1Kam na kamoamoa te UEA!
E raoiroi te anene ni kamoamoa Atuara;
e kakukurei ao e riai kamoamoana.
2E a kaokaki Ierutarem nakon arona are rimoa iroun te UEA;
E a kaokiia ake a tia n riki b'a taenikai.
3E kamaiuia akana uruaki nanoia,
ao E kabae ikoakiia.
4E a tia ni bairei m'aitin taian itoi,
ao E karekei araia n tatabeua nako.
5E kakannato ara Uea ao E korakora;
akea tokin ana atatai.
6E buokiia ni kamarurungia akana b'ainikirinaki te UEA,
Ao E katoki eeia ni kab'ainrangiia akana buakaka.
7Kam na anene ni katituaraoa te UEA;
katang ami b'ai ni katangitang nakon Atuara;
8E kaona karawa n taian nang;
E katauraoa te karau i bukin aon te aba
ao E karikirakei uteute i aoni maunga.
9E angania maan kanaia
ao E kaam'arakeia buniia kunei ngkana a tangi ni baki.
10E aki anaaki nanon te UEA n taraani korakoraia aoti,
ke n taraaia tautia aika ninikoria;
11Ma E anaaki nanona irouia akana karinea,
akana onimakina ana Tangira ae Teimatoa.
12Ierutarem, ko na kamoamoa te UEA!
Tion, ko na kamoamoa Atuam!
13B'a E kamatoai mataroan nonom,
ao E kakab'aiaia aomata akana maeka iroum.
14E kawakin tiam b'a a na aki anaaki,
ao E kanuaiko n te am'arake ae moan te raoiroi.
15E tua ana taeka nako aonnaba,
ao baike e taekin a bane ni kakoroaki bukiia ni waekoa.
16E kabutaa aon te aba n te tinoo b'a ai aron te burangketi ae taakinaki,
Ao E kamaaea te ran ae buraoki b'a ai aron te bubu n tano.
17E kamrarai maibi n aiti b'a ai aron atibu aika uarereke;
Ai antai ae kona moan te m'aitorotoro aio?
18E kanakoa ana taeka, ao e riki n ran te aiti;
E kawaia te ang, ao e raanga nako te ran.
19E anga ana taeka ma ana tua
ma ana moti nakoia Iteraera.
20Akea riki te botannaomata teuana ae E a tia ni karaoa aio nakoina;
A aki atai ana tua.
Kam na kamoamoa te UEA!
Who We AreWhat We EelieveWhat We Do
2025 by iamachristian.org,Inc All rights reserved.
