Etekiera 41 - Kiribati New Version Bible

1I mwiina, ti nakon te ruu are i nuuka, te Tabo are e Tabu. E anaa warebwen te mataroa te m'aane arei, ao bon tenua te miita warebwena,

2ao nimaua te miita ab'akina, ao raroan te mataroa nakon taian oo ake n iterana ake uoua bon uoua ma te iterana te miita. Te katangaina n ti ngaia bon uabwi ao tebwiina te miita.

3Ao e a manga nakon ruun te Tembora are te kabanea mai tabona. E anaa ab'akin te kawai nako iai ao bon: teuana te miita nanona rikaaki ao tenua te miita rababana, ao oona ake n iterana ake uoua bon tenua ma te iterana mateniia.

4E anaa ab'akin te ruu n ti ngaia, ao bon tebwiina te tikuea miita ab'akina. E mena te ruu aei i aon te ruu ni katangaina. Ao i mwiina, e taku nako iu, “Bon aei te Tabo are Moan te Tabu.”

5E anaa matenin oon te Tembora te m'aane arei, ao bon tenua te miita mateniia. Bon iai taian ruu ni b'ai aika uoua te miita aika a karaoaki aika a nim ma tinanikun te oo ni katobibia.

6Iai tenatao taian ruu, ma ruaia kakatenibwi n teuana te borauatao, ao a tei i aon taiani kai ni bakatoko aika a nim ma oon te Tembora, n te aro are akea te b'ai ae e karaoaki i nanon te taian oo.

7A matenten riki oon te Tembora are mai nano nakon are mai ieta, are nanona b'a a raababa riki taian ruu ni b'ai ake taiani kabane mai eta nakon ake mai nano. Iai taiani kaintam'arake aika a biri man borauatao ake mai nano nakon borauatao ake i nuuka, ao nakon ake kabane mai eta.

8E toka te Tembora i aon te aana ae te atiibu ae tenua te miita rietana, ae e a riki naba b'a te aana i bukin taian ruu ni b'ai.

9Oon taian ruu ni b'ai ake mai tinaniku bon uoua ma te iterana te miita mateniia, ao bon akea te b'ai i marenan taian oo aikai

10ao taian auti ake a rangi ni kaan, bon tebwina te miita raroaia.

11Teuana mai buakon mataroana e nakon taian ruu ni b'ai ake a mena n iteran te Tembora are i meaang, ao are teuana e nakon ake a mena i maiaki. E raka nako te atiibu are te aana b'a uoua ma te iterana te miita i aon oon taian ruu ni b'ai, ake iteraia ake a kaaitaraa tinaniku.

Maeaon Te Kateitei Ao Baairean Ab'akin Te Tembora

12I noora naba te kateitei teuana: e kaaitaraa maeaon te Tembora ao tenibwi ma nimaua te miita rababana, ao abwi ma nimaua te miita ab'akina, ao iai oona aika i aon uoua ma te iterana te miita mateniia.

13E anaa ab'akin te Tembora te aomata arei, ao bon nimabwi te miita. E a manga anaa baaireana man oon te Tembora are mai buki, ri aon te tabo are e uki i akuun te Tembora, nakon oon te kateitei are i maeao, ao bon nimabwi te miita ab'akina.

14Te raroa ri aon matan te Tembora, n reitaki ma te tabo are e uki n te katawanang n iterana ake uoua, bon nimabwi te miita.

15N tokina, e a anaa baairean ab'akin te kateitei are i maeao te m'aane arei, n reitaki ma taian ruu n iterana ake uoua, ao bon 50 naba te miita.

Nanon Te Tembora

Te kawai n rin n ruun te Tembora, te Tabo are e Tabu, ao te Tabo are Moan te Tabu

16a bon rabunaki n taiani kairababa ni kabane ni karokoa taian winto, ma taiani mataroa ma winto aika a uarereke a rabunaki ni kairababa aika koreaki ni kairarikaki.

17E a toki naba te kairababa i aon te mataroa. A katamaroaaki taian oo aikai

18n taian korobanna aika taamnein baika a maiu aika iai baiia ni kiba ao bannan te baam i marenan baika a maiu ake iai baiia ni kiba ni kabutaa te ruu arei. Iai uoua ubun te baere e maiu arei:

19ubuna are te aomata e kaaitaraa te aroka are te baam n te itera are teuana, ao ubuna are te raian are e kaaitaraa te aroka are n iterana are teuana. Arona anne ni kabane te ruu arei,

20ni moa mai aon te burooa ni karokoa aon taian mataroa.

21E tikuea tein te tabo are man bouan te mataroa ni karokoa te Tabo are e Tabu.

Te Baonikarea Te Kai

E mena i matan te mataroa nakon te Tabo are Moan te Tabu te b'ai ae kaanga taraan

22te baonikarea te kai. Bon teuana ma te iterana te miita rietana ao teuana te miita rababana ma ab'akina, ao a karaoaki koonana, aana, ao iterana nako man te kairababa. E taku te m'aane arei nako iu, “Bon aei te kauring b'a E teimatoa te UEA n tarataraa ana Tembora.”

Te Mataroa N Te Tembora

23Bon uoua mataroan taiani kawai nakon te Tabo are e Tabu ao te kawai nakon te Tabo are Moan te Tabu,

24ao iai iteran mataroa aikanne n tatabeua nako aika uoua aika a konaa n rukumaki ni kaukaki.

25A katamaroaaki taian mataroa nakon te Tabo are e Tabu, ni bannan baika a maiu aika iai baiia ni kiba ao aroka aika taiani baam n aron are n taian oo, ao iai te raburabu te kairababa i aan taian oo aikai, ao iai naba te raburabu te kairababa i aon te b'aranta i tinanikun mataroa aikai.

26A uarereke wintoon te b'aranta aei ao a katamaroaaki naba ni bannan aroka taian baam.