure ngai, ao bon akea te bure i Rou.

10Ma E kakaea te anga teuana te Atua are E na buakanai iai,

ao E karaoai b'a kaanga te kairiribai.

11E kabaei waeu n te taurekereke,

E noori b'aai ni kabane aika I karaoi.”

12Ma I tuangko Iobi, b'a ko bure.

E korakora riki te Atua nako ia aomata nako.

13E aera ngkai ko bukina te Atua

b'a E aki kaekaekai ngurengureia aomata?

14E ngae ngke E aki toki n taetae te Atua n taai nako,

ma bon akea ae katabea nanona n te b'ai ae E taekinna.

15Ngkana a matu aomata,

ao E taetae te Atua n taiani mii ma kaotioti.

16E kauki taningaia b'a a na ongo baike E taekin,

ao a na maaku n Ana taeka n reirei.

17E taetae te Atua nako ia b'a aonga n toki man aia bure,

ao ma ni kamaiuia man te aro ni kainikatonga.

18E aki kona ni kariaia b'a a na tiringaki;

E kamaiua man te mate.

19E reireia te aomata te Atua ngkana E karokoa te aoraki

ma te maraki i aon rab'atan te aomata.

20E a bua kan kanakin te am'arake are kani kaakanna,

ao e na riba te am'arake are rangi ni kangkang.

21A tangenge riina

b'a ai ti te kun i aon te ri.

22E a kaan rokona i abaia maate.

23E na mena ngkoa, ao e a roko naba te anera ni buokia

are temanna mai buakoia Ana anera te Atua ake te ngaa,

ake a kakauringiia aomata nako tib'angaia.

24E na nanoangaia te anera, ao e na kaangai, “Kainaomata!

A aki riai b'a a na nako abaia maate.

A na bon kainaomataaki.”

25A na manga okira aia bong n rikirake ma ni manga marurung;

26E na ongo te Atua i rouia ngkana a tataro;

A na taromauriia te Atua ma te kukurei;

E na manga kanakoraoi b'aai te Atua i bukiia.

27Ane a na taetae i mataia aomata ni kaangai, “I a tia ni bure,

I a tia ni karaoa te b'ai ae aki raoiroi, ma e aki katuaaeai te Atua ngke I bon riai ni katuaeaki.

28E kaawakinai b'a N na aki roko i abaia maate,

ao ai ngaia ae a riki n teimatoa iai maiu.”

29E karaoi b'aai ni kabane aikai te Atua n taai nako;

30E karekea maiun te aomata,

ao E anganna kakukurein te maiu.

31Ao ngkai Iobi, ko na ongora nakon te b'ai ae I taekinna;

tai karongoa b'a N na taetae.

32Ma ngkana iai te b'ai ae kona taekinna, ao taekina b'a N na ongora.

I kani kakoaua raoi b'a ko eti ke ko aki.

33Ao ngkana akea te b'ai ae ko kan taekinna, ao tai karongoa ma ongora i Rou,

b'a N na reireiniko arom ae ko na wanawana iai.